މާލޭގައި ފެން ބޮޑުވެ ވެލި ބަސްތާޖެހުމުގެ މަސައްކަތް ސިފައިން ފަށައިފި
-
ސިފައިން ދަނީ ފެން ހިންދުމުގެ މަސައްކަތްވެސް ކުރަމުން
-
މިދުވަސްވަރު ރާއްޖޭގެ އެކި ހިސާބުތަކަށް ދަނީ ބޯކޮށް ވާރޭވެހެމުން
ބޯކޮށް ވާރޭވެހި، މާލޭގެ މަގުތަކުގައި ފެން ބޮޑުވުމުގެ ސަބަބުން ވެލި ބަސްތާޖެހުމުގެ މަސައްކަތް ޤައުމީ ދިފާޢީ ބާރުން ފަށައިފިއެވެ.
ޤައުމީ ދިފާޢީ ބާރުން ވިދާޅުވީ ބޯކޮށް ވާރޭވެހި މާލޭގެ މަގުތަކުގައި ފެންބޮޑުވެ، ގޭބިސީތަކަށް ފެންވަންނަމުންދާތީ އެހީތެރިކަން ފޯރުކޮށްދިނުމުގެ މަސައްކަތް ފަށާފައިވާ ކަމަށެވެ. އެގޮތުން ގޭބިސީތަކަށް ފެން ނުވަންނާނެގޮތަށް ވެލިބަސްތާ ޖެހުމުގެ މަސައްކަތް ފަށާފައިވާކަމަށް ޤައުމީ ދިފާޢީ ބާރުން ވިދާޅުވިއެވެ.
ބޯކޮށް ވާރޭވެހި މާލޭގެ މަގުތަކުގައި ފެންބޮޑުވެ، ގޭބިސީތަކަށް ފެންވަންނަމުންދާތީ އެހީތެރިކަން ފޯރުކޮށްދިނުމުގެ ގޮތުން ވެލިބަސްތާ ޖެހުމުގައި އެމްއެންޑީއެފް މާލޭ އޭރިއާ ކޮމާންޑްގެ ސިފައިން ހަރަކާތްތެރިވާން ފަށައިފި. pic.twitter.com/fVytrNQgKS
— Maldives National Defence Force (@MNDF_Official) December 21, 2024
މޫސުމާބެހޭ ޤައުމީ އިދާރާއިން ހާމަކުރައްވާފައިވާ ގޮތުގައި ވޭތުވެދިޔަ 24 ގަޑިއިރު އެންމެ ގިނައިން ވާރޭވެހިފައިވަނީ މާލެއަށެވެ. ވެލިބަސްތާ ޖެހުމުގެ އިތުރުން ސިފައިންދަނީ ފެން ހިންދުމުގެ މަސައްކަތްވެސް ކުރަމުންނެވެ. އެގޮތުން މާލޭގެ 5 ސަރަހައްދެއްގައި 16 ޕަންޕު ބަހައްޓައިގެން ފެން ހިންދުމުގެ މަސައްކަތްކުރަމުން ދާކަމަށް ޤައުމީ ދިފާޢީ ބާރުން ވިދާޅުވެއެެވެ.
ރާއްޖެއާ ކައިރި ދެ ސަރަހައްދެއްގައި ކޮޅިގަނޑެއް އުފެދުމުގެ ސަބަބުން ރާއްޖޭގެ ހުރިހާ ހިސާބަކަށްވެސް ވަނީ މޫސުން ގޯސްވެފައެވެ. މުސުމާބެހޭ ޤައުމީ އިދާރާއިން ވިދާޅުވާ ގޮތުގައި ހުޅަނގު މޫސުން ނިމި، އިރުވައި މޫސުން ފަށަން ގާތްވެފައިވާތީ ދެ މޫސުން ބައްދަލުވާ ދުވަސްވަރު ކޮޅިގަނޑުތައް އުފެދުމުގެ ފުރުޞަތު ބޮޑެވެ.
އަދި މިހާރު އުފެދިފައިވާ ދެ ކޮޅިގަނޑާއެކު އަންނަ ހޯމަ ދުވަހާ ހިސާބަށް ރާއްޖޭގެ އެކި ހިސާބުތަކަށް މޫސުން ގޯސްވާނެކަމަށް މޫސުމާބެހޭ ޤައުމީ އިދާރާއިން ވިދާޅުވެއެވެ.