ބިންވެރިޔާ ސްކީމާގުޅޭ މައްސަލާގައި އެޗްޑީސީގެ މުވައްޒަފުންތަކެއް ވަކިކޮށްފި
-
15 ވަރަކަށް މުވައްޒަފުން ވަކިކޮށްފައިވާކަމަށް މަޢުލޫމާތު ލިބޭ
ބިންވެރިޔާ ސްކީމްގެ ގޯތި ނުލިބޭ ބަޔަކަށް ގޯތި ލިބުނުކަމުގެ ލިޔުން ދޫކުރި މައްސަލާގައި ހައުސިން ޑިވަލޮޕްމެންޓް ކޯޕަރޭޝަން، އެޗްޑީސީގެ މުވައްޒަފުންތަކެއް ވަޒީފާއިން ވަކިކުރައްވައިފިއެވެ.
އެޗްޑީސީގެ މުވައްޒަފުންތަކެއް ވަޒީފާއިން ވަކިކުރެއްވިކަން ހާމަކުރައްވާފައިވަނީ މީޑީއާއަކަށް ދެއްވި އިންޓަރވިއުއެއްގައި ރައީސުލްޖުމްހޫރިއްޔާ ޑރ. މުހައްމަދު މުޢިއްޒެވެ.
"މިއަދު އެޗްޑީސީން ވަނީ ބައެއް ފަރާތްތައް ވަކިކޮށްފައި. އަޅުގަނޑު ބޭނުމެއް ނޫން ސަރުކާރުގެ އެއްވެސް މުއައްސަސާއެއްގައި ކޮރަޕްޝަނަށް މަގުފަހިވާކަމެއް ކުރަން ފުރުޞަތު ލިބޭކަށެއް ބޭނުމެއް ނޫން. އެހެން ކުންފުންޏެއްގައިވެސް އެކަހަލަ ކަމެއް ހިނގާކަން އަޅުގަނޑު ފުރުޞަތެއް ނުދޭނަން." ރައީސް ވިދާޅުވިއެވެ.
ޕީއެސްއެމް ނިއުސްއަށް މަޢުލޫމާތު ލިބިފައިވާގޮތުގައި ވަޒީފާއިން ވަކިކޮށްފައިވަނީ އެޗްޑީސީގެ 15 މުވައްޒަފެކެވެ. ވަކިކުރި މުވައްޒަފުން ކުރަމުންދިޔައީ ކޮން މަސައްކަތެއްކަމެއް ހާމަކުރައްވާފައެއް ނުވެއެވެ. އަދި އެ މުވައްޒަފުންގެ މައްޗަށްކުރެވޭ ތުހުމަތުތަކެއްވެސް ހާމަކޮށްފައެއް ނުވެއެވެ.
ބިންވެރިޔާ ސްކީމްގެ ގޯތި ނުލިބޭ ބަޔަކަށް ގޯތި ލިބުނުކަމުގެ ލިޔުން ދޫކުރި މައްސަލާގައި އެޗްޑީސީގެ މުވައްޒަފުންތަކެއްވެސް މީގެކުރިން ވަނީ ސަސްޕެންޑްކޮށްފައެވެ. އޭގެ ތެރޭގައި ކުރީގެ މެނޭޖިން ޑިރެކްޓަރ ފަޒުލް ރަޝީދުވެސް ހިމެނޭއިރު، އިއްޔެގެ ވަގުތެއްގައި ފަޒުލް ވަނީ މަޤާމުން އިސްތިއުފާދެއްވާފައެވެ..