ސީއޭ މޯލްޑިވްސްގެ މަސައްކަތްތަކާއެކު އިންވެސްޓަރުންގެ ޝައުގުވެރިކަން އިތުރުވެގެންދާނެ: ޑީބީއެމްގެ ސީއީއޯ

ސީއޭ މޯލްޑިވްސްގެ މަސައްކަތްތަކާއި އެކު އިންވެސްޓަރުންގެ އިތުބާރު ރާއްޖެއަށް އިތުރުވެގެންދާނެ ކަމަށް ޑިވެލޮޕްމެންޓް ބޭންކު އޮފް މޯލްޑިވްސް، ޑީބީއެމްގެ ސީއީއޯ ނޮއެލް ގްރެގަރ ޕެޓަރސަން-ޖޯންސް ވިދާޅުވެއްޖެއެވެ.

ޕެޓަރސަން-ޖޯންސް މިހެން ވިދާޅުވީ ދިވެހިރާއްޖޭގައި ބާއްވާ އެކައުންޓިން ދާއިރާގެ އެންމެ ބޮޑު ފޯރަމްކަމަށްވާ "އައިއެފްއާރުއެސް އެންޑް އައިއެސްއޭ ފޯރަމް" ފެށުމުގެ ރަސްމިއްޔާތު ޝަރަފްވެރިކޮށްދެއްވާ ދެއްކެވި ވާހަކަފުޅުގައެވެ.

"އައިއެފްއާރުއެސް އެންޑް އައިއެސްއޭ ފޯރަމް" ފެށުމުގެ ރަސްމިއްޔާތު ޝަރަފްވެރިކޮށްދެއްވާ ދެއްކެވި ވާހަކަފުޅުގައި ޑީބީއެމްގެ ސީއީއޯ ނޮއެލް ގްރެގަރ ޕެޓަރސަން-ޖޯންސް ވިދާޅުވީ އޮޑިޓަރުންނާއި އޮޑިޓް ކުރެވިފައިވާ މާލީ ބަޔާންތަކުގެ ފެންވަރު ދެމެހެއްޓުމުގެގޮތުން ސީއޭ މޯލްޑިވްސް ކުރިއަށް ގެންދާ އަދި ގެންދަން ކަނޑައެޅިފައިވާ ކަންކަމާއި ގުޅިގެން ދިވެހިރާއްޖެއަށް އަންނަ އިންވެސްޓަރުންގެ އިތުބާރު ބޮޑުވާނެކަމަށެވެ.

ޚާއްސަކޮށް ފަތުރުވެރިކަމާއި މަސްވެރިކަމުގެ ސިނާޢަތް ފަދަ އިޤްތިސާދުގައި މުހިންމު ދާއިރާތަކުގައި ސައްހަ މާލީ ރިޕޯޓުތަކަކީ ބޭރުގެ އިންވެސްޓަރުން ރާއްޖެއަށް އޮންނަ އިތުބާރު އިތުރުވެގެންދާނެ ކަމެއްކަން ސީއީއޯ ޕެޓަރސަން-ޖޯންސް ވިދާޅުވިއެވެ.

"ރާއްޖޭގެ އިޤްތިސާދުގައި ހިމެނޭ މައިގަނޑުގެ ސިނާއަތްތަކުގައި ބޭރުގެ އިންވެސްޓަރުންގެ ޝައުގުވެރިކަމާއި އިތުބާރު މި ލިބެނޭ މާލީ ހިސާބުތައް ބެލެހެއްޓުމުގައި ގެންގުޅޭ ހަރުދަނާކަމުގެ މައްޗަށް،" ޕެޓަރ ސަން-ޖޯންސް ވިދާޅުވިއެވެ.

ހާމަކަން ބޮޑު މާލީ އުސޫލުތަކާއި، އިންވެސްޓަރުންގެ އިތުބާރާއި، ދެމެހެއްޓެނިވި އިޤްތިސާދީ ކުރިއެރުމާ އޮންނަ ގުޅުމަށް ސީއެ މޯލްޑިވްސްއިން ކުރާ މިފަދަ މަސައްކަތްތަކުން ލިބޭނެ ކުރިއެރުމަށްވެސް ޕެޓަރސަން-ޖޯންސް އަލިއަޅުއްވާލެއްވިއެވެ.

ސީއޭ މޯލްޑިވްސްގެ "އައިއެފްއާރުއެސް އެންޑް އައިއެސްއޭ ފޯރަމް" އޮންނާނީ މިމަހުގެ 14 އިން 15 އަށެވެ. މި ފޯރަމުގައި މިއަހަރު 250 އެއްހާ މީހުން ބައިވެރިވެފައިވެއެވެ. މިއަހަރަކީ ސީއޭ މޯލްޑިވްސްއިން މި ފޯރަމް ބާއްވާ 3 ވަނަ އަހަރެވެ. ފުރަތަމަ ފަހަރަށް ބާއްވާފައިވަނީ 2022 ވަނަ އަހަރުއެވެ.

އަދި މި ފޯރަމަކީ ދިވެހިރާއްޖޭގައި މަސައްކަތްކުރާ އެކައުންޓެންޓުންނާއި އޮޑިޓަރުންގެ މެދުގައި ޢިލްމު ހިއްސާކުރުމާއި، މަޝްވަރާ އުފެއްދުމާއި، ފަންނީ ތަޖުރިބާ އިތުރުކުރުމަށް މުހިންމު ފޯރަމެކެވެ. އަދި މި ފޯރަމްގައި ޕްރޮފެޝަނަލް އެކްސެލެންސް ޕްރޮމޯޓްކޮށް، މެދުނުކެނޑި އުނގެނުމާއި އެކައުންޓިންގ ޕްރޮފެޝަނަލުންގެ މެދުގައި އަޚްލާޤީ އުސޫލުތައް ތަޢާރަފްކުރުމަށް ހިތްވަރުލިބިގެންދެއެވެ.

އެކައުންޓެންޓްސް އޮފް ދަ މޯލްޑިވްސް، ސީއޭ މޯލްޑިވްސްއަކީ ދިވެހިރާއްޖޭގެ އެކައުންޓެންސީ ޕްރޮފެޝަންއާ ގުޅޭ ކަންތައްތައް ބައިނަލްއަގުވާމީ އުސޫލުތަކާއި ހަމަތަކާ އެއްގޮތްވާ ގޮތުގެމަތިން ތަންޒީމުކޮށް، ދިވެހިރާއްޖޭގައި އެކައުންޓަންސީ ޕްރޮފެޝަނެއް ގާއިމުކޮށް، އެ ޕްރޮފެޝަން ކުރިއެރުވުމަށް މަގުފަހިކުރުމަށްޓަކައި، ރާއްޖޭގެ ޗާޓަޑް އެކައުންޓެންޓުގެ ގާނޫނުގެ ދަށުން އުފައްދަވާފައިވާ އިންސްޓިޓިއުޓްއެކެވެ.