އިންޓަރ ސްކޫލް ވޮލީބޯޅަ މުބާރާތުން ފާހަގަވި ޒުވާން ކުޅުންތެރިން ވޮލީގެ ތެރޭގައި ހިފެހެއްޓުމަށްޓަކައި ޒުވާނުންގެ ޔޫތު ލީގެއް އުފައްދަން ޖެހޭ ކަމަށް ވޮލީބޯލް އެސޯސިއޭޝަން އޮފް މޯލްޑިވްސް (ވީއޭއެމް) ގެ ރައީސް މުޙައްމަދު ލަތީފް ވިދާޅުވެއްޖެއެވެ. ލަތީފް މިހެން ވިދާޅުވީ ޕީއެސްއެމްއިން ގެނެސްދިން "ކުޅިވަރު ވިންދު" ޕްރޮގްރާމުގައި ވާހަކަދައްކަވަމުންނެވެ.
ލަތީފް ވިދާޅުވީ ޒުވާނުންގެ ޔޫތު ލީގެއް އުފެއްދުމަށް މިހާރު އެ އެސޯސިއޭޝަންގެ ފަންނީ ކޮމިޓީން މަޝްވަރާ ކުރަމުންދާ ކަމަށާއި، އެ މަޝްވަރާގެ އެންމެ މުހިންމު ބޭނުމަކީ އަންނަ އަހަރު މާލޭ ޒޯންގައި ޔޫތު ލީގު ފެށުން ކަމަށެވެ.
"މިސާލަކަށް ވީކެންޑުގައި ކުޅޭ ގޮތަށް ޔޫތު ލީގު އުފައްދަން. ދިގު މުއްދަތަކަށް ކުޅޭ ކަހަލަ ގޮތަކަށް ތިން މަސް ދުވަސް ނުވަތު ހަތަރު މަހަށް ދެމިގެންދާ ޔޫތު ލީގެއް ފެއްޓިގެންދާކަމަށް ވަންޏާ، ދަރިވަރުން މި ކުޅިވަރުގައި ދެމެހެއްޓި، އިންޓަރ ސްކޫލް މުބާރާތް މިއަށްވުރެވެސް ފޯރިގަދަވާނެ" ލަތީފް ވިދާޅުވިއެވެ.
އަންނަ މަހު ވޮލީގެ 14 އަހަރުން ދަށާއި، 16 އަހަރުން ދަށާއި، 19 އަހަރުން ދަށުގެ ގައުމީ ޓީމުތައް އެކުލަވާލުމުގެ މަސައްކަތް ކުރިއަށްދާނެ ކަމަށް ވޮލީ އެސޯސިއޭޝަނުން މައުލޫމާތުދެއެވެ.
ލަތީފް ވިދާޅުވީ އަތޮޅުތެރޭގައިވެސް އަތޮޅު ފެންވަރުގައި ލީގެއް ކުރިއަށްގެންދެވިދާނެ ކަމަށާއި، މިއީ މި ވަގުތަށް ކޮންމެހެން ކުރަން ޖެހިފައިވާ ކަމެއް ކަމަށެވެ. އަދި އަންނަ ޖެނުއަރީ މަހު ގައުމީ ޓީމު އެކުލަވާލުމުގެ މަސައްކަތް ފެށޭއިރު, މި އަހަރުގެ މުބާރާތުގައި ވާދަކުރި ކުޅުންތެރިންނަށް އެ ފުރުސަތު އޮންނާ ކަމަށްވެސް ވިދާޅުވިއެވެ.
"އަޅުގަނޑުމެންގެ އެންމެ ބޮޑު ބޭނުމަކީ މުސްތަގުބަލް ކުރެހުން. 2027 ވަނަ އަހަރު އިންޑިއަން އޯޝަން އައިލެންޑް ގޭމްސްގައި ދިވެހި އަންހެން އަދި ފިރިހެން ޓީމު ފައިނަލް ކުޅުން އަޅުގަނޑުމެންގެ އަމާޒަކީ" ލަތީފް ވިދާޅުވިއެވެ.
އިންޓަރ ސްކޫލް ވޮލީ މުބާރާތުގައި އެންމެ ބޮޑު އެހީތެރިކަމެއް ލިބިގެންދިޔައީ ސްކޫލުތަކުގެ ބެލެނިވެރިންގެ ފަރާތުންކަން ލަތީފް ވަނީ ފާހަގަކުރައްވާފައެވެ. އެ މުބާރާތަށް ލިބިގެން ދިޔަ ބޮޑު ތަރުހީބުގައި ރަށު ފޯރީގެ ހިއްސާ ބޮޑު ކަމަށް ލަތީފް ވިދާޅުވިއެވެ. އަދި މުބާރާތް ކުރިއަށް ގެންދިޔުމުގައި ކުޅިވަރު ވުޒާރާގެ އިތުރުން، ތައުލީމީ ވުޒާރާއިން ފޯރުކޮށްދިން އެހީތެރިކަން ލަތީފް ވަނީ ފާހަގަކުރައްވާފައެވެ.