އޮމަދޫގެ ބަނދަރު ވީރާނާވެފައި، ރައީސް ޔަޤީންކަން ދެއްވީ އެންމެ އިސްކަންދީގެން ތަރައްޤީކޮށްދޭނެކަން
-
އޮމަދޫ ބަނދަރަކީ 25 އަހަރަށްވުރެ ދުވަސްވީ ބަނދަރެއް
-
ރައްޔިތުން ތަރައްޤީކުރި ބަނދަރު ވަނީ އެއްކޮށް ވީރާނާވެފައި
އެތައް އަހަރެއްވެ އެއްކޮށް ވީރާނާވެފައިވާ އދ. އޮމަދޫގެ ބަނދަރުގެ މައްސަލަ ޙައްލުކޮށްދެއްވުމަށް ސަރުކާރުން އެންމެ އިސްކަންދޭ މަޝްރޫޢުތަކުގައި ހިމަނައިގެން އަންނަ އަހަރުގެ ކުރީކޮޅު ތަރައްޤީކޮށްދެއްވާނެކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. އެމަނިކުފާނު މިހެން ވިދާޅުވީ އޮމަދޫގެ ރައްޔިތުންނާ ބައްދަލުކުރައްވާ ދެއްކެވި ވާހަކަފުޅުގައެވެ.
އދ. އޮމަދޫގައި މިހާރު އޮތް ބަނދަރަކީ މީގެ 25 އަހަރުކުރިން ރަށުގެ ރައްޔިތުން ތަރައްޤީކުރި ބަނދަރެކެވެ. އޭގެފަހުން އެއްވެސް މަރާމާތުކުރުމުގެ މަސައްކަތްތެއް ނުކުރެވި މުޅި ބަނދަރު ވަނީ އެއްކޮށް ހަލާކުވެ ބޭނުން ނުކުރެވޭވަރުވެފައެވެ. ވުމާއެކު ރަށުގެ އޮޑިދޯނިފަހަރު އެޅުމުގައި ވަނީ ވަރަށް ބޮޑެތި ދަތިތަކެއް ކުރިމަތިވެފައެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އދ. އޮމަދޫއަށް ވަޑައިގެން ވަނީ ބަނދަރު ބައްލަވާލައްވާފައެވެ. މިއާއެކު އޮމަދޫގެ ރައްޔިތުންނާ ބައްދަލުކުރައްވާ ވާހަކަފުޅު ދައްކަވަމުން ރައީސް ދެއްވި ޔަޤީންކަމަކީ، އެރަށުގެ ތަރައްޤީއަށް ރައްޔިތުން އެދޭގޮތަށް، އެ ރައްޔިތުންގެ އަޑުއަހައިގެން ކަންކަން ކޮށްދެއްވާނެކަމެވެ. މިގޮތުން އެންމެ މުހިންމު ކަމަކީ ބަނދަރު މައްސަލަ ހައްލުކުރުންކަން ފާހަގަކުރައްވަމުން ރައީސް ވަނީ، އެކަމަށް ރަނގަޅު ހައްލެއް ގެނެސްދެއްވާނެކަަމަށް ވިދާޅުވެފައެވެ.
ރައީސް ވިދާޅުވީ، ހިނގަމުންދާ އަހަރުގެ ބަޖެޓުގެ ތެރެއިން ކަންކަންކުރަން ދަތިތަކެއް ހުރިނަމަވެސް ފެށޭ އަހަރުގެ ބަޖެޓުން ވަރަށް ގިނަ މައްސަލަތަކަށް ހައްލު ގެނެވޭނެކަމަށާއި، އެގޮތުން ހުރިހާ މައްސަލައެއް ހައްލުވާނެ ފުރިހަމަ ބަނދަރެއް ތަރައްޤީކޮށްދެއްވާނެކަމަށް ރައީސް ވިދާޅުވިއެވެ. އަދި ބަނދަރުގެ މަޝްރޫޢުއާއެކު އޮމަދޫގެ ރަށްގިރުގެ މައްސަލަވެސް އަންނަ އަހަރުގެ ކުރީކޮޅު އެންމެ އިސްކަމެއްދީގެން މަސައްކަތް ކޮށްދެއްވާނެކަމަށްވެސް ރައީސް ވިދާޅުވިއެވެ.
“އައު މަޝްރޫޢުތައް ހިންގުމަށް ތަރުތީބުކޮށްފައި ވަނީ. އެގޮތުން ސިއްޙީ ދާއިރާއާއި ތަޢުލީމީ ދާއިރާގެ ކަންކަމަށްވެސް އިސްކަންދީގެން. މިރަށުގައިވެސް ސިއްޙީ މަރުކަޒުގެ ކަންކަން ވަރަށް ދަށްކޮށް ހުރީ. މިއޮތީ ސްކޫލްގެ ހާލަތު. އެހެންވީމަ ސްކޫލަށް ބޭނުންވާ މަލްޓިޕާޕަސް ހޯލާއި ކްލާސް ރޫމް އަންނަ އަހަރު ތަރައްޤީކޮށްދޭނަން. އަދި ސިއްޙީ މަރުކަޒަށްވެސް ޖާގަ އިތުރުކޮށްދީ ތަރައްޤީކޮށްދޭނަން.” ރައީސުލްޖުމްހޫރިއްޔާ ވިދާޅުވިއެވެ.
ރައީސް ވިދާޅުވީ އަންނަ އަހަރު އޮމަދޫގައި ކުޅިވަރުގެ ވަސީލަތްތައްވެސް ތަރައްޤީކޮށްދެއްވާނެކަމަށާއި، އެގޮތުންއަންހެންގެ ހޭންޑްބޯލް ކޯޓަކާއެކު ކުޅިވަރުގެ އިތުރު ވަސީލަތްތައްވެސް ޤާއިމްކޮށްދެއްވާނެކަމަށެވެ. އަދި ކުނި މަނޭޖުކުރުމަށް މުޅިރާއްޖޭގައި ވަށާޖެހޭ ހައްލެއް ގެނައުމަށް ކުރާ މަސައްކަތުގެ ދަށުން އޮމަދޫގެ ކުނި މެނޭޖުކުރާ މަރުކަޒަށް ވަސީލަތް ހޯދައިދޭނެކަމަށް ރައީސް ވިދާޅުވިއެވެ.
އަންނަ އަހަރަކީ ވަރަށް ގިނަ މައްސަލަތަކަށް ހައްލު ހޯދުމުގެ މަސައްކަތް ފެށޭނެ އަހަރުކަމަށާއި، ރަށްރަށް ވެވަޑައިގެންނެވި ވަޢުދުތައް ފުއްދުމުގެ އަމަލީ މަސައްކަތް ފެންނާނެކަމަށްވެސް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވިއެވެ.