މުނިސިޕަލް ޚިދުމަތްތަކަށް ކައުންސިލުން ގެންނަ ސާމާނުން ޑިއުޓީ މަޢާފުކޮށްދޭނަން: ވަޒީރު އާދަމް ޝަރީފް

ރައްޔިތުންނަށް ދޭންޖެހޭ މުނިސިޕަލް ޚިދުމަތްތައް ދިނުމުގައި ކައުންސިލްތަކުން ގެންނަ ސާމާނުން ޑިޔުޓީ މަޢާފުކޮށްދޭނެކަމަށް ސިޓީތަކާއި އިދާރީ ދާއިރާތައް ހިންގުމާއި ޢާންމު މަސައްކަތްތަކާ ބެހޭ ވަޒީރު އާދަމް ޝަރީފް ޢުމަރު ވިދާޅުވެއްޖެއެވެ.

ޕީއެސްއެމް ނިއުސްގެ ރާއްޖެ މިއަދު ޕްރޮގުރާމްގައި ވާހަކަފުޅުދައްކަވަމުން ސިޓީތަކާއި އިދާރީ ދާއިރާތައް ހިންގުމާއި ޢާންމު މަސައްކަތްތަކާބެހޭ ވަޒީރު އާދަމް ޝަރީފް ޢުމަރު ވިދާޅުވީ ލާމަރުކަޒީ ނިޒާމު ހަރުދަނާކުރުމުގެ ސިޔާސަތުގެ ދަށުން ސަރުކާރުން އެންމެ ބޮޑު އިސްކަމެއްދެނީ މާލީ ގޮތުން ކައުންސިލްތައް ބާރުވެރިކުރުވުމަށް ކަމަށެވެ. އެގޮތުން ކައުންސިލްތަކުގެ ޚަރަދު ކުޑަކުރުމުގެ ގޮތުން މުނިސިޕަލް ޚިދުމަތްތައް ދިނުމަށް ކައުންސިލްތަކުން ގެންނަ އާލާތްތަކާއި މެޝިނަރީތަކުން ނަގާ ޑިއުޓީ މަޢާފުކުރުމަށް މަސައްކަތްކުރައްވާނެކަމަށް ވަޒީރު ވިދާޅުވިއެވެ.

"މިސާލަކަށް ގދ. ވާދޫން އެބަގެނޭ ހައިމާކެއް. އެ ގެނައިމަ ޑިއުޓީ މަޢާފުކުރުމުގެ މަސައްކަތް ވުޒާރާއިން ކުރަމުން ގެންދާނެ. އެހެން ކައުންސިލްތަކުންވެސް އެދުނީމަ މިގޮތަށް މުނިސިޕަލް ޚިދުމަތްތަކަށް ގެންނަ ތަކެތިން މަޢާފުކޮށްދޭނަން." އާދަމް ޝަރީފް ވިދާޅުވިއެވެ.

ވަޒީރު ވިދާޅުވީ ކައުންސިލްތަކަށް މާލީ ބާރުވެރިކަން ހޯދައިދީ، ޚިދުމަތްތައް ރަނގަޅުވެއްޖެނަމަ އޭގެ ފައިދާ ރައްޔިތުންނަށްކުރާނެ ކަމަށެވެ. އަދި މީގެ ސަބަބުން ލާމަރުކަޒީ ނިޒާމު ފައްކާވެ ހަރުދަނާވާނެކަން ވަޒީރު ފާހަގަކުރެއްވިއެވެ.

ޑިއުޓީ މަޢާފުކޮށްދިނުމުގެ އިތުރުން ރަށްރަށުގައި ހިންގާ ގެސްޓް ހައުސްފަދަ ތަންތަނުން ނަގާ ޓެކްސްއިން މިންވަރެއް ކައުންސިލްތަކަށް ދިނުމަށްވެސް މަސައްކަތްކުރައްވަމުން ގެންދަވާކަމަށް ވަޒީރު ވިދާޅުވިއެވެ. އެގޮތުން މިކަން ޙާސިލްކުރުމަށް ޤާނޫނަށް ގެންނަންޖެހޭ ބަދަލު ގެނައުމުގެ މަސައްކަތް ބަންޑާރަނައިބުގެ އޮފީހަށް ހުށައަޅައިގެން ކުރައްވާކަމަށް ވަޒީރު ވިދާޅުވިއެވެ.

ރާއްޖޭގެ ލާމަރުކަޒީ ނިޒާމު ހަރުދަނާކޮށް، ކައުންސިލްތައް މާލީ ގޮތުން ބާރުވެރިކުރުމަށް ސަރުކާރުން ދަނީ ގިނަ މަސައްކަތްތަކެއް ކުރައްވަމުންނެވެ. އެގޮތުން ކައުންސިލްތަކުގެ އިޚްތިޞާޞުން ބޭރުގައިވާ ފަޅު ރަށްރަށް އިޤުތިޞާދީ މަސައްކަތްތައްކުރުމަށް ކައުންސިލްތަކަށް ދޫކުރުމަށް ސަރުކާރުން ވަނީ ނިންމަވާފައެވެ.