ސްޕެއިންގެ ލަލީގާގެ ކްލަބް ވެލެންސިއާގެ ކޯޗު ރުބެން ބަރާހާ މަގާމުން ވަކިކޮށްފި އެވެ.
2000 ވަނަ އަހަރުން ފެށިގެން 2010 ގެ ނިޔަލަށް ވެލެންސިއާއަށް ކުޅެފައިވާ ބަރާހާ ކޯޗިންގެ ތެރެއަށް އައިސް ވެލެންސިއާ އާއި ހަވާލުވެފައިވަނީ 2023 ވަނަ އަހަރުގެ ފެބްރުއަރީ މަހު އެވެ. އަދި 23-2022 ވަނަ އަހަރުގެ ސީޒަނުގައި އޭނާ ވަނީ ވެލެންސިއާއަށް ލީގުގެ ނުވަވަނަ މަގާމް ހޯދަދީފަ އެވެ.
ނަމަވެސް މި ސީޒަނުގައި މިހާތަނަށް ވެލެންސިއާ އިން ލީގުގައި 17 މެޗު ކުޅެފައިވާއިރު އެ ޓީމު އޮތީ 12 ޕޮއިންޓާއެކު ރެލިގޭޝަނުގެ ޒޯނުގައި 19 ވަނައިގަ އެވެ.
އުމުރުން 49 އަހަރުގެ ބަރާހާ މަގާމުން ވަކިކުރުމަށްފަހު ވެލެންސިއާއިން ނެރެފައިވާ ބަޔާނެއްގައި ބުނެފައިވަނީ މިދިޔަ ސީޒަނުގައި އެ ޓީމު ވަރަށް އުނދަގޫ ހާލަތެއްގައި ވަނިކޮށް އޭނާ އެ ޓީމާއި ހަވާލުވެ ޔޫރަޕްގެ ފުޓްބޯޅައިގައި ވާދަކުރެވޭ ހާލަތާއި ކައިރިއަށް އެ ކްލަބު ގެންގޮސްދިން ކަމަށެވެ.
އަދި އޭނާ އަކީ އެ ކްލަބުގެ ލެޖެންޑެއް ކަމަށާއި އެހެންކަމުން އޭނާ އެ މަގާމުން ދުރުކުރުން ވެގެންދިޔައީ ދަތި އަދި އުނދަގޫ ނިންމުމެއް ކަމަށެވެ. ނަމަވެސް އެއީ މި ވަގުތު އެ ކްލަބަށް އެންމެ ފައިދާ ހުރި ގޮތް ކަމަށްވެސް ވެލެންސިއާގެ ބަޔާނުގައި ބުނެފައިވެ އެވެ.
ބަރާހާ ވަނީ ކުޅުންތެރިއެއްގެ ގޮތުގައި ވެލެންސިއާ އާއިއެކު ހޭދަކުރި ދިހަ އަހަރުގެ ތެރޭގައި ފަސް މުބާރާތް ކާމިޔާބުކޮށްފަ އެވެ. އޭގެ ތެރޭގައި ސެޕެނިޝް ލަލީގާ ދެ ފަހަރު އަދި ޔޫއެފާ ކަޕް ހިމެނެ އެވެ.
ލީގުގައި ދެން ވެލެންސިއާ ކުޅޭނީ އަންނަ ޖެނުއަރީ މަހުގެ ތިންވަނަ ދުވަހު ރެއާލް މެޑްރިޑާއި ދެކޮޅަށެވެ.