ޕެސިފިކް ކަނޑުގެ ދެކުނުގައި އޮތް ވަނުވަޓޫއަށް ބާރުގަދަ ބިންހެލުމެއް އައިސް، މަރުވި މީހުންގެ އަދަދު 14އަށް އުފުލިއްޖެއެވެ. ރިކްޓަރ މިންގަނޑުން 7.4ގައި ރެކޯޑު ކުރެވިފައިވާ ބިންހެލުމާ ގުޅިގެން އެންމެ ބޮޑެތި ގެއްލުންތަކެއް ލިބިފައިވާ ސަރަޙައްދުތަކުގެ ތެރޭގައި ވެރިރަށް ޕޯޓް ވިލާ ހިމެނެއެވެ. ބިންހެލުމާ ގުޅިގެން އެ ރަށުގައި ގިނަ އަދަދެއްގެ އިމާރާތްތައް ވެއްޓިފައިވާއިރު، އިމާރާތްތަކުގެ ދަށުގައި ތާށިވެފައިވާ ކަމަށް ބެލެވޭ މީހުން ސަލާމަތް ކުރުމުގެ މަސައްކަތް ދަނީ ކުރަމުންނެވެ.
ބިންހެލުމުގައި މަރުވެފައިވާ ކަން ކަށަވަރު ކުރެވިފައިވާ މީހުންގެ އަދަދު 14އަށް އުފުލިފައިވާއިރު، އޭގެ ތެރޭގައި ޗައިނާގެ ދެ ރައްޔިތުން ހިމެނެއެވެ. ޕޯޓް ވިލާގެ ފުލުހުންގެ ކޮމިޝަނަރު ރޮބްސަން ޔެވްޚޯ ވިދާޅުވީ، ވެއްޓިފައިވާ އިމާރާތްތަކުގެ ދަށުގައި ތާށިވެފައިވާ ތިން މީހަކާ މުއާޞަލާތު ކުރަމުންދާ ކަމުގައެވެ. އަދި، އެ މީހުން ސަލާމަތް ކުރުމަށް މަސައްކަތް ކުރަމުންދާ ކަމަށާއި، ވެއްޓިފައިވާ އިމާރާތްތަކުގެ ދަށުގައި ތާށިވެފައިވާ އިތުރު ދެ މީހުން ސަލާމަތް ކުރެވިފައިވާ ކަމުގައެވެ.
"އަޅުގަނޑުމެންނަށް ޤަބޫލު ކުރެވޭ ގޮތުގައި ވެއްޓިފައިވާ އިމާރާތްތަކުގެ ދަށުގައި ތާށިވެފައިވާ މީހުންގެ އަދަދު އިތުރުވާނެ،" އޭނާ ވިދާޅުވިއެވެ.
އެތަކެއް ހާސް މީހުން ހާލުގައި ޖެހިފައި
ވަނުވަޓޫއަކީ 300,000އެއްހާ މީހުންގެ އާބާދީއެއް ދިރިއުޅޭ ކުޑަ ޤައުމެކެވެ. ބިންހެލުމާ ގުޅިގެން އެ ޤައުމުގެ ރަށްތަކަށް އަދިވެސް އިތުރު ލޮޅުންތައް އަރަމުންދާ ކަމުގައި އެ ޤައުމުގެ އިދާރާތަކުން ހާމަކުރިއެވެ. ޢާންމު ކޮށްފައިވާ ވީޑިޔޯތަކުން ފެންނަނީ، އިމާރާތްތައް ވެއްޓި، އެއްގަމު އުޅަނދުތައް ހަލާކުވެ، މަގުތައް ސުންނާފަތިވެ، އަދި ބިންގަނޑު ކެނޑިފައިވާ މަންޒަރުތަކެވެ.
ބިންހެލުމާ ގުޅިގެން ހާލުގައި ޖެހިފައިވާ މީހުންނަށް އެހީތެރިކަން ފޯރުކޮށްދިނުމަށް އެ ޤައުމުގެ ކަމާގުޅޭ އިދާރާތަކުން ދަނީ މަސައްކަތް ކުރަމުންނެވެ. ވަނުވަޓޫގެ ދައުލަތުގެ މީޑިޔާ، ވީބީޓީސީން ބުނީ، ކެއްކުމާއި އެއްގަމު އުޅަނދުފަހަރަށް ބޭނުންވާ ތެލުގެ އިތުރުން ސާފު ބޯފެން ހޯދުމަށް ހާލުގައި ޖެހިފައިވާ މީހުން މަސައްކަތް ކުރަމުންދާ ކަމުގައެވެ. އަދި، ބިންހެލުމާ ގުޅިގެން މުއާޞަލާތީ ޚިދުމަތްތަކާއި ކަރަންޓުގެ ޚިދުމަތް ވެސް މެދުކެނޑިފައިވާ ކަމުގައެވެ.
ވަނުވަޓޫގެ ކާރިސާތަކާ ބެހޭ އިދާރާއިން ބުނީ، މަރުވެފައިވާ 14 މީހުންގެ ތެރެއިން ހަތަރު މީހަކު މަރުވެފައި އެ މީހުން ދިރިއުޅެމުން ދިޔަ އިމާރާތް ވެއްޓުމާ ގުޅިގެން ކަމުގައެވެ. ފުލުހުން ބުނީ، ބިންހެލުމާ ގުޅިގެން އަނިޔާވި މީހުންގެ އަދަދު 200އަށް އުފުލިފައިވާ ކަމުގައެވެ. އަދި، ވަގުތީ ޞިއްޙީ މަރުކަޒުތައް ޤާއިމުކޮށް، އެ މީހުންނަށް ޞިއްޙީ ފަރުވާގެ ޚިދުމަތްތައް ފޯރުކޮށްދިނުމަށް މަސައްކަތް ކުރަމުންދާ ކަމުގައެވެ.
ފެން ތަޣައްޔަރުވުމާއި ބަލިތައް ޢާންމުވުން
ވަނުވަޓޫގައި ހުންނަ ކުޑަކުދިންނާ ބެހޭ އދގެ އިދާރާ، ޔުނިސެފްގެ އޮފީހުގެ ވެރިޔާ އިރިކް ދުރްޕެޔާ ވިދާޅުވީ، ހާލުގައި ޖެހިފައިވާ މީހުންނަށް މި ވަގުތު ކުރިމަތިވެފައިވާ އެންމެ ބޮޑު ކަންބޮޑުވުމަކީ ފެން ތަޣައްޔަރުވުން ކަމުގައެވެ. "ބޭރަށް ހިންގުން ފަދަ ބަލިތައް ޖެހިފައިވާ ކުޑަކުދިންގެ އަދަދު ވަނީ އުތުރުވެފައި، މާނައަކީ އެ ކުދިން ބުއިއަށް ތަޣައްޔަރުވެފައިވާ ފެން ބޭނުން ކުރަން ފަށާފައިވެޔޭ، ސަބަބަކީ ފެނުގެ ނިޒާމަށް ވަނީ ބޮޑެތި ގެއްލުންތަކެއް ލިބި ހަލާކުވެފައި،" އޭނާ ވިދާޅުވިއެވެ.
ވަނުވަޓޫގައި ހުންނަވާ ޗައިނާގެ ސަފީރު ވަނީ، ބިންހެލުމާ ގުޅިގެން މަރުވި މީހުންގެ ތެރޭގައި އެ ޤައުމުގެ ދެ ރައްޔިތަކު ހިމެނޭ ކަން ކަށަވަރު ކޮށްދެއްވާފައެވެ. އެއީ، ވަނުވަޓޫގައި ހުންނަ ފިހާރައެއްގައި މަސައްކަތް ކުރާ ދެ މީހުންނެވެ. ބިންހެލުމުގައި އެ ފިހާރަ ހުރި އިމާރާތް ވެއްޓިފައިވާއިރު، އެ އިމާރާތުގެ ދަށުގައި މަރުވެފައިވާ އިތުރު މީހުންގެ ހަށިތައް ތާށިވެފައިވާ ކަމަށް ބެލެވޭ ކަމުގައި އޮފިޝަލުން ބުންޏެވެ. ބިންހެލުމުގައި، ބޭރު ޤައުމުތަކުގެ އެމްބަސީތައް ހުންނަ އިމާރާތެއް ވެސް ވަނީ ވެއްޓިފައެވެ. އެއީ، އެމެރިކާ، އިނގިރޭސިވިލާތް، ފަރަންސޭސިވިލާތް އަދި ނިއު ޒިލެންޑުގެ އެމްބަސީ ހިންގަމުން ދިޔަ އިމާރާތެވެ.
އިތުރު ލޮޅުންތަކުގެ ނުރައްކާ
ބިންހެލުމަށް ފަހު ވަނުވަޓޫއަށް އިތުރު ލޮޅުންތައް އަރާފައިވާއިރު، އޭގެ ތެރެއިން އެއް ލޮޅުން ރެކޯޑު ކުރެވިފައި ވަނީ ރިކްޓަރ މިންގަނޑުން 6.1ގައެވެ. ވަނުވަޓޫގެ އިންތިޤާލީ ބޮޑުވަޒީރު ޝަރްލޯ ސަލްވާއީ ވިދާޅުވީ، ބިންހެލުމާ ގުޅިގެން އެ ޤައުމުގައި ކުއްލިހާލަތު އިޢުލާނު ކޮށްފައިވާ ކަމުގައެވެ. އަދި، އެންމެ ބޮޑެތި ގެއްލުންތައް ލިބިފައިވާ ސަރަޙައްދުތަކުގައި ހަތް ދުވަހުގެ މުއްދަތަކަށް ކަރފިޔު ހިންގަން ފަށާފައިވާ ކަމުގައެވެ. ބިންހެލުމާ ގުޅިގެން ހާލުގައި ޖެހުނު މީހުންނަށް އެހީތެރިކަން ފޯރުކޮށްދިނުމަށް ބޭރުގެ އެހީއަށް އެދިފައިވާނެ ކަން ވެސް އޭނާ ހާމަކުރެއްވިއެވެ.
އެމެރިކާގެ އެހީދޭ އިދާރާ، ޔޫއެސް އޭޖެންސީ ފޯ އިންޓަރނޭޝަނަލް އެއިޑުން ބުނީ ވަނުވަޓޫގައި ހާލުގައި ޖެހިފައިވާ މީހުންނަށް އެހީތެރިކަން ފޯރުކޮށްދިނުމަށާއި، އިމާރާތްތަކުގެ ދަށުގައި ތާށިވެފައިވާ ކަމަށް ބެލެވޭ މީހުން ސަލާމަތް ކުރުމުގެ މަސައްކަތުގައި އެހީތެރިކަން ފޯރުކޮށްދިނުމަށް ޓީމުތަކެއް ފޮނުވަން މަސައްކަތް ފަށާފައިވާ ކަމުގައެވެ. އޮސްޓްރޭލިޔާއިން ވެސް ވަނީ 64 މީހުންގެ ޓީމެއް އެ ޤައުމަށް ފޮނުވާފައެވެ. ފަރަންސޭސިވިލާތުން ވެސް ވަނީ އެހީތެރިކަން ފޯރުކޮށްދިނުމުގެ މަސައްކަތުގައި ބޭނުން ކުރުމަށް އަސްކަރީ ހެލިކޮޕްޓަރެއް ފޮނުވާފައެވެ.