ބަންގްލަދޭޝްގެ ޢާންމު އިންތިޚާބު އަންނަ އަހަރުގެ ފަހުކޮޅުގައި ބޭއްވިދާނެ: އިންތިޤާލީ ސަރުކާރު
ބަންގްލަދޭޝްގެ ޢާންމު އިންތިޚާބު 2025ވަނަ އަހަރުގެ ފަހުކޮޅު ބޭއްވިދާނެ ކަމަށް އެ ޤައުމުގެ އިންތިޤާލީ ސަރުކާރުން ބުނެފިއެވެ.
ބަންގްލަދޭޝްގެ ރައްޔިތުން ސަރުކާރާ ދެކޮޅަށް ވަރުގަދަ މުޒާހަރާތަކެއް ކުރަމުން ދަނިކޮށް އެ ޤައުމުގެ ބޮޑުވަޒީރު ޝައިޚް ޙަސީނާ އެ މަޤާމުން އިސްތިޢުފާ ދެއްވައި ޤައުމުން ފިއްލެވުމުން، މިދިޔަ އޮގަސްޓު މަހުން ފެށިގެން އެ ޤައުމުގެ ހިންގުމާ ޙަވާލު ވެފައިވަނީ އިންތިޤާލީ ސަރުކާރަކުންނެވެ. އެ ޤައުމުގެ އިންތިޚާބު ވީ އެންމެ އަވަހަކަށް ބޭއްވުމަށް އިދިކޮޅު ޕާޓީތަކުން ދަނީ ގޮވައިލަމުންނެވެ. މިދިޔަ ސެޕްޓެމްބަރު މަހުގެ ތެރޭގައި ބަންގްލަދޭޝްގެ އަސްކަރިއްޔާގެ އިސްވެރިޔާ، ވަކަރުއްޒަމާން ވަނީ ކުރިއަށް އޮތް 12 މަހާއި 18 މަސް ދުވަހާ ދެމެދު އެ ޤައުމުގައި ޑިމޮކްރަސީ އަލުން ޤާއިމު ކުރެވޭނެ ކަމަށް ވިދާޅުވެފައެވެ.
އިންތިޤާލީ ސަރުކާރުގެ ފަރާތުން ޤައުމުގެ ހިންގުމާ އެންމެ އިސްކޮށް ޙަވާލުވެވަޑައިގެން ހުންނެވި މުޙައްމަދު ޔޫނުސް ވިދާޅުވީ ސިޔާސީ އިއްތިފާޤެއް އޮވެ، ވޯޓުލާ މީހުންގެ ލިސްޓަށް މާ ބޮޑު ބަދަލެއް ގެންނަން ނުޖެހޭ ގޮތަށް އެ ލިސްޓު ތައްޔާރު ކުރެވިއްޖެ ނަމަ އަންނަ އަހަރުގެ ފަހުކޮޅުގައި އިންތިޚާބު ބޭއްވިދާނެ ކަމަށެވެ. ނަމަވެސް އިންތިޚާބު ބޭއްވޭނީ އިންތިޚާބީ އިސްލާހުތަކެއް ގެނައުމަށް ފަހުގައި ކަމަށާއި އިތުރު އިސްލާހުތައް ބޭނުންވާ ނަމަ ކަންކަން ފުރިހަމަ ކުރުމަށް އިތުރު ހަ މަސްދުވަސް ނަގައިފާނެ ކަމަށް ބެލެވޭ ކަމަށް އޭނާ ވިދާޅުވިއެވެ.