އޭސީސީގެ މެމްބަރުކަމަށް ކުރިމަތިލުމަށް އަލުން ހުޅުވާލައިފި

އެންޓި-ކޮރަޕްޝަން ކޮމިޝަން، އޭ.ސީ.ސީގެ މެމްބަރުކަމަށް ކުރިމަތިލުމަށް ރައީސުލްޖުމްހޫރިއްޔާގެ އޮފީހުން އަލުން ހުޅުވާލައިފިއެވެ.

އޭސީސީގެ މެމްބަރުކަމަށް ކުރިމަތިލުމަށް އަލުން ހުޅުވާލީ ރައީސުލްޖުމްހޫރިއްޔާ އޮފީހުން އެކަމާއި ގުޅިގެން، ފުރަތަމަ ކުރި ޢިއުލާން މުއްދަތު ހަމަވެގެން ބާތިލްކުރުމަށްފަހުއެވެ.

އޭސީސީގެ މެމްބަރުކަމަށް ކުރިމަތިލުމަށް ހުޅުވާލީ އެންޓި-ކޮރަޕްޝަން ކޮމިޝަނުގެ ދެ މެންބަރުން އިސްތިޢުފާ ދެއްވުމާއި ގުޅިގެންނެވެ. އޭސީސީ ގެ މެންބަރުކަމުން އިސްތިއުފާ ދެއްވާފައިވަނީ ކޮމިޝަންގެ ނައިބު ރައީސް އަބްދުލްސަލާމް އަދި މެމްބަރު ތޯހާ މުހައްމަދެވެ. ދެ މެންބަރުން އިސްތިއުފާ ދެއްވީ ނުފޫޒު ފޯރުވުމާ ކޮރަޕްޝަންގެ ބޮޑެތި ތުހުމަތުތަކެއް ކުރެވި، އެ ދެ މެންބަރުން ވަކި ކުރަން ރައްޔިތުންގެ މަޖިލީހުގެ މިނިވަން މުއައްސަސާތަކުގެ ކޮމިޓީން ނިންމާފައިވަނިކޮށެވެ.

ރައީސުލްޖުމްހޫރިއްޔާގެ އޮފީހުން އޭސީީސީގެ މެންބަރުކަމަށް ކުރިމަތިލުމަށް މިމަހުގެ 8 ވަނަ ދުވަހު ހުޅުވާލުމަށް ފަހު އެއިއުލާނުގެ މުއްދަލު މިމަހުގެ 16 ވަނަ ދުވަހު ވަނީ ހަމަވެފައެވެ. ނަމަވެސް އެ އިއުލާން ބާތިލްކޮށް އަލުން އެ މަޤާމުތަކަށް ކުރިމަތިލުމުގެ ފުރުސަތު ހުޅުވާލާފައިވާއިރު، އޭސީސީގެ މެންބަރުކަމުގެ މަޤާމަށް މިމަހުގެ 31 ވަނަ ދުވަހުގެ މެންދުރު 12:00 ހަމައަށް ކުރިމަތިލުމަށް ފޯމް ހުށަހެޅޭނެއެވެ.

އޭސީސީގެ ގާނޫނަށް ގެނައި އިޞްލާޙުގެ ދަށުން، ކޮމިޝަނުގެ ރައީސާއި ނައިބު ރައީސް އައްޔަންކުރާ އުސޫލަށް ވަނީ ބަދަލުގެނެވިފައެވެ. މި އިސްލާހުގައި ވާގޮތުން، ކޮމިޝަނުގެ މެންބަރުންގެ ތެރެއިން ކޮމިޝަނުގެ ރައީސަކާއި ނައިބު ރައީސެއް ޢައްޔަނުކުރައްވާނީ ރައީސުލްޖުމްހޫރިއްޔާއެވެ.

ކޮމިޝަނުގެ ރައީސަކު ނުވަތަ ނައިބު ރައީސަކު އައްޔަންކުރާނީ، ކޮމިޝަނަށް މަޖިލީހުން އައްޔަންކުރައްވާ މެންބަރުންގެ ތެރެއިން ރައީސުލްޖުމްހޫރިއްޔާ އައްޔަންކުރައްވާ ދެ ބޭފުޅެކެވެ.