އިނގިރޭސި ޕްރިމިއާ ލީގުގައި ރޭ އެސްޓަން ވިލާ އާއި ދެކޮޅަށް މެންޗެސްޓަރ ސިޓީ ކުޅުނު މެޗުން 2-1 ގެ ނަތީޖާއަކުން ސިޓީ ބަލިވެއްޖެ އެވެ.
ސިޓީގެ މައްޗަށް އެސްޓަން ވިލާއިން ހޯދި ކާމިޔާބީ އާއިއެކު އެ ޓީމުން ލީގުގައި ކުޅުނު 17 މެޗުން ލިބިފައިވާ 28 ޕޮއިންޓާއެކު ވަނީ ތާވަލުގެ ފަސްވަނަ މަގާމް ލިބިފަ އެވެ. ސިޓީ އަށް 17 މެޗުން ލިބިފައިވާ 27 ޕޮއިންޓާއެކު މިހާރުވަނީ 6 ވަނަ އަށް ވެއްޓިފަ އެވެ.
މި މެޗުން ބަލިވުމާއެކު ޕްރިމިއާ ލީގުގެ އެންމެ ފަހުގެ ޗެމްޕިއަން, މެންޗެސްޓަރ ސިޓީ ހުރިހާ މުބާރާތެއްގައި އެންމެ ފަހުން ކުޅުނު 12 މެޗުގެ ތެރެއިން 9 މެޗުން ވަނީ ބަލިވެފަ އެވެ. އަދި ރަށުން ބޭރުގައި ކުޅުނު 8 މެޗުންވެސް އެ ޓީމު ވަނީ ބަލިވެފަ އެވެ.
މިދިޔަ ހަފްތާގައި މެންޗެސްޓަރ ޔުނައިޓެޑް އަތުން ސިޓީ ބަލިވި މެޗަށް ނިކުތް ޓީމަށް ކޯޗު ޕެޕް ގަޑިއޯލާ ވަނީ ހަ ބަދަލެއް ގެނެސްފަ އެވެ. ނަމަވެސް ސިޓީއަށް މި މެޗުގައިވެސް އެދެވޭ ނަތީޖާއެއް ހޯދޭ ގޮތް ވަނީ ނުވެފަ އެވެ.
މި މެޗުގެ ފުރަތަމަ މިނިޓުގައިވެސް ސިޓީގެ ޑިފެންޑަރ ގްވަޑިއޯލް އަށް ހެދުނު ގޯހެއްގެ ފައިދާ ނަގާ އެސްޓަން ވިލާގެ ޑުރާން އަށް ވަނީ ލަނޑު ޖަހަން ފުރުސަތު ލިބި ބޭކާރުވެފަ އެވެ. އަދި ސިޓީގެ ފިލް ފޯޑެން ފޮނުވާލި ނުރައްކާތެރި ހަމަލާ ވިލާގެ ކީޕަރު އެމިލިއާނޯ މާޓިނޭޒް ވަނީ ދިފާއުކޮށްފަ އެވެ.
މި މެޗުގެ 16 ވަނަ މިނިޓުގައި ޖޯން ޑުރާން ވަނީ ލަނޑެއް ޖަހާ އެސްޓަން ވިލާއަށް ކުރި ހޯދަދީފަ އެވެ. އަދި ދެވަނަ ހާފުގެ ކުޅުން ފެށުނުތާ ގިނައިރުތަކެއް ނުވަނީސް މޯގަން ރޮޖާސް ވަނީ އިތުރު ލަނޑެއް ޖަހާ ދެ ޓީމުގެ ދެމެދުގައިވާ ފަރަގު ބޮޑުކޮށްފަ އެވެ.
މެންޗެސްޓަރ ސިޓީން މި މެޗުގައި ޖަހާފައިވާ ހަމައެކަނި ލަނޑު މެޗުގެ އިތުރު ވަގުތުގައި އެ ޓީމަށް ކާމިޔާބު ކޮށްދީފައިވަނީ ފިލް ފޯޑެން އެވެ.