އަރިދަފުސް ރޯގާ ޖެހިގެން މިދިޔަމަހު 40،000އަށް ވުރެ ގިނަ ކޭސް

އަރިދަފުސް ރޯގާ ޖެހިގެން މިދިޔަ ނޮވެންބަރު މަހު 40،000 އަށްވުރެ ގިނަ މީހުން ރިޕޯޓްކޮށްފައިވާކަމަށް ތަފާސްހިސާބުތަކުން ދައްކައިފިއެވެ.

ހެލްތު ޕްރޮޓެކްޝަން އެޖެންސީ، އެޗްޕީއޭއިން ވަނީ ރާއްޖޭގައި ރޯގާގެގޮތުގައި ފެތުރެމުންދާ ބަލިތަކުގެ ތަފާސްހިސާބުތައް ހިއްސާކޮށްފައެވެ. އެގޮތުން މިދިޔަ އޮކްޓޫބަރު މަހާ އަޅާ ބަލާއިރު ނޮވެންބަރު މަހު ރޯގާގެ ބަލިތައް އިތުރުވެފައިވާކަން ފާހަގަކުރެވެއެވެ.

އެޗްޕީއޭގެ ތަފާސްހިސާބުތައް ދައްކާގޮތުގައި މިދިޔަ ނޮވެމްބަރު މަހު އަރިދަފުސް ރޯގާ ޖެހިގެން 40،504 މީހަކު ރިޕޯޓްކޮށްފައިވެއެވެ. މިއީ އޮކްޓޫބަރު މަހާ އަޅާބަލާއިރު ބޮޑު ތަނުން އިތުރު އަދަދެކެވެ. އޮކްޓޫބަރު މަހު ރިޕޯޓްކޮށްފައިވަނީ 29،515 ކޭސްއެވެ.

މީގެއިތުރުން މިއީ މިދިޔަ އަހަރުގެ މިމުއްދަތުގައި އަރިދަފުސް ރޯގާ ޖެހިގެން ރިޕޯޓުކުރި އަދަދާ އަޅާބަލާއިރުވެސް އިތުރު އަދަދެކެވެ. މިިދޔަ އަހަރުގެ ނޮވެންބަރު މަހު އަރިދަފުސް ރޯގާ ޖެހިގެން ރިޕޯޓްކޮށްފައިވަނީ 37،028 މީހެކެވެ.

އެޗްޕީއޭއިން ވިދާޅުވީ އޮކްޓޫބަރު މަހާ އަޅާބަލާއިރު، އިންފުލުއެންޒާގެ އަލާމާތްތައް ހުރެގެން ޓެސްޓް ކުރި މީހުންގެ އަދަދުވެސް ނޮވެމްބަރުމަހު އިތުރު ކަމަށެވެ. މިއަހަރުގެ މިހާތަނަށް 2،375 މީހުން އިންފުލުއެންޒާއަށް ޓެސްޓް ކުރިއިރު އޭގެ ތެރެއިން 476 ސާމްޕަލް ޕޮޒިޓިވްކަން ތަފާސްހިސާބުތަކުން ދައްކައެވެ. މީގެ ތެރެއިން ނޮވެންބަރު މަހު 164 ސާމްޕަލް ޓެސްޓުކުރިއިރު 42 މީހަކު އިންފުލުއެންޒާއަށް ޕޮޒިޓިވްވެފައިވެއެވެ.

ޑެންގީ ހުމުގެ ތަފާސްހިސާބަށް ބަލާއިރު އޮކްޓޫބަރު މަހު 126 ކޭސް ރިޕޯޓުކޮށްފައިވާއިރު ނޮވެންބަރު މަހުގެ ރިޕޯޓްކޮށްފައިވަނީ 140 ކޭސްއެވެ. ބޭރަށް ހިންގާ ރޯގާއެއް ވެސް މިދުވަސްވަރު ފެތުރެމުންދާއިރު ބޭރަށް ހިންގުން ޖެހިގެން މިދިޔަ އޮކްޓޫބަރު މަހު 3،164 ކޭސް އަދި ނޮވެމްބަރު މަހު 3،635 ކޭސް ރިޕޯޓުކޮށްފައިވެއެވެ.

އާންމު ބަލިތައް ފެތުރޭ އަދަދު މިދުވަސްވަރު އިތުރުވަމުންދާތީ އެޗްޕީއޭ އިން ވަނީ ބަލިތަކުން ރައްކާތެރިވުމަށް ފިޔަވަޅުތައް އެޅުމަށް އިލްތިމާސް ކޮށްފައެވެ.