ވޮލީބޯލް އެސޯސިއޭޝަން އޮފް މޯލްޑިވްސް (ވީއޭއެމް) އިން އިންތިޒާމުކޮށްގެން ބާއްވާ ގައުމީ ބީޗް ވޮލީބޯލް ލީގު 2024 ގެ ފިރިހެން ޑިވިޝަނުގެ ކޮލިފިކޭޝަން ބުރުގައި ހަތް ޕެއާ ހިމެނިއްޖެ އެވެ.
ކޮލިފިކޭޝަން ބުރުގެ މެޗުތައް ހުކުރު ދުވަހުގެ ހަވީރު ފެށިއިރު، މި ބުރުގެ މެޗުތައް ކުރިއަށްދަނީ ދެ ގްރޫޕަކަށް ބަހާލައިގެންނެވެ. އެގޮތުން ގްރޫޕް އޭގައި ހަތަރު ޕެއާ އަދި ގްރޫޕް ބީގައި ތިން ޕެއާ ހިމެނެއެވެ.
ގްރޫޕް އޭގައި ހިމެނޭ ޕެއާ ތަކަކިީ ހޫދު އާއި ދާއިން، ރަޔާން އާއި ނަވީން، ފަރުހާން އާއި ޔަމާން އަދި ޝައިހާން އާއި ރާކިން ގެ ޕެއާ އެވެ. ގްރޫޕް ބީގައި ހިމެނޭ ތިން ޕެއާއަކީ އަދުނާން އާއި ޝިމާލް، ފަލާހު އާއި ނަސްރުﷲ އަދި ނިހާދު އާއި ޔޫސުފެވެ.
މި ކޮލިފިކޭޝަން ބުރުން ލީގުގެ ފައިނަލް ބުރަށް ކޮލިފައިވާނީ ތިން ޕެއާއެވެ. އެއީ ކޮލިފިކޭޝަން ބުރުގެ ގްރޫޕު ފިޔަވަހީގެ ތެރެއިން ގްރޫޕް އޭ އިން ދެ ޓީމު އަދި ގްރޫޕް ބީ އިން އެއް ޓީމެވެ.
ބީޗުވޮލީ ލީގުގެ ފައިނަލް ބުރުގައި ވާދަކުރާނީ މި ތިން ޓީމާއެކު ޖުމްލަ ފަސް ޓީމެވެ. ދެން މި ބުރުގައި ވާދަކުރާނީ އެންމެ ފަހުގެ ލީގު ޗެމްޕިއަން އިސްމާޢީލް ސާޖިދު (ކުޑަ ކާއްޓޭ) އާއި އާދަމް ނަސީމް (އެޑަމް) ގެ ޕެއާ އަދި ރަނަރަޕް މުޙައްމަދު އަލީ (ޑެންޒޯ) އާއި އަޙްމަދު މުހައްމަދު (ކޯކޭ) ގެ ޕެއާ އެވެ.