މޯލްޑިވިއަން ވައިޑް ބޮޑީގެ ދަތުރުތައް ފުރަތަމަ ޗައިނާގެ 3 ސިޓީއަކަށް، އޭގެފަހުން ޔޫރަޕަށް

ޤައުމީ އެއަރލައިން، މޯލްޑިވިއަންއަށް އަލަށް ގެންނަ ވައިޑް ބޮޑީ އެއަރ ކްރާފްޓްގެ އޮޕަރޭޝަންތައް ފުރަތަމަ ފަށާނީ ޗައިނާގެ 3 މަންޒިލަކަށްކަމަށް އެކުންފުނިން ވިދާޅުވެއްޖެއެވެ. މޯލްޑިވިއަންގެ އުދުހުންތައް ފުޅާކުރުމަށް، އެކުންފުނީގެ ފްލީޓު ބޮޑުކުރުމަށް ސަރުކާރުން ވަނީ މަސައްކަތް ފަށްޓަވާފައެވެ.

މޯލްޑިވިއަންގެ އޮޕަރޭޝަންތަކަށް ގެންނަ ވައިޑް ބޮޑީ އެއަރކްރާފްޓު ބޭނުންކުރުމަކީ ސަރުކާރުގެ މުހިންމު ވަޢުދެކެވެ. މިއާއެކު މޯލްޑިވިއަނުން ގެންނަ ފުރަތަމަ ވައިޑް ބޮޑީ އެއަރކްރާފްޓް އަންނަ މަހުގެ 7 ވަނަ ދުވަހު ރާއްޖެ ގެނެވޭނެކަމަށް އެކުންފުނިން ވަނީ ވިދާޅުވެފައެވެ. އެ އެއަރކްރާފްޓް ރާއްޖެ ގެނައުމުގެ މަސައްކަތް މޯލްޑިވިއަނުން ފަށްޓަވާފައިވާއިރު، މިވަގުތު އެ އެއަރކްރާފްޓް އޮތީ ސިންގަޕޫރުގައެވެ. އަދި މިހާރު ކުރިއަށްދަނީ އެ ބޯޓުގެ އައު ލިވެރީގެ މަސައްކަތްތައްކަމަށް މޯލްޑިވިއަނުން ވިދާޅުވިއެވެ.

ޕީއެސްއެމް ނިއުސްއަށް ދެއްވި އިންޓަރވިއުއެއްގައި މޯލްޑިވިއަންގެ ޑެޕިއުޓީ މެނޭޖިންގ ޑިރެކްޓަރ ޢަލީ ސަލީމް ވިދާޅުވީ ވައިޑު ބޮޑީގެ އޮޕަރޭޝަންތަކަށް އެކުންފުނި ތައްޔާރުވަމުން އަންނަކަމަށެވެ. މިއީ އެކުންފުނީގެ ކުރިއެރުމަށް ކުރެވޭ މުހިންމު މަސައްކަތެއްގެގޮތުގައި ސިފަކުރައްވާ ޢަލީ ސަލީމް ވިދާޅުވީ ވައިޑު ބޮޑީގެ އޮޕަރޭޝަންތަކާއެކު އެކުންފުންޏަށް ބޮޑެތި ކުރިއެެރުންތަކެއް އަންނާނެކަމަށެވެ. އެގޮތުން ދަތުރުތަައް ފެށުމާއެކު އަހަރެއްގެ މައްޗަށް 60 ހާސް ފަސިންޖަރުން ރާއްޖެ ގެނެވޭނެކަމަށް ލަފާކުރެއްވޭކަމަށް ސަލީމް ވިދާޅުވިއެވެ. މިއީ މޯލްޑިވިއަނަށް މާލީ ގޮތުންވެސް ލިބޭނެ ބޮޑު ކުރިއެރުމެއްގެގޮތުގައި އޭނާ ފާހަގަކުރެއްވިއެވެ. ސަލީމް ވިދާޅުވީ ވައިޑު ބޮޑީގެ އޮޕަރޭޝަންތައް އެންމެ ފުރަތަމަ ފެށުމަށް ހަމަޖެހިފައިވަނީ ޗައިނާއަށްކަމަށެވެ. ޗައިނާއަކީ ރާއްޖޭގެ ފަތުރުވެރިކަމުގެ ސިނާއަތުގައި އެންމެ މުހިންމު އެއް މާކެޓެވެ.

"ޗައިނާއަށް މިފަށާ ދަތުރުތަކާއިއެކު އަހަރެއްގެ ތެރޭގައި 60،000 އުފުލޭނެ މިހާރުވެސް ރޭވިފައި އޮތް ގޮތުން. މިކަމުން މާލީ ގޮތުންވެސް ކުރިއެރުންތަކެއް ލިބިގެންދާނެ. އަދި ބައިނަލްއަޤްވާމީ ދުނިޔެއަށް ކުންފުނީގެ ޚިދުމަތް ފުޅާވުމުން އެއީވެސް ކުންފުންޏަށް ލިބިގެންދާ ކުރިއެރުމެއް." މޯލްޑިވިއަންގެ ޑެޕިއުޓީ މެނޭޖިންގ ޑިރެކްޓަރ ޢަލީ ސަލީމް ވިދާޅުވިއެވެ.

މި އޮޕަރޭޝަންތަކާ ގުޅޭގޮތުން މޯލްޑިވިއަންގެ ޗީފް ސްޓްރެޓިޖިސް މުހައްމަދު ސައްފާހް ވިދާޅުވީ އެންމެ ފުރަތަމަ އޮޕަރޭޝަންތައް ފަށަނީ ޗައިނާގެ ތިން މަންޒިލަކަށްކަމަށެވެ. އަދި އޭގެ ފަހުން ޔޫރަޕަށްވެސް އޮޕަރޭޝަންތައް ފެށުމަށް ނިންމާފައިވާކަމަށް ސައްފާޙް ވިދާޅުވިއެވެ.

" ދަތުރުތައް ފުރަތަމަ ފަށާނީ ޗައިނާގެ ޝެންހާއި، ޗެންޑޫ އަދި ބެއިޖިންއަށް. އަދި އަޅުގަނޑުމެން މިދަނީ ޔޫރަޕަށް ދަތުރު ފެށުމަށް ވަރަށް ބާރަށް މަސައްކަތް ކުރަމުން" ސައްފާހް ވިދާޅުވިއެވެ.

މޯލްޑިވިއަނުން ވައިޑް ބޮޑީގެ ދަތުރުތައް ޗައިނާގެ ތިން ސިޓީއަށް ހަފްތާއަކު ތިން ދަތުރުކުރުމަށް ކަނޑައަޅާފައިވާކަމަށް މޯލްޑިވިއަނުން ވިދާޅުވިއެވެ. މިއީ 264 މީހުންގެ ޖާގައިގެ މަތިންދާބޯޓެކެވެ. އޭގައި ތިން ކެޓަގަރީގެ ފަސިންޖަރުންނަށް ޚިދުމަތްދޭނެކަމަށާއި، އެގޮތުން އިކޮނޮމީ ކްލާސް، ބިޒްނަސް ކްލާސްގެ އިތުރުން ޕްރިމިއަމް ކްލާސް ހިމެނޭނެކަމަށް މޯލްޑިވިއަނުން ވަނީ ވިދާޅުވެފައެވެ.