މިއަހަރުގެ އިންޓަރ ސްކޫލް ހޭންޑްބޯލް މުބާރާތަކީ މިހާތަނަށް ބޭއްވި އެންމެ ކާމިޔާބު ހަރަކާތްކަމަށް ހޭންޑްބޯލް މޯލްޑިވްސްގެ ރައީސް އަހުމަދު މުޖުތަބާ ވިދާޅުވެއްޖެއެވެ.
ސުކޫލްތަކަށް އަމާޒުކޮށްގެން ހޭންޑްބޯލް މޯލްޑިވްސް ވަނީ ފެސްޓިވަލެއްގެ އިތުރުން 15 އަހަރުން ދަށާއި 17 އަހަރުން ދަށުގެ އިންޓަރ ސުކޫލު ހޭންޑްބޯލް މުބާރާތް ބާއްވާފައެވެ. އަދި އަންނަ އަހަރު ކުރީކޮޅު 19 އަހަރުން ދަށުގެ އިންޓަރ ސުކޫލު މުބާރާތް ބޭއްވުމަށް ހޭންޑްބޯލް މޯލްޑިވްސް ދަނީ ތައްޔާރުވަމުންނެވެ.
މިއަހަރު ނިމިގެންދިޔަ އިންޓަރ ސްކޫލް މުބާރާތްތަކުގެ ކާމިޔާބީގެ ވާހަކަދައްކަވަމުން މުޖުތަބާ ވިދާޅުވީ މިއަހަރު ފުރަތަމަ ބޭއްވިގެންދިޔައީ 12 އަހަރުން ދަށުގެ ކުދިންނަށް އަމާޒުކޮށްގެން ބޭއްވި ހޭންޑްބޯލް ފެސްޓިވަލެއް ކަމަށާއި އެ ހަރަކާތަށްވެސް ބޮޑު ތަރުހީބެއް ލިބިގެންދިޔަ ކަމަށެވެ.
ރާއްޖޭގެ އެކި ކަންކޮޅުތަކުން ފެސްޓިވަލުގައި ބައިވެރިވި ކަމަށާއި އެގޮތުން މާލެއާ ދުރު ރަށްތަކުން ފެސްޓިވަލުގައި ބައިވެރިވުމަކީ ލިބިގެންދިޔަ ވަރަށް ބޮޑު ކާމިޔާބެއްކަން މުޖުތަބާ ވަނީ ފާހަގަކޮށްފައެވެ.
"ފެސްޓިވަލް އަޅުގަނޑުމެން ހާއްސަކުރީ ކުޑަކުދިންނަށް، އެގޮތުން ވައިޑީޕީ ގެންގުޅޭ ރަށްރަށް އެބަހުރި، ދެން މި ފެސްޓިވަލުން އެ ކުދިން ގޮވައިގެން ހުނަރު ދައްކާލުމުގެ ފުރުސަތު ލިބިގެންދިޔަ،" މުޖޭ ވިދާޅުވިއެވެ.
ހޭންޑްބޯލް މޯލްޑިވްސްއިން ބޭއްވި ފެސްޓިވަލުގެ އަންހެން އެއްވަނަ ހޯދީ އއ.އުކުޅަސް ސުކޫލެވެ. އަދި ފިރިހެން އެއްވަނަ ސްކޫލުކަށް ހޮވުނީ ޖަމާލުއްދީން ސުކޫލެވެ.
މި ފެސްޓިވަލުގެ ސަބަބުން ރާއްޖޭގައި އެކެޑަމީތަކާއި، އަތޮޅުތެރޭގައި ހޭންޑްބޯލް ކުރިއަރުވަން މަސައްކަތް ކުރަމުންދާ ފަރާތްތަކަށް ބޮޑު ހިތްވަރެއް ލިބިގެންދިޔަ ކަމަށް މުޖުތަބާ ވިދާޅުވިއެވެ.