މީޑިއާ ކައުންސިލްގެ ރައީސަކަށް ސަގީފް އިންތިޚާބުކޮށްފި

މޯލްޑިވްސް މީޑިއާ ކައުންސިލްގެ އައު ދައުރުގެ ރައީސަކަށް ތިލަދުން އޮންލައިންގެ ހުސައިން ސަޤީފް މިއަދު އިންތިޚާބުކޮށްފިއެވެ.

މިއަދު ފެށި އެމްއެމްސީގެ އައު ދައުރުގެ ރައީސަކަށް ސަގީފާއެކު ދެން ވާދަކުރީ "މިހާރު" ނޫހުގެ ފާތިމަތު ޝަނާ މުހައްމަދެވެ.

ދެ މެންބަރުންގެ މެދުގައި ފުރަތަމަ ވޯޓު ނެގީ އިއްޔެއެެވެ. އިއްޔެ ނެގި ވޯޓުން 2 މެންބަރުންވެސް އެއްވަރުވުމުން މިއަދު އަލުންވަނީ ވޯޓު ނަގާފައެވެ. މިވޯޓުން މީޑީއާ ކައުންސިލްގެ ރައީސްއަކަށް ސަޤީފް ހޮވިފައިވަނީ 8 ވޯޓުންނެވެ. ޝަނާއަށް ލިބުނީ 7 ވޯޓެވެ.

މީގެއިތުރުން، އެކައުންސިލްގެ ނައިބު ރައީސަކު ހޮވަން އިއްޔެ ނެގި ވޯޓުގައި ނުވަ ވޯޓުން ކުރިހޯދައިގެން އެ މަގާމަށް އިންތިޚާބުވީ އިބްރާހީމް މުޙައްމަދެވެ. އޭނާއަކީ އަމިއްލަ ގޮތުން ކައުންސިލަށް ހޮވުނު މެންބަރެކެވެ.

މީޑިއާ ކައުންސިލްގައި ޖުމްލަ 15 މެންބަރުން ތިބޭއިރު، އޭގެ ތެރޭގައި ހިމެނެނީ މީޑިއާތަކަށް ނިސްބަތްވާ 8 ނޫސްވެރިންނާއި އަމިއްލަ ގޮތުން ހޮވާ 7 މެންބަރުންނެވެ. އެ ކައުންސިލްގެ މެންބަރެއްގެ ދައުރަކީ ދެ އަހަރެވެ.