އެޕޯލޯ ހޮސްޕިޓަލުން ކެންސަރު ބައްޔަށް ޒަމާނީ ފަރުވާ

އިންޑިއާގެ އެޕޯލޯ ހޮސްޕިޓަލުން ފޯރުކޮށްދޭ އެންމެ ޒަމާނީ ފަރުވާއާއި، އެ ހޮސްޕިޓަލުގެ ޚިދުމަތްތަކުގެ މަޢުލޫމާތު ހިއްސާކޮށްފިއެވެ.

އެޕޯލޯ ހޮސްޕިޓަލް ގްރޫޕްގެ ހޮސްޕިޓަލުތަކުން ފޯރުކޮށްދޭ ޚިދުމަތްތަކުގެ މައުލޫމާތު މީޑީއާ ހިއްސާކުރުމަށް ބޭއްވި ނޫސްވެރިންގެ ބައްދަލުވުމުގައި ވަނީ އެކި ބަލިތަކަށް އެގްރޫޕްގެ ހޮސްޕިޓަލުތަކުން ފޯރުކޮށްދޭ ޒަމާނީ ފަރުވާގެ މަޢުލޫމާތު ދީފައެވެ. ޚާއްޞަކޮށް ކެންސަރު ބައްޔަށް ފަރުވާ ދިނުމަށް "މަލްޓި ޑިސިޕްލިނަރީ" ނުވަތަ ބަލިމީހާއަށް ބޭނުންވާ ހުރިހާ އެހީތެރިކަމެއް ދެވޭނެ ފަރުވާގެ އިންތިޒާމުތައް އެހޮސްޕިޓަލުތަކުގައި ހަމަޖެހިފައިވާކަމަށް އެޕޯލޯ ހޮސްޕިޓަލް ގްރޫޕުން ބުންޏެވެ.

އެޕޯލޯއިން ބުނީ، އެމެޖެންސީ ނޫން ޙާލަތްތަކުގައި ރާއްޖޭގައި ތިބޭ ޑޮކްޓަރުންގެ އެހީތެރިކަމާއެކު ޓެސްޓުތައް ހަދައި، ބަލީގެ ޙާލަތު ދެނެގަތުމާއި ބޭނުންވާ ފަރުވާތައް ދެނެގަނެވޭނެ ކަމަށެވެ.

އެޕޯލޯ ހޮސްޕިޓަލް ބެންގަލޫރޫގެ ނިއުރޯސާޖަރީ ޑިޕާޓްމެންޓުގައި މަސައްކަތްކުރައްވާ ޑރ. ސަތީޝް ސައްތިޔަނާރަން ވިދާޅުވީ އެ ހޮސްޕިޓަލުން ދޭ ޚިދުމަތްތައް ބޮޑަށް އަމާޒުކުރަނީ އެންމެ ފަހުގެ ޒަމާނީ ފަރުވާތައް ހުޅަނގުގެ ޤައުމުތަކަށްވުރެ އަގުހެޔޮކޮށް ލިބޭނެ އިންތިޒާމު މި ސަރަހައްދުގައި ހަމަޖެއްސުމަށް ކަމަށެވެ.

"އަޅުގަނޑުމެން މި ދޭ ޚިދުމަތްތަކުގެ ތެރޭގައި ބަލިމީހާއަށް ބޭނުންވާ ހުރިހާ ޚިދުމަތެއް ފޯރުކޮށްދޭން. މިފަދަ ޚިދުމަތެއް ހުޅަނގުގެ ޤައުމެއްގައި ދޭނަމަ، 25 ގުނަ އިތުރަށް ޚަރަދު ކުރަންޖެހޭނެ. އެހެންވީމަ ފަރުވާގެ ރައްކާތެރިކަން ކަށަވަރުކުރެވި، ހެޔޮއަގެއްގައި ޚިދުމަތް ފޯރުކޮށްދެވުމަކީ އަޅުގަނޑަށް ހީވަނީ މީގެ މުހިންމު ކަމަކީ." ޑރ. ސަތީޝް ވިދާޅުވިއެވެ.

އެ ހޮސްޕިޓަލުން ކެންސަރު ބައްޔަށް ދޭ ފަރުވާތަކުގެ ތެރޭގައި އާންމުކޮށްދެވޭ ފަރުވާތަކުގެ އިތުރުން ޕްރޮޓޯން ބީމް ތެރެޕީއާއި ސައިބަރ ނައިފްހިމެނެއެވެ. މި ފަރުވާތަކަކީ ހަށިގަނޑުގައި ހުންނަ ކެންސަރު ސެލްތަކަށް ސީދާ އަމާޒުކޮށް އެހެން ސަރަހައްދުތަކަށް ރޭޑިއޭޝަންގެ އަސަރުކުޑަވާ ގޮތަށް ދެވޭ ފަރުވާތަކެއްކަމަށް އެ ހޮސްޕިޓަލުން ބުންޏެވެ. މީގެ ސަބަބުން ރޭޑިއޭޝަން ފަރުވާނަގަން ބޭނުންނުވާ މީހުންނާއި އޮޕަރޭޝަން ނުކުރެވޭ މީހުންނަށްވެސް ފަރުވާދިނުމަށް މަގުފަހިވެގެންދާކަމަށް އެ ހޮސްޕިޓަލުން ފާހަގަކުރިއެވެ.

ކެންސަރު ބަލީގެ ފަރުވާތަކުގެ އިތުރުން، ބަލިމީހުންނަށް އޮންލައިންކޮށް ޑޮކްޓަރަށް ދެއްކުމާއި، ޕޯސްޓް އޮޕަރޭޓިވްސް ކޮންސަލްޓޭޝަންސްތައް އޮންލައިކޮށް ކުރިއަށް ގެންދާކަމަށް އެ ހޮސްޕިޓަލުން ބުންޏެވެ.

އެޕޯލޯ ހޮސްޕިޓަލުން ވަނީ ފަރުވާގެ ކަންކަން ފެށުނީއްސުރެ ނިމުމާއި ހަމައަށް އެހީތެރިކަން ލިބޭނެކަން ފާހަގަކޮށްފައެވެ.