"އަވައްޓެރި ބީޗް ފެސްޓް 2024" ވިލިމާލޭގައި ބާއްވައިފި
-
މި ހަރަކާތުގައި 800 އަށްވުރެ ގިނަ ތުއްތު ކުދިން ބައިވެރިވި
"އަވައްޓެރި ބީޗް ފެސްޓް 2024" ގެ ނަމުގައި ވިލިމާލޭގައި ދިރިއުޅޭ ތުއްތު ކުދިންނަށް އަމާޒުކޮށްގެން ހާއްސަ ހަރަކާތެއް ބާއްވައިފިއެވެ.
މި ހަރަކާތަކީ ދިވެހި ފުލުހުންގެ ޚިދުމަތުގެ ވިލިމާލެ ޕޮލިހާއި ލިކުއިޑް ވޯޓަރ ސްޕޯޓްސްއިން އިސްނަގައިގެން ވިލިމާލޭގެ ސަރުކާރުގެ އިދާރާތަކާއި ޖަމިއްޔާ ޖަމާއަތްތަކާއި އަވައްޓެރި ފުލުހުންގެ ދަށުން ހިންގާ ވިލިމާލެ ޖޮއިންޓް އޭޖެންސީ ގްރޫޕް ގުޅިގެން ހިންގި ހަރަކާތެކެވެ.
ފުލުހުން ވިދާޅުވީ މި ހަރަކާތަކީ ރައްޔިތުންނާއި ފުލުހުން ގުޅުން ބަދަހިކޮށް ވީހާވެސް ގާތުން މަސައްކަތްކުރުމަށް މަގުފަހިކުރުމުގެ އިތުރުން ވިލިމާލޭގެ ރައްޔިތުންގެ މެދުގައި ގުޅުން ބަދަހިކުރުމުގެ ގޮތުން ކުރިއަށް ގެންދިޔަ ހަރަކާތައްކަމަށެވެ. މި ހަރަކާތް ކުރިއަށްގެންގޮސްފައިވަނީ މިއަދު ހެނދުނު 07:00 އިން 11:00އަށެވެ. މި ހަރަކާތުގައި މުނިފޫހިފިލުވުމާއި، މައުލޫމާތު ފޯރުކޮށްދިނުމުގެ އިތުރުން އާންމުންނާ ގުޅުން ބަދަހިކުރުމަށް ގިނަ ހަރަކާތްތަކެއް ހިންގާފައިވެއެވެ.
މިހަރަކާތް ޝަރަފުވެރި ކޮށްދެއްވާ ވާހަކަފުޅުދައްކަވަމުން ކޮމިޝަނަރ އޮފް ޕޮލިސް އަލީ ޝުޖާއުވަނީ މިފަދަ އިވެންޓުތަކުން ފުލުހުންނާއި އާންމުންނާ ދެމެދު އޮންނަ ގުޅުން ބަދަހިވެ، މުޖުތަމައު އިތުރަށް ރައްކާތެރި އަދި ދުޅަހެޔޮ މުޖުތަމައަކަށް ހެދުމަށް މަގުފަހިވެގެންދާކަމަށް ވިދާޅުވެފައެވެ. އަދި މި ހަރަކާތަށް ވިލިމާލެ ރައްޔިތުންގެ ފަރާތުން ލިބުނު އެއްބާރުލުމާއި ތަރުހީބަށް ކޮމިޝަނަރ ޝުކުރު އަދާކުރެއްވިއެވެ.
ވިލިމާލޭގައި ކުރިއަށް ގެންދިޔަ ހަރަކާތުގެ ތެރޭގައި ކަޔަކިންގ، ވޮލީބޯޅަ މެޗުތައް، ކުޑަކުދިންގެ ވާދަމާ މުބާރާތް، އަލިފާނުގެ ރައްކާތެރިކަމާ ގުޅޭ މައުލޫމާތު ފޯރުކޮށްދިނުން، އަދި ކުޑަކުދިންގެ އާޓް މުބާރާތްތަކާއި އެހެނިހެން މޫދު ކުޅިވަރުތައް ހިމެނެއެވެ. މީގެ އިތުރުން މަގުމަތީގެ ރައްކާތެރިކަމާއި، ސައިބަރ ކްރައިމް އާއި ކުޑަކުދިންނާ ގުޅުންހުރި މައުލޫމާތާއި، ފުލުހުން ފޯރުކޮށްދޭ އެހެނިހެން މުހިންމު ހިދުމަތްތަކާ ބެހޭ މައުލޫމާތު ދިނުންވެސް މި ހަރަކާތުގެ ތެރެއިން ކުރިއަށް ގެންގޮސްފައިވެއެވެ.
މި ހަރަކާތުގައި 800 އަށްވުރެ ގިނަ ތުއްތު ކުދިން ބައިވެރިވެފައިވެއެވެ.