ސޫރިޔާއާއި ލުބުނާނުގެ ސަރަޙައްދީ ރޮނގު ކައިރީ އޮންނަ އުސް ފަރުބަދައެއް ކަމަށްވާ ޖަބަލް އަލް-ޝައިޚުގައި ކުރިއަށް އޮތް ފިނި މޫސުމުގައި ޔަހޫދީ ފައުޖުތައް ޤާއިމުވެ ތިބުމަށް ތައްޔާރުވުމަށް ޔަހޫދީ ދައުލަތުގެ ދިފާޢީ ވަޒީރު އިސްރާއީލް ކަޓްޒް ޢަމުރު ކުރައްވައިފިއެވެ.
ސޫރިޔާގައި އެތައް އަހަރެއް ވަންދެން ވެރިކަން ކުރައްވަމުން ގެންދެވި ރައީސް ބައްޝާރު އަލް-އަސަދުގެ ވެރިކަން ކުއްލި ގޮތަކަށް ނިމުމަކަށް އައުމުން އެ ދަނޑިވަޅުގައި ޔަހޫދީ ފައުޖުތަކުން ވަނީ ސޫރިޔާގެ ސަރަޙައްދުގެ ތެރޭގައި ހިމެނޭ ބަފަރު ޒޯނަކަށް ވަދެގަނެ އެ ސަރަޙައްދު އިސްތިޢުމާރުކޮށްފައެވެ.
ޔަހޫދީ ދައުލަތުގެ ދިފާޢީ ވުޒާރާއިން ނެރުނު ބަޔާނެއްގައި ބުނީ ސޫރިޔާގެ މިހާރުގެ ޙާލަތަށް ބަލައި، 2،800 މީޓަރު އުސް ޖަބަލް އަލް-ޝައިޚުގެ އެންމެ މަތީގައި ޔަހޫދީ ފައުޖުތައް ޤާއިމުވެ ތިބުމަކީ ސަލާމަތީ ގޮތުން ވަރަށް މުހިންމު ފިޔަވަޅެއް ކަމަށެވެ.
ޖަބަލް އަލް-ޝައިޚުގައި ޔަހޫދީ ފައުޖުތައް ޤާއިމުވެ ތިބުމަށް ނިންމުމުން އެ ސަރަޙައްދަކީ ޔަހޫދީންނަށް ކިހާ މުހިންމު ސަރަޙައްދެއްކަން ދޭހަ ކޮށްދެއެވެ. ދިމިޝްޤު ރީތިކޮށް ފެންނާނެ ސަރަޙައްދެއްގައި ޔަހޫދީން ޤާއިމުވާން ނިންމުމަކީ ޔަހޫދީ ފައުޖުތައް ސޫރިޔާގައި ގިނަ ދުވަސްތަކެއް ވަންދެން ދެމި ތިބޭނެކަމަށް އިޝާރާތެކެވެ. ޔަހޫދީ ދައުލަތުގެ ނިރުބަވެރި ބޮޑުވަޒީރު ބެންޖަމިން ނަތަންޔާހޫ ވެސް ވަނީ 1973ވަނަ އަހަރު ޢަރަބިންނާ އެކު ޔަހޫދީން ކުރި ހަނގުރާމައަށް ފަހު ސޮއި ކޮށްފައިވާ ބާރުތައް ވަކިކުރުމުގެ އެއްބަސްވުން ތަންފީޒު ކުރުމަށް ފިޔަވަޅުތަކެއް ނާޅާހާ ހިނދަކު ބަފަރު ޒޯނުގައި ޔަހޫދީ ފައުޖުތައް ދެމިތިބޭނެ ކަމަށް ބުނެފައެވެ.