އިންޑިއާގެ ކްރިކެޓް ކުޅުންތެރިޔާ ރަވީޗަންދްރަން އެޝްވިން، ގައުމީ ޓީމަށް ކްރިކެޓް ކުޅުން ހުއްޓާލިކަން އިއްޔެ އިއުލާންކޮށްފިއެވެ.
އޭނާ ކްރިކެޓް ކުޅުން ހުއްޓާލިކަން އިއުލާން ކޮށްފައިވަނީ އޮސްޓްރޭލިއާ އާއި ދެކޮޅަށް ކުޅުނު ތިންވަނަ ޓެސްޓް މެޗަށް ފަހު އޮސްޓްރޭލިއާގެ ބްރިސްބޭންގަ އެވެ.
މަޝްހޫރު ބޯލަރ އެޝްވިން ކުޅުން ހުއްޓާލިއިރު އޭނާ ވަނީ 106 ޓެސްޓް މެޗުގައި 537 ވިކެޓް ނަގާފަ އެވެ. މިއީ ދެވަނައަށް އެންމެ ގިނަ ވިކެޓް ނަގާފައިވާ އިންޑިޔާގެ ކުޅުންތެރިޔާ އެވެ. އިންޑިޔާއިން އެންމެ ގިނަ ވިކެޓް ނަގާފައިވަނީ އަނިލް ކުމްބްލޭ އެވެ. އޭނާ ވަނީ 619 ވިކެޓް ނަގާފަ އެވެ.
އުމުރުން 38 އަހަރުގެ އެޝްވިން ވަނީ އެއް ދުވަހުގެ 116 މެޗުގެ އިތުރުން 65 ޓްވެންޓީ ޓްވެންޓީ މެޗާއިއެކު ޖުމްލަ 765 ވިކެޓް ނަގާފަ އެވެ. މީގެ އިތުރުން އޭނާ ވަނީ ހަ ސެންޗަރީ ހަދާފަ އެވެ.
ކުޅުން ހުއްޓާލިކަން އިއުލާން ކުރަމުން އެޝްވިން ބުނެފައިވަނީ މިއީ އިންޑިޔާގެ ގައުމީ ޓީމުން އޭނާ ފެންނާނެ ފަހު މެޗު ކަމަށާއި ކުރިއަށް އޮތް ތަނުގައި އަދި ކްލަބް ލެވެލްގައި ފެނިގެންދާނެ ކަމަށެވެ.