މިއަހަރުގެ މިހާތަނަށް 28 މީހަކު ޤުރުއާން ހިތުދަސްކޮށް، އިމްތިޚާނު ނިންމައިފި
-
3 ފަރާތަކުން ދަނީ އިމްތިހާނު ހަދަމުން
-
5 އަހަރުގެ ކުއްޖަކުވެސް ޤުރުއާން ހިތުދަސްކުރުމަށްފަހު މުރާޖިޢާ ކުރުމަށް އެދިފައިވޭ
28 މީހަކު މިއަހަރު ޤުރުއާން ހިތުދަސްކޮށް، އިމްތިހާނު ނިންމާފައިވާކަމަށް އިސްލާމީ ކަންތައްތަކާބެހޭ ވަޒީރު ޑރ.މުޙައްމަދު ޝަހީމް އަލީ ސަޢީދު ވިދާޅުވެއްޖެއެވެ.
މީޑިއާތަކާ ހިއްސާކުރެއްވި މެސެޖެއްގައި އިސްލާމީ ކަންތައްތަކާބެހޭ ވަޒީރު ޑރ. މުޙައްމަދު ޝަހީމް އަލީ ސަޢީދު ވިދާޅުވީ މިއަހަރުގެ މިހާތަނަށް ގިނަ ބަޔަކު ޤުރުއާން ހިތުދަސްކޮށް، ޙާފިޡުކަމުގެ އިމްތިހާން ހެދުމަށް އެދިފައިވާ ކަމަށެވެ. އެގޮތުން މިހާތަނަށް 28 މީހަކު މި އިމްތިހާނު ފުރިހަމަކޮށްފައިވާކަމަށް ވަޒީރު ވިދާޅުވިއެވެ.
ވަޒީރު ވިދާޅުވީ މިހާރުވެސް 3 މީހަކު ޤުރުއާން ހިތުދަސްކުރުމަށްފަހު އިމްތިހާން ހަދަމުންދާ ކަމަށާއި 2 މީހަކު އިމްތިހާނު ހެދުމަށް އެދިފައިވާ ކަމަށެވެ. މީގެ އިތުރުން ފަސް އަހަރުގެ ކުއްޖަކުވެސް ޤުރުއާން ހިތުދަސްކުރުމަށްފަހު މުރާޖަޢާ ކުރުމަށް އެދިފައިވާ ކަމަށްވެސް ވަޒީރު ވިދާޅުވިއެވެ. ރާއްޖޭގެ ޙާފިޡުންގެ ތެރޭގައި މިހާރުވެސް ގިނަ އަދަދެއްގެ ކުޑަކުދިން ހިމެނެއެވެ.
ރާއްޖޭގައި ޙާފިޡުންގެ އަގުވަޒަންކުރުމުގެ ގޮތުން ރައީސުލްޖުމްހޫރިއްޔާގެ ހާއްސަ މެޑައްޔާއި ހަނދާނީ ލިިޔުމާއި އިނާމު ދެއްވައެވެ. އެގޮތުން، އޮކްޓޯބަރ 2022 ން 1 ސެޕްޓެންބަރު 2024 ގެ ނިޔަލަށް ޤުރުއާން ހިތުދަސްކޮށްގެން ސަނަދު ހާސިލުކުރި 28 ޙާފިޡުންނަށް މިއަހަރު ވަނީ މި މެޑައްޔާއި ހަނދާނީ ލިޔުމާއި އިނާމު ދެއްވައިފިއެވެ.
ސަރުކާރުން ވަނީ ކީރިތި ޤުރުއާން ހިތުދަސްކުރާ ފަރާތްތައް ޢުމްރާއަށް ފޮނުވުމުގެ މަޝްރޫޢެއްވެސް މިއަހަރު އިފްތިތާޙުކުރައްވާފައެވެ. މި މަޝްރޫއުގެ ދަށުން ޢުމްރާ ދަތުރުގެ ފުރުސަތު ފުރަތަމަ އަރުވާފައިވަނީ އަލްޙާފިޡް ޢަލީ ރަޢީފުއަށެވެ.
ދީނީ ކަންތައްތަކަށް އަހުލުވެރި މުޖުތަމަޢެއް ބިނާކުރުމަކީ ސަރުކާރުން ވަރަށް ބޮޑު އިސްކަމެއް ދެއްވާ ކަމެކެވެ. އެގޮތުން، ޤުރުއާނަށް ޝައުގުވެރިކަން އިތުރުކުރުމަށް ގިނަ މަސައްކަތްތަކެއް ސަރުކާރުން ގެންދަވަނީ ކުރައްވަމުންނެވެ.