އިމާމުން ތަމްރީނު ކުރުމުގެ މަޝްރޫއުގެ ދަށުން މިއަހަރު 818 އިމާމުން ތަމްރީނުކޮށްފި

އިމާމުން ތަމްރީނު ކުރުމުގެ ޤައުމީ މަޝްރޫޢުގެ ދަށުން 818 އިމާމުން މިއަހަރު ތަމްރީނު ކޮށްފައިވާކަމަށް އިސްލާމީ ކަންތައްތަކާ ބެހޭ ވުޒާރާއިން ވިދާޅުވެއްޖެއެވެ.

އިމާމުން ތަމްރީންކުރުމުގެ ގައުމީ މަޝްރޫޢަކީ އިމާމުކަމުގެ ދާއިރާއިން އިތުރު ތަމްރީނު ދިނުމަށްޓަކައި 11 ސަރަހައްދަކަށް ބަހާލައިގެން ދާއިމީ އިމާމުންނަށް އަމާޒުކޮށްގެން ކުރިއަށްގެންދިޔަ ޕްރޮގުރާމެކެވެ.

އިމާމުން ތަމްރީނު ކުރުމުގެ ޤައުމީ މަޝްރޫޢުގެ އެންމެ ފަހު ބެޗްގައި މާލެ ސިޓީގެ އިމާމުން ތަމްރީނުކޮށް މިހާރު ވަނީ ނިންމާލާފައެވެ. އިސްލާމީ ކަންތައްތަކާ ބެހޭ ވުޒާރާއިން ވިދާޅުވީ މިބެޗާއެކު ޕްލޭން ކުރި ގޮތަށް ރާއްޖޭގެ ހުރިހާ މިސްކިތްތަކުގެ އިމާމުން ތަމްރީނުކޮށް ނިމިފައިވާކަމަށެވެ.

އިމާމުން ތަމްރީނު ކުރުމުގެ ޤައުމީ މަޝްރޫޢުގެ ދަށުން 818 އިމާމުން މިއަހަރު ވަނީ ތަމްރީނު ކޮށްފައެވެ.

މި ޕްރޮގްރާމުގައި ޖުމްލަ 9 މާއްދާއެއް ކިޔަވާދީފައިވާ ކަމަށް އިސްލާމީ ކަންތައްތަކާ ބެހޭ ވުޒާރާއިން ވިދާޅުވެއެވެ. އެގޮތުން ޤުރްއާނާއި، ތަޖުވީދުގެ ޢިލްމާއި، ތަފްސީރާއި، ފިޤުހާއި، ޙަދީޘްގެ އިތުރުން އަޤީދާގެ ޢިލްމުގެ ދާއިރާއިން އިމާމުންނަށް ބޭނުންވާ މުހިންމު ކަންކަން އުނގަންނައިދޭނެކަމަށް އިސްލާމީ ކަންތައްތަކާ ބެހޭ ވުޒާރާއިން ވިދާޅުވެއެވެ.

މީގެއިތުރުން މިސްކިތްތައް ބެލެހެއްޓުމުގެ ގޮތުން އަދާކުރަންޖެހޭ މަސްއޫލިއްޔަތު އަދާކުރެވޭނެ ވަރަށް މިޕްރޮގުރާމުގެ ތެރެއިން އިމާމުންގެ ޝަޚްޞިއްޔަތު ބިނާކުރެވިފައިވާކަމަށްވެސް އެވުޒާރާއިން ވިދާޅުވެއެވެ.

މިސަރުކާރުން އިމާމުންނަށް ޚާއްސަ އަހައްމިއްޔަތުކަމެއް އަންނަނީ ދެމުންނެވެ. އެގޮތުން އަހަރަކު މަދުވެގެން 100 އިމާމުން ތަމްރީނު ކުރުމާއި، ރާއްޖޭގައި ހިންގާ ސޯޝަލް ހައުސިން ސްކީމްތަކުގެ ތެރެއިން އިމާމުންނަށް ފުރުސަތު ހޯއްދަވައި ދެއްވުމަށް އަންނަނީ މަސައްކަތް ކުރައްވަމުންނެވެ.

މީގެ އިތުރުން ރާއްޖޭގެ އެކި ސަރަހައްދުތަކުގައި ޤާއިމް ކޮށްފައިވާ އިސްލާމީ މަރުކަޒުތަކަށް ދެ އިމާމުން ހަމަޖައްސައި އޭގެ ތެރެއިން އިމާމަކު ބަންގި ދިނުމަށް ޚާއްސަކުރާއިރު، އިސްލާމީ މަރުކަޒުގެ މައި އިމާމަކީ ޑިގްރީ ފެންވަރުގެ އިމާމެއްގެ ގޮތުގައި ހަމަޖައްސެވުމަށްވެސް ސަރުކާރުން ވަނީ ނިންމަވާފައެވެ.