ފުޓުބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން އެކުލަވާލި ފައިނަލް ކަލަންޑަރުގައި ރާއްޖޭގެ ފުޓުބޯޅަ ސީޒަން ފެށުން ފެބުރުއަރީ 14، އަދި ލީގު ފެށުން ރޯދައިގެ ފަހަށް ފަސްކޮށްފިއެވެ.
އެފްއޭއެމުން އެންމެ ފުރަތަމަ އެކުލަވާލި ޑްރާފްޑް ކަލަންޑަރުގައި ސީޒަން ފެށުމަށް ތައްޔާރުވީ އަންނަ މަހުގެ 24 ގައެވެ. ނަމަވެސް މި ކަލަންޑަރަށް ބަދަލުތައް ގެނައީ ކުލަބުތަކުގެ ހިޔާލާ މަޝްވަރާ ހޯދުމަށްފަހު އެވެ.
ގާތްގަނޑަކަށް އަހަރެއްހާ ދުވަހު ފުރަތަމަ ޑިވިޝަނުގެ ފުޓުބޯޅަ ނުކުޅެ ހުރުމަށްފަހު ސީޒަން ހުޅުވާ މެޗު ނުވަތަ ޗެރިޓީ ޝީލްޑް މެޗު ކުޅުމަށް މިހާރު ތާވަލުކޮށްފައިވަނީ އަންނަ ފެބްރުއަރީ 14 ވަނަ ދުވަހުގެ ރޭގަނޑުއެވެ.
މީގެއިތުރުން އެފްއޭއެމުން ފައިނަލްކުރި ކަލަންޑަރުގައި ރާއްޖޭގެ ލީގު ފެށުމަށް މިހާރު ތާވަލުކޮށްފައިވަނީ އޭޕްރީލް 8 ގައެވެ. އެއީ ރޯދަމަހުގެ ފަހަށެވެ. އެހެންކަމުން ރޯދައިގެ ކުރިން ކުރިޔަށްދާނީ ސީޒަން ހުޅުވާ މެޗާއި ޕްރެޒިޑެންޓްސް ކަޕެވެ. ޕްރެޒިޑެންޓްސް ކަޕް ފެށުމަށް ތާވަލުކޮށްފައިވަނީ ފެބްރުއަރީ 17 ގައެވެ.
ފައިނަލްކުރި ކަލަންޑަރުގައި ދެން ހިމެނޭ މުބާރާތްތަކުގެ ތެރެއިން ތިންވަނަ ޑިވިޝަން ފުޓުބޯޅަ މުބާރާތް ފެށުމަށް ތާވަލުކޮށްފައިވަނީ މެއި 31 ގައެވެ. އެއަށްފަހު އެފްއޭ ކަޕް ފުޓުބޯޅަ މުބާރާތް ޖުލައި 12 ގައި ފެށުމަށް ތާވަލުކޮށްފައިވާއިރު، ދެވަނަ ޑިވިޝަން ފުޓުބޯޅަ މުބާރާތް ފެށުމަށް ތާވަލުކޮށްފައިވަނީ ޖުލައި 18 ގައެވެ.
އެފްއޭއެމުގެ ހިންގުން ނޯމަލައިޒިން ކޮމިޓީއަކާ ހަވާލުކުރި ފަހުން އެ ކޮމިޓީން ދަނީ އެފްއޭއެމުގެ ހިންގުމުގައި ހުރި މައްސަލަތައް ދެނެގަނެ ފައިސާގެ މުއާމަލާތްތަކާއި ގުޅޭ މައްސަލަތައް ބަލަމުންނެވެ. ކުލަބުގެ ހާލަތު ވަރަށް ބޮޑަށް ގޯސްވެފައިވާއިރު، އެ ކޮމިޓީން ދަނީ ކަންކަން ހައްލުކުރުމަށް ސަރުކާރާއި އޭއެފްސީ އަދި ފީފާއާއެކު މަޝްވަރާތަކެއް ކުރަމުންނެވެ.