ހައުސިން ޑިވެލޮޕްމަންޓް ކޯޕަރޭޝަން، އެޗްޑީސީގެ މެނޭޖިން ޑިރެކްޓަރުގެ މަޤާމަށް ކުރީގެ ކޮންސްޓްރަކްޝަން މިނިސްޓަރ މުޙައްމަދު މަޢުރޫފް ޖަމީލް ޢައްޔަންކުރައްވައިފިއެވެ. މަމައުރޫފް ޖަމީލަކީ ހުޅުމާލެ ތަރައްޤީކުރުމުގެ މަސައްކަތުގައި އިސްކޮށްއުޅުއްވި ބޭފުޅެކެވެ.
މަޢުރޫފް ޖަމީލް ވަނީ ހުޅުމާލޭ ތަރައްޤީކުރަން ފެށިދުވަސްވަރު، އެކަމަށް އުފެއްދެވި ހުޅުމާލެ ޑިވެލޮޕްމަންޓް ޔުނިޓުގެ އެންމެ އިސްވެރިޔާގެ ހައިސިއްޔަތުން ހުޅުމާލޭގެ ތަރައްްޤީއަށް މުހިންމު މަސައްކަތްތަކެއް ކުރައްވާފައެވެ. އަދި ހައުސިން ޑިވެލޮޕްމަންޓް ކޯޕަރޭޝަން، އެޗްޑީސީ އުފެދި، އެކުންފުނީގެ ސީއީއޯގެ ހައިސއްޔަތުންވެސް ހުޅުމާލޭގެ ތަރައްޤީއަށް އިސްކަންދެއްވައިގެން ގިނަގުނަ މަސައްކަތްތަކެއް މައުރޫފް ޖަމީލް ކުރެއްވިއެވެ. އޭގެފަހުން ކުރީގެ ރައީސް މައުމޫން ޢަބްދުލްޤައްޔޫމްގެ ސަރުކާރުގައި ކޮންސްޓްރަކްޝަން މިނިސްޓަރުގެ ހައިސިއްޔަތުންވެސް ހުޅުމާލޭގެ ތަރައްޤީއަށް އެމަނިކުފާނު ވަނީ މުހިންމު ގިނަ ޚިދުމަތްތަކެއް ކޮށްދެއްވާފައެވެ.
އެޗްޑީސީގެ މެނޭޖިންގ ޑިރެކްޓަރުގެ މަޤާމަށް މަޢުރޫފް އައްޔަންކުރައްވާފައިމިވަނީ ކުރިން އެމަޤާމުގައި ހުންނެވި އިބްރާހީމް ފަޒުލް ރަޝީދު ރޭ އިސްތިއުފާދެއްވުމާއި ގުޅިގެންނެވެ. އޭނާ އެ މަޤާމުން އިސްތިއުފާދެއްވީ ބިންވެރިޔާ ސްކީމްގެ ދަށުން ގޯތި ނުލިބޭ ބަޔަކަށް ގޯތިތަކެއް ދީފައިވާކަމަށް ތުހުމަތުކުރެވޭ މައްސަލަ ފުލުހުންނާއި ކަމާގުޅުންހުރި ފަރާތްތަކުން ތަހުގީގްކުރަމުންދާތީ، އެ ތަހުގީގަށް ފުރުޞަތު ދިނުމަށެވެ. ފަޒުލް ވަނީ އޭނާގެ މައްޗަށް ކުރެވޭ ތުހުމަތުތަކަށް އިންކާރުކުރައްވާފައެވެ.
ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑު، ޕީސީބީން ވިދާޅުވީ، އެޗްޑީސީގެ މެނޭޖިންގ ޑިރެކްޓަރުގެ މަޤާމުގައި ހުންނެވި އިބްރާހީމް ފަޒުލް ރަޝީދުގެ އިސްތިއުފާ ޤަބޫލުކުރައްވާފައިވާކަމަށެވެ. އަދި އެޗްޑީސީގެ މެނޭޖިންގ ޑިރެކްޓަރު ކަމުގެ މަޤާމަށް މ.ދޫރެސް މުޙައްމަދު މަޢުރޫފް ޖަމީލް ހަމަޖައްސަވާފައިވާކަމަށް ޕީސީބީން ވިދާޅުވިއެވެ.
ހުޅުމާލޭގެ ފުރަތަމަ ފިޔަވަހީގެ ތަރައްޤީގައި މިހާރު ފެންނަ ކުރިއެރުންތަކެއް އެންމެ އިސް އެއް ބޭފުޅަކީ ކުރީގެ ކޮންސްޓްރަކްޝަން މިނިސްޓަރ މުޙައްމަދު މައުރޫފް ޖަމީލެވެ.