ފުޓްބޯޅައިގެ ފޯރި އަލުން ގަދަކުރުމުގެ އަމާޒުގައި މުޅި ރާއްޖެއަށް ހުޅުވާލައިގެން ބާއްވާ ނައިންޓީ ޕްލަސް ގޯލްޑް ކަޕް 2024 ގެ ކުއާޓާ ފައިނަލް މެޗުގައި ޕެނަލްޓީ ޖަހައިގެން ކ. ގުރައިދޫ ބަލިކުރުމަށްފަހު، ސެމީ ފައިނަލުގެ ޖާގައެއް މާލެ ސިޓީން ހޯދައިފިއެވެ.
ގައުމީ ފުޓްބޯޅަ ދަނޑުގައި މިރޭ ކުޅުނު މެޗުގެ ފުރިހަމަ ވަގުތު ހަމަވިއިރު ދެ ޓީމު ވަނީ 1-1 ގެ ނަތީޖާއަކުން އެއްވަރުވެފައެވެ. އެއާއެކު ނަތީޖާ ނެރުމަށް ޖެހި ޕެނަލްޓީ ޝޫޓްއައުޓްގައި މާލެ ސިޓީން ކުރި ހޯދީ 4-2 ގެ ނަތީޖާއަކުންނެވެ.
މިރޭ ކުޅުނު މެޗުގައި ދެ ޓީމުގެ ފަރާތުން ހަމަހަމަ ކުޅުމެއް ފެނިގެންދިޔައިރު، މި މެޗުގައި އެންމެ ފުރަތަމަ ލަނޑު ޖަހައި ލީޑު ނެގީ ގުރައިދޫންނެވެ. މެޗުގެ 23 ވަނަ މިނެޓުގައި މި ލަނޑު ކާމިޔާބުކޮށްދިނީ ބިދޭސީ ފޯވާޑް އަޙްމަދު އިބްރާހީމެވެ. އެކަމަކު ދެވަނަ ހާފު ފަށައިގެން ތިންވަނަ މިނެޓުގައި މާލެ ސިޓީން ވަނީ ނަތީޖާ އެއްވަރުކޮށްފައެވެ. މި ލަނޑަކީ ގުރައިދޫގެ ޑިފެންޑަރު އަޙްމަދު ނޫމާން އަތުން ބައިކޮޅަށް ވަން ލަނޑެކެވެ.
މި މެޗުގެ ފުރިހަމަ ވަގުތު ހަމަވިއިރު ދެ ޓީމު އެއްވަރުވެފައި އޮތުމާއެކު، ނަތީޖާ ނެރުމަށް ޕެނަލްޓީ ޖެހިއިރު، މާލެ ސިޓީން ވަނީ އެ ޓީމުން ފޮނުވާލި ފަސް ޕެނަލްޓީގެ ތެރެއިން ހަތަރު ޕެނަލްޓީ ކާމިޔާބުކޮށްފައެވެ. އެގޮތުން އެ ޓީމުގެ ޚަލީލް ގަމާލް އާއި، އަހުނަފް މުޙައްމަދު ތަސްނީމް އާއި، އިސްމާޢީލް ވަޖީހް އަދި ރިލްވާން ވަހީދު (ރިލޭ) ޕެނަލްޓީތައް ކާމިޔާބުކުރިއިރު، ކެޕްޓަން ހުސައިން ޝުއައިބް ފޮނުވާލި ޕެނަލްޓީ ގުރައިދޫގެ ގޯލްކީޕަރު އަޙްމަދު ސަމީރު ވަނީ ދިފާއުކޮށްފައެވެ.
މި ޕެނަލްޓީ ޝޫޓްއައުޓްގައި ގުރައިދޫން ފޮނުވާލި ހަތަރު ޕެނަލްޓީގެ ތެރެއިން އެ ޓީމަށް ކާމިޔާބުކުރެވުނީ ދެ ޕެނަލްޓީއެވެ. އެގޮތުން އެ ޓީމުގެ އަބްދުﷲ ޝަޔާމް އާއި، އަޙްމަދު ޝުއޫން ޕެނަލްޓީތައް ކާމިޔާބުކޮށްދިން ނަމަވެސް، މުޙައްމަދު ނާއިމް އާއި ބިދޭސީ ފޯވާޑް މޯޒް ގަބެރް ފޮނުވާލި ޕެނަލްޓީތައް މާލެ ސިޓީގެ ކީޕަރު ތޮލާލް ހަސަން ވަނީ ހުއްޓުވާފައެވެ.
މި މޮޅާއެކު މުބާރާތުގެ ސެމީއަށް މާލެ ސިޓީ ދަތުރުކުރިއިރު، ސެމީގައި އެ ޓީމު ބައްދަލުކުރަން ޖެހޭނީ ބ. އޭދަފުއްޓާއެވެ.