2026 ވަނަ އަހަރު ބޭއްވުމަށް ހަމަޖެހިފައިވާ ވޯލްޑްކަޕްގެ ކޮލިފައިންގެ ޔޫރަޕް ބައްރުގެ ގުރުއަތުލުން އިއްޔެ ބާއްވައިފި އެވެ.
ސްވިޒަލޭންޑްގެ ވެރިރަށް ޒިއުރިކްގައި އިއްޔެ ބޭއްވި ހާއްސަ ރަސްމިއްޔާތުގައި ޔޫރަޕް ބައްރުގެ ގުތުއަތުލުން ބާއްވާފައިވަނީ ޓީމުތައް 12 ގްރޫޕަކަށް ބަހާލައިގެންނެވެ. އެގޮތުން ކޮންމެ ގްރޫޕަކުންވެސް އެއްވަނައަށް ދާ ޓީމަކަށް ސީދާ ވޯލްޑްކަޕްގެ ޖާގައެއް ލިބިގެންދާއިރު ދެވަނަ އަށް ދާ 12 ޓީމާއި ޔޫއެފާ ނޭޝަންސް ލީގުގެ ގްރޫޕް ތަކުން ތިންވަނައަށް ދާ އެންމެ މޮޅު ހަތަރު ޓީމާއިއެކު ޕްލޭ އޮފް މެޗުތަކެއް ކުޅުމަށްފަހު އެއްވަނައަށްދާ ހަތަރު ޓީމަށް ވޯލްޑްކަޕްގެ ޖާގައެއް ލިބިގެންދާނެ އެވެ.
މީގެ ކުރިން ވޯލްޑްކަޕްގައި 32 ޓީމު ވާދަކުރި ނަމަވެސް 2026 ވަނަ އަހަރުން ފެށިގެން ވޯލްޑްކަޕްގައި ވާދަކުރާ ޓީމުތަކުގެ އަދަދު ވަނީ 48 ޓީމަށް އިތުރު ކޮށްފަ އެވެ. އެހެންކަމުން މި ފަހަރުގެ މުބާރާތުގައި ޔޫރަޕަށް ވަނީ 16 ޖާގަ ލިބިފަ އެވެ. މީގެ ކުރިން ވޯލްޑްކަޕްގައި ވާދަކުރަނީ ޔޫރަޕްގެ 13 ޓީމެވެ.
ޔޫރަޕްގެ ގައުމުތައް 12 ގްރޫޕަކަށް ބަހާލާފައިވާއިރު އަށް ގްރޫޕުގައި ހިމެނޭނީ ނޭޝަންސް ލީގުގެ ކުއާޓަރ ފައިނަލުގައި ވާދަކުރާ ޓީމުތަކެވެ. ނޭޝަންސް ލީގުގެ ކުއާޓަރ ފައިނަލުގެ މެޗުތައް ކުޅޭނީ އަންނަ އަހަރުގެ މާޗު މަހުގަ އެވެ.
ވޯލްޑްކަޕްގެ ކޮލިފައިންގެ މެޗުތައް އަންނަ އަހަރުގެ މާޗު މަހުން ފެށިގެން ނޮވެމްބަރ މަހުގެ ނިޔަލަށް ހޯމް އެންޑް އަވޭ އުސޫލުން ކުރިއަށް ގެންދިއުމަށް ވަނީ ހަމަޖެހިފަ އެވެ.
2026 ވަނަ އަހަރުގެ ވޯލްޑްކަޕް ބޭއްވުމަށް ހަމަޖެހިފައިވަނީ އެމެރިކާ އާއި މެކްސިކޯގެ އިތުރުން ކެނެޑާ ގައެވެ.