މިމަހު ރާއްޖެއިން ރެކޯޑް އަދަދަކަށް މީހުން ޢުމްރާގެ އަޅުކަމަށް!

ފަހަކަށް އައިސް ރާއްޖެއިން ޢުމްރާގެ އަޅުކަމަށްދާ މީހުންގެ އަދަދު އަންނަނީ އިތުރުވަމުންނެވެ. އެގޮތުން ރާއްޖެއިން އެންމެ ގިނަ އަދަދެއްގެ މީހުން ޢުމްރާގެ އަޅުކަމަށް ފުރާ މަހަށް މި ޑިސެމްބަރ މަސް ވާނެއެވެ.

ޢުމްރާގެ އަޅުކަމަކީ ނުހަނު ގިނަގުނަ ސަވާބު ލިބޭ މަތިވެރި އަޅުކަމެކެވެ. އެއް ޢުމްރާއިން އަނެއް ޢުމްރާއާ ދެމެދު ކުރެވޭ ފާފަތަކުގެ ކައްފާރާއެއް ކަމުގައި ޢުމްރާކުރުންވެއެވެ.

ރާއްޖޭގައި ޢުމްރާގެ އަޅުކަން އަދާކުރަންދާ މީހުންގެ އަދަދުތައް ފަހަކަށް އައިސް އިތުރުވެފައިވާއިރު ގިނަ އަދަދެއްގެ ޒުވާނުންނާއި ތުއްތު ކުދިންވެސް ޢުމްރާގެ އަޅުކަމަށްދާ އަދަދުތައް ވަނީ އިތުރުވެފައެވެ. އަދި އާއިލާގެ ހުރިހައި މެންބަރުން އެއްކޮށް ޢުމްރާގެ އަޅުކަން އަދާކުރުމަށް ދިއުމަކީވެސް މިހާރު ފެންނަ މަންޒަރެކެވެ.

މި ޑިސެމްބަރ މަހަކީ ރާއްޖެއިން ރެކޯޑް އަދަދަކަށް މީހުން ޢުމްރާގެ އަޅުކަމަށްދާ މަހެކެވެ. މޯލްޑިވްސް އެއަރޕޯރޓްސް ކޮންޕެނީ ލިމިޑެޓް، އެމްއޭސީއެލްގެ ޢުމްރާއަށް ފުރާ މީހުންގެ ޝެޑިއުލްއިން ދައްކާގޮތުން ޑިސެމްބަރ މަހު މުޅި ޖުމްލަ 5796 މީހުން ޢުމްރާއަށް ފުރުމަށް ވަނީ ހަމަޖެހިފައެވެ. އެންމެ ފުރަތަމަ ގްރޫޕް ފުރާފައިވަނީ މިމަހުގެ 15 ވަނަ ދުވަހުއެވެ. އަދި ފަހު ގްރޫޕް ފުރުމަށް ހަމަޖެހިފައިވަނީ މިމަހުގެ 27 ވަނަ ދުވަހުއެވެ.

އިސްލާމީ ކަންތައްތަކާއި ބެހޭ ވުޒާރާއިން ވިދާޅުވީ، އާންމު ގޮތެއްގައި މީގެކުރިން ޑިސެމްބަރ ޢުމްރާއަށް ދަނީ އެވްރެޖްކޮށް 4000 އެއްހައި މީހުންނެވެ. މި ޑިސެމްބަރ މަހު ރާއްޖެއިން ޢުމްރާއަށް ފުރާ މީހުންގެ ޖުމްލަ އަދަދު މިވަގުތު ބުނަން ނޭންގުނު ނަމަވެސް މިއަހަރު ރެކޯޑް އަދަދަކަށް ރާއްޖެއިން މީހުން ޢުމްރާއަށް ފުރާނެކަމަށް އިސްލާމީ ކަންތައްތަކާއި ބެހޭ ވުޒާރާއިންވެސް ވަނީ ވިދާޅުވެފައެވެ.

ރާއްޖޭގައި މިވަގުތު 50 އެއްހައި ޢުމްރާ ގްރޫޕް ދަނީ ހިންގަމުންނެވެ. އަދި އަމިއްލައަށް ޢުމްރާގެ އަޅުކަން އަދާކުރަންވެސް މީހުންދެއެވެ. އެހެންކަމުން މި ޑިސެމްބަރ މަހުގެ ތެރޭގައި ރާއްޖެއިން ގާތްގަނޑަކަށް 8000 އެއްހައި މީހުން ޢުމްރާގެ އަޅުކަން އަދާކުރަން ދާނެކަމަށް ލަފާކުރެވޭކަމަށް ބައެއް ޢުމްރާ ގްރޫޕްތަކުން ވަނީ ބުނެފައެވެ.