ޕާކިސްތާނުގެ ދުރު-ރާސްތާ މިސައިލް ޕުރޮގުރާމާ ގުޅުވައި އެމެރިކާއިން އެ ޤައުމާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތައް އިތުރަށް ހަރުކަށިކޮށްފިއެވެ. މި ކަން ހާމަ ކުރަމުން އެމެރިކާގެ ޚާރިޖީ ވުޒާރާއިން ބުނީ، ޕާކިސްތާނުން ހިންގަމުންދާ ދުރު-ރާސްތާ ބެލިސްޓިކް މިސައިލް ޕުރޮގުރާމާ ގުޅިގެން އެ ޤައުމުގެ ދައުލަތުގެ އިދާރާއެއްގެ އިތުރުން ބައެއް އަމިއްލަ ކުންފުނިތަކާ ދެކޮޅަށް ދަތި ކުރުމުގެ އިތުރު ފިޔަވަޅުތަކެއް އަޅާފައިވާނެ ކަމުގައެވެ.
ނިއުކްލިޔަރ ބާރެއް ކަމުގައިވާ ޕާކިސްތާނާ ދެކޮޅަށް އަޅާފައިވާ ފިޔަވަޅުތައް އިތުރަށް ހަރުކަށި ކޮށްފައިވާ ކަން އިޢުލާނު ކުރައްވާފައި ވަނީ އެމެރިކާގެ ޚާރިޖީ ވުޒާރާގެ ތަރުޖަމާނު މެތިޔު މިލަރއެވެ. އެމެރިކާއިން މި ފަހަރު ފިޔަވަޅުތައް އަޅާފައިވާ މުއައްސަސާތަކުގެ ތެރޭގައި ޕާކިސްތާނުގެ ދައުލަތުގެ ދިފާޢީ އިދާރާ، ނޭޝަނަލް ޑިވެލޮޕްމެންޓް ކޮމްޕްލެކްސް (އެންޑީސީ) ހިމެނެއެވެ. އެ ޤައުމުގެ ދުރު-ރާސްތާ މިސައިލް ޕުރޮގުރާމުގެ ބެލެނިވެރި ފަރާތަކީ އެ އިދާރާއެވެ.
މިލަރ ވިދާޅުވީ، އެންޑީސީގެ އިތުރުން ޕާކިސްތާނުގެ އަމިއްލަ ތިން ކުންފުންޏަކާ ދެކޮޅަށް ދަތި ކުރުމުގެ ފިޔަވަޅުތައް އަޅާފައިވާނެ ކަމުގައެވެ. އަދި، އެ ފިޔަވަޅުތައް އަޅާފައި ވަނީ ރައީސް ޖޯ ބައިޑަންގެ އެންގެވުމެއްގެ ދަށުން، ފަނާކުރަނިވި ހަތިޔާރު އުފެއްދުން ހުއްޓުވުމަށް އަޅަމުންދާ ފިޔަވަޅުތަކުގެ ދަށުން ކަމުގައެވެ. މި ނިންމުމާ އެކު، ޕާކިސްތާނުގެ އެންޑީސީއާއި ތިން ކުންފުންޏެއްގެ މުދަލާއި ފައިސާ ހިފެހެއްޓުމަށް ވެސް އެމެރިކާއިން ވަނީ ނިންމާފައެވެ. އަދި، ފިޔަވަޅު އަޅާފައިވާ އިދާރާއާއި ކުންފުނިތަކާ ދެމެދު ވިޔަފާރީގެ މުއާމަލާތްތައް ކުރުން އެމެރިކާގެ ރައްޔިތުންނާއި ކުންފުނިތަކަށް މަނާކޮށްފައެވެ.
ޕާކިސްތާނުން ވަނީ އެމެރިކާގެ މި ނިންމުމާ މެދު ހިތްހަމަނުޖެހުން ފާޅުކޮށްފައެވެ. ޕާކިސްތާނުގެ ޚާރިޖީ ވުޒާރާއިން ބުނީ، އެމެރިކާގެ ނިންމުމަކީ ވަކި ކޮޅަކަށް ބުރަވެފައިވާ ހިތާމަވެރި ނިންމުމެއް ކަމުގައެވެ. އަދި، އެ ނިންމުމާ އެކު ސަރަޙައްދީ ހަމަޖެހުމާއި ސުލްޙައަށް ނުރައްކާވާނެ ކަމަށް ޤަބޫލު ކުރާ ކަމުގައެވެ. މިއީ، ޕާކިސްތާނާ ވާދަވެރި އިންޑިޔާގެ މިސައިލް ޕުރޮގުރާމަށް އަމާޒުކޮށް ދީފައިވާ ބަހުގެ ޙަމަލާއެއްގެ ގޮތުގައި މަސްރަޙު ދިރާސާ ކުރާ ފަރާތްތަކުން ޤަބޫލު ކުރެއެވެ.
އެމެރިކާގެ ޚާރިޖީ ވުޒާރާއިން ބުނީ، ޕާކިސްތާނުން ހިންގަމުންދާ ދުރު-ރާސްތާ މިސައިލް ޕުރޮގުރާމު އިތުރަށް ފުޅާ ކުރުމަށް ބޭނުންވާ ސާމާނާއި އާލާތްތައް ބޭރު ޤައުމުތަކުން ހޯދުމަށް އިސްލާމްއާބާދުން މަސައްކަތް ކުރަމުންދާ ކަމުގައެވެ. އަދި، މިސައިލްތަކުގެ އަޖުބަ ބެލުމަށް ޓެސްޓުތައް ހެދުމަށް ބޭނުންވާ ސާމާނު ޖަމާ ކުރަމުންދާ ކަމުގައެވެ.
އެމެރިކާގެ ޚާރިޖީ ވުޒާރާއިން ޤަބޫލު ކުރާ ގޮތުގައި، ޕާކިސްތާނުން އުފައްދާ 'ޝާހީން' މަރުކާގެ ބެލިސްޓިކް މިސައިލަކީ އެންޑީސީގެ ބެލުމުގެ ދަށުން އުފައްދަމުންދާ ދުރު-ރާސްތާ ހަތިޔާރެކެވެ. ނިއުކްލިޔަރ ހަތިޔާރާ ބެހޭ ދިރާސާ ކުރާ 'އެޓޮމިކް ސައިންޓިސްޓްސް' ޖަމުޢިއްޔާއިން ބުނީ، ޝާހީން މަރުކާގެ މިސައިލަކީ ނިއުކްލިޔަރ ބޮން އުފުލުމުގެ ޤާބިލުކަން ލިބިފައިވާ ނުރައްކާތެރި ހަތިޔާރެއް ކަމުގައެވެ.
ޕާކިސްތާނުން ފުރަތަމަ ފަހަރަށް ނިއުކްލިޔަރ ހަތިޔާރެއްގެ އަޖުމަ ބަލާފައި ވަނީ 1998ވަނަ އަހަރުއެވެ. އެއީ، ނިއުކްލިޔަރ ހަތިޔާރު އުފައްދައި، އަޖުމަ ބަލާފައިވާ ހަތްވަނަ ޤައުމެވެ. 'އެޓޮމިކް ސައިންޓިސްޓްސް' ޖަމުޢިއްޔާއިން ބުނީ، ޕާކިސްތާނުން އުފައްދައި ސްޓޮކު ކޮށްފައިވާ ނިއުކްލިޔަރ ބޮމުގެ އަދަދު 170 އަރާނެ ކަމަށް ބެލެވޭ ކަމުގައެވެ.
ނިއުކްލިޔަރ ހަތިޔާރު އުފައްދައި ސްޓޮކު ކުރުން މަނާ ކުރާ ނަން-ޕްލޮރިފެރޭޝަން މުޢާހަދާގައި ބައިވެރިވުމަށް އިސްލާމްއާބާދުން ދަނީ ދެކޮޅު ހަދަމުންނެވެ. އެއީ، ނިއުކްލިޔަރ ހަތިޔާރުގެ ނުރައްކަލުން ދުނިޔެ ސަލާމަތް ކުރުމަށް އެކުލަވައިލާފައިވާ މުޢާހަދާއެކެވެ.
އެންޑީސީގެ އިތުރުން އެމެރިކާއިން ދަތި ކުރުމުގެ ފިޔަވަޅުތައް އަޅާފައިވާ ޕާކިސްތާނުގެ ކުންފުނިތަކުގެ ތެރޭގައި އެފިލިއޭޓްސް އިންޓަރނޭޝަނަލް، އަޚްތަރު އެންޑް ސަންސް ޕްރައިވެޓް ލިމިޓެޑް އަދި ރޮކްސައިޑް އެންޓަރޕްރައިސަސް ހިމެނެއެވެ. އެއީ، އެންޑީސީއާ ގުޅިގެން ދުރު-ރާސްތާ ހަތިޔާރު އުފައްދަން ބޭނުންވާ ސާމާނާއި އާލާތްތައް ގަތުމުގައި އެހީތެރިކަން ފޯރުކޮށްދެމުންދާ ކުންފުނިތަކެއް ކަމުގައި އެމެރިކާއިން ތުހުމަތު ކުރެއެވެ.