ކޮމިޝަނަރ އޮފް ރިފޯމްގެ މަޤާމަށް އަސްމާ

ކޮމިޝަނަރ އޮފް ރިފޯމްގެ މަޤާމަށް އަސްމާ ކުރީގެ ޑެޕިއުޓީ ކޮމިޝަނަރ ޖެނެރަލް އޮފް ޓެކްސޭޝަން އަސްމާ ޝަފީޢު އައްޔަންކުރައްވައިފިއެވެ.

ކޮމިޝަނަރ އޮފް ރިފޯމްގެ މަޤާމަށް އަސްމާ ޝަފީޢު އައްޔަންކުރައްވާފައިވަނީ މާލީ ވުޒާރާއިންނެވެ.

ކޮމިޝަނަރ އޮފް ރިފޯމްގެ މަޤާމަށް ބޭފުޅަކު އައްޔަންކުރައްވާފައިވާއިރު ރީފޯމް އޮފީސް ޤާއިމްކުރުމުގެ މަޤްޞަދަކީ ދައުލަތު މާލީ ކަންކަން ހަރުދަނާ ކުރުމަށް، ޚަރަދުކުޑަކޮށް، އާމްދަނީ އިތުރުކުރުމަށް ސަރުކާރުން ގެންނަން ނިންމާފައިވާ އިސްލާހީ ބަދަލުތައް ތަންފީޒު ކުރުމުގެ މަސައްކަތް ކުރުމެވެ.

ކޮމިޝަނަރ އޮފް ރިފޯމްގެ މަސްއޫލިއްޔަތުތަކުގެ ތެރޭގައި އިސްލާޙީ ބަދަލުތަކުގެ އިސްތިރާޖުތައް އެކުލަވާލުމާއި، ސަރުކާރު ހިއްސާވާ ކުންފުނިތަކާއި އަދި ފިސްކަލް ރިފޯމުތައް ކުރިއަށްދާ ގޮތުގެ ރިޕޯޓުތައް އެކުލަވާލައި އެކަމާ ގުޅޭ ފްރޭމްވޯކްތައް އެކުލަވާ ރޭވުމުގެ މަސައްކަތް ހިމެނެއެވެ. ކޮމިޝަނަރ އޮފް ރިފޯމްގެ ޖަވާބުދާރީވާނީ މާލީ ވަޒީރަށެވެ.

ކޮމިޝަނަރ އޮފް ރިފޯމްގެ މަޤާމަށް އައްޔަން ކުރައްވާފައިވާ އަސްމާ ވަނީ މީރާގައި ގިނަ ދުވަސްތަކެއްގެ ވަންދެން ޚިދުމަތް ކުރައްވާފައެވެ. އެގޮތުން، 2010 ވަނަ އަހަރުން ފެށިގެން މީރާގައި މަސައްކަތް ކުރައްވާފައިވާއިރު، އޭނާ ޑެޕިއުޓީ ކޮމިޝަނަރ ޖެނެރަލް އޮފް ޓެކްސޭޝަންގެ މަޤާމަށް އައްޔަންކޮށްފައިވަނީ 2019 ވަނަ އަހަރުއެވެ. އަސްމާގެ މަޤާމުގެ ދައުރު މިދިޔަ އޮކްޓޯބަރމަހު ވަނީ ހަމަވެފައެވެ.

ކޮމިޝަނަރ އޮފް ރިފޯމްގެ މަޤާމަށް އަސްމާ އައްޔަންކޮށްފައިވާއިރު، ސަރުކާރުން ގެންނަ އިސްލާހީ ބަދަލުތައް ތަންފީޒުކުރުމަށް ރިފޯމް އޮފީހެއްވެސް ޤާއިމްކުރައްވާފައެވެ.