ރަޝިޔާގެ ކޫރްސްކް ސަރަޙައްދުގައި ޔޫކްރެއިނާ ދެކޮޅަށް ރަޝިޔާއިން ކުރަމުންދާ ހަނގުރާމައިގައި އުތުރު ކޮރެޔާގެ ސިފައިން ބައިވެރިވަމުންދާ ކަމަށާއި، އެ ކުރިމަތިލުންތަކުގައި އުތުރު ކޮރެޔާގެ ގިނަ އަދަދެއްގެ ސިފައިން މަރުވެ އަދި ޒަޚަމްވެފައިވާ ކަމުގެ މަޢުލޫމާތު ލިބިފައިވާ ކަމަށް އެމެރިކާއިން ބުނެފިއެވެ.
"އުތުރު ކޮރެޔާގެ ސިފައިން ކޫރްސްކް ހަނގުރާމައިގައި ބައިވެރިވާ މިންވަރު އަޅުގަނޑުމެން މި ދަނީ ގާތުން ބަލަމުން. އޭގެ ތެރެއިން ގިނަ ޢަދަދެއްގެ ސިފައިން މަރުވެ، އިތުރު ބަޔަކު ޒަޚަމްވެފައިވާ ކަމުގެ މަޢުލޫމާތުތައް ލިބިފައި އެބަހުރި،" ޕެންޓަގަންގެ ތަރުޖަމާނު މޭޖަރ ޖެނެރަލް ޕެޓް ރައިޑަރ ނޫސްވެރިންނަށް ވިދާޅުވިއެވެ.
ރައިޑަރ ވިދާޅުވީ އުތުރު ކޮރެޔާގެ ސިފައިންގެ ތެރެއިން މަރުވި މީހުންގެ ސީދާ އަދަދެއް އަދި ކަށަވަރުނުވާ ކަމަށެވެ. އުތުރު ކޮރެޔާގެ ސިފައިން ހަނގުރާމައިގައި ބައިވެރިވާން ފަށާފައިވަނީ މިދިޔަ ހަފްތާގައި ކަމަށެވެ.
ޔޫކްރެއިނުން ބުނީ، މިދިޔަ ހަފުތާ ބަންދުގައި ކޫރްސްކް ސަރަޙައްދުގައި ވަށައިގެން ހިނގި ކުރިމަތިލުންތަކުގައި، މަރުވި ނޫނީ ޒަޚަމްވި އުތުރު ކޮރެޔާގެ ސިފައިންގެ ޢަދަދު 30އަށް އަރާނެ ކަމަށެވެ.
މިދިޔަ އޮގަސްޓު މަހު ޔޫކްރެއިންގެ ސިފައިންގެ ލަޝްކަރެއް ރަޝިޔާގެ ހުޅަނގު ކޫރްސްކް ސަރަޙައްދަށް އަރައިގަނެ، ރަޝިޔާގެ ސަރަޙައްދުތަކަށް އަތްގަދަ ކުރަން ވަނީ ފަށައިފައެވެ.
އެ ސަރަޙައްދުގެ ބާރު ޔޫކްރެއިނުގެ އަތްދަށުގައި ބޭއްވުމަށް ގިނަ މަސައްކަތްތަކެއް އެ ޤައުމުން ކުރަމުންދާ އިރު، ރަޝިޔާގެ ސިފައިންނަށް އެހީތެރިކަން ފޯރުކޮށްދިނުމަށް އުތުރު ކޮރެޔާއިން ސިފައިން ފޮނުވާފައިވާ ކަމުގައި ޔޫކްރެއިނުން ފުރަތަމަ ތުހުމަތު ކުރީ މިދިޔަ އޮކްޓޯބަރު މަހުގެ ތެރޭގައެވެ.
ޔޫކްރެއިނުން ބުނީ ރަޝިޔާގެ ބިޔަ ފައުޖުތަކާ އެއް ސަފެއްގައި ހަނގުރާމަ ކުރުމަށް އުތުރު ކޮރެޔާގެ 11،000އަށް ވުރެ ގިނަ ސިފައިން އެ ޤައުމުން ފޮނުވާފައިވާ ކަމަށެވެ.