ރައީސްގެ ސިޔާސަތަކީ އަސްކަރީ ޤާބިލުކަން އިތުރުކޮށް، ސަރަހައްދީ ރައްކާތެރިކަން ކަށަވަރުކުރުން: ވަޒީރު ޣައްސާން

ރައީސުލްޖުމްހޫރިއްޔާ ޑރ. މުހައްމަދު މުޢިއްޒުގެ ސިޔާސަތަކީ އަސްކަރީ ޤަބިލުކަން އިތުރުކުރުމަށް އިސްކަންދިނުމާއެކު، ސަރަހައްދީ ސަލަމާތާއި ރައްކާތެރިކަން ކަށަވަރުކުރެއްވުންކަމަށް ދިފާޢީ ވަޒީރު މުޙައްމަދު ޣައްސާން މައުމޫން ވިދާޅުވެއްޖެއެވެ.

ދިފާޢީ ވަޒީރު މިހެން ވިދާޅުވީ ކަނޑުމަތީގެ ސާޗް އެންޑް ރެސްކިޔު އޮޕަރޭޝަންތަކުގައި ބޭނުންކުރާ ޒަމާނީ އާލާތްތަކެއް ޖަޕާނު ސަރުކާރުން ދިވެހި އަސްކަރިއްޔާއަށް ހަދިޔާކުރުމަށް ބޭއްވި ރަސްމިއްޔާތުގައި ވާހަކަ ދައްކަވަމުންނެވެ.

މިރަސްމިއްޔާތުގައި ވާހަކަ ދައްކަވަމުން، ވަޒީރު ޣައްސާން މައުމޫން ވިދާޅުވީ ޖަޕާނަކީ އަބަދުވެސް ރާއްޖެއަށް އެކި ދާއިރާތަކުން ބޮޑެތި އެހީތަކެއް ފޯރުކޮށްދެމުން އަންނަ ޤައުމެއްކަމަށެވެ. އެގޮތުން ޖަޕާން ސަރުކާރުން މިފަހަރު ފޯރުކޮށްދިން އެހީތެރިކަމާއެކު ދެ ޤައުމުގެ ގުޅުން އިތުރަށް ބަދަހިވެގެންދާނެކަމަށް ވަޒީރު ވިދާޅުވިއެވެ.

ވަޒީރު ވިދާޅުވީ ޖަޕާނު ސަރުކާރުން އަސްކަރިއްޔާއަށް ފޯރުކޮށްދިން އެހީއަކީ ރާއްޖޭގެ އަސްކަރީއްޔާގެ ޤަބިލީއްޔަތުކަން އިތުރުކޮށް ސަރަހައްދީ ރައްކާތެރިކަމަށާއި ހަމަޖެހުން ކަށަވަރުކުރުމަށް ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ގެންގުޅުއްވާ ސިޔާސަތު ތަންފީޒުކުރުމަށް ލިބިގެންދިޔަ މުހިންމު އެހީއެއްކަމަށެވެ.

"ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ބޭނުންފުޅުވަނީ ރާއްޖޭގެ އަސްކަރީއްޔާގެ ޤަބިލީއްޔަތުކަން އިތުރުކުރުމުގެ މަސައްކަތް ކުރައްވަން. މިއީ މިސަރަހައްދުގައި ސުލްޙައާއި، ސަލަމާތާއި ރައްކާތެރިކަން ކަށަވަރުކުރުމަށް ކުރައްވަމުން ގެންދަވާ މަސައްކަތެއް. މިމަސައްކަތް ކުރައްވަމުންދަނީ އެތެރޭގެ އަދި ބޭރު ވާޖިބުތައްވެސް އަދާކުރައްވަމުން" ވަޒީރު ޣައްސާން ވިދާޅުވިއެވެ.

ވަޒީރުގެ ވާހަކަފުޅުގައި ޖަޕާނު ސަރުކާރަކީ ދިވެހިރާއްޖެއަށް ގިނަ ގޮތްގޮތުން އެހީތެރިކަން ފޯރުކޮށްދެއްވަމުންދާ ޤައުމެއްކަން ފާހަގަކުރައްވައި، އެ ޤައުމުން އެމްއެންޑީއެފްއަށް އެހީ ހަދިޔާކޮށްދެއްވާފައިވާތީ ޖަޕާނު ސަރުކާރަށް ޝުކުރު އަދާކުރެއްވިއެވެ. އަދި، އެމްއެންޑީއެފް ކޯސްޓްގާޑުގެ އުޅަނދުފަހަރާއި، އޮޕަރޭޝަނަލް އާލާތްތަކާއި، އެމްއެންޑީއެފް ކޯސްޓްގާޑުން ފޯރުކޮށްދޭ ޚިދުމަތްތައް، ކުރިއަށް އޮތް ދުވަސްތަކުގައި ދެގުނަ ކުރުމަށް ސަރުކާރުން ކުރައްވާ މަސައްކަތްވެސް ވަޒީރުގެ ވާހަކަފުޅުގައި ފާހަގަކުރެއްވިއެވެ.

ވަޒީރު ވިދާޅުވީ ޖަޕާނުން ހަދިޔާކުރެއްވި އާލާތްތަކުގެ ސަބަބުން، އެމްއެންޑީއެފް ކޯސްޓްގާޑުން ކަނޑުމަތީގެ ކުއްލި ނުރައްކަލުގެ ޙާލަތްތަކުގައި އަވަހަށް އަދި ހަރުދަނާކަމާ އެކު ހަރަކާތްތެރިވުމުގައި އެމްއެންޑީއެފް ކޯސްޓްގާޑުގެ ޤާބިލިއްޔަތުކަން އިތުރުވެގެންދާނެކަމަށެވެ.

ޖަޕާނު ސަރުކާރުން އެމްއެންޑީއެފްއަށް ހަދިޔާކުރެއްވި ކަނޑުމަތީގެ ސާޗް އެންޑް ރެސްކިޔު އޮޕަރޭޝަންތަކުގައި ބޭނުންކުރާ ޒަމާނީ އާލާތްތަކަކީ 800 މިލިޔަން ޔެން ނުވަތަ ގާތްގަނޑަކަށް 80 މިލިޔަން ރުފިޔާ އަގުހުރި ސާމާނުތަކެއްކަމަށް ދިފާޢީ ވުޒާރާއިން ވިދާޅުވެއެވެ.

ޖަޕާނު ސަރުކާރުގެ ފަރާތުން އެ އާލާތްތައް އެމްއެންޑީއެފްއާ ރަސްމީކޮށް ހަވާލުކޮށްދެއްވީ ޖަޕާނުން ދިވެހިރާއްޖެއަށް ކަނޑައަޅުއްވާފައި ހުންނަވާ ސަފީރު، ތަކެއުޗީ މިދޯރީއެވެ. އަދި އެމްއެންޑީއެފްގެ ފަރާތުން އެ އާލާތްތަކާ ހަވާލުވެވަޑައިގަތީ، ދިފާޢީ ވަޒީރު، ޣައްސާން މައުމޫންއެވެ.