ސައިބަރ ކުށުގެ ޝިކާރައިން ސަލާމަތްވެ ތިބުމަށް ޑިޖިޓަލް ވަސީލަތްތައް ބޭނުންކުރާ މީހުން ހޭލުންތެރިވާންޖެހޭ: ސީޕީ ޝުޖާޢު
ސައިބަރ ކުށުގެ ޝިކާރައިން ސަލާމަތްވެ ތިބުމަށް ޑިޖިޓަލް ވަސީލަތްތައް ބޭނުންކުރާ ހުރިހާ އުމުރުފުރައިގެ މީހުންވެސް ހޭލުންތެރިވާން ޖެހޭކަމަށް ކޮމިޝަނަރ އޮފް ޕޮލިސް ޢަލީ ޝުޖާޢު ވިދާޅުވެއްޖެއެވެ. ކޮމިޝަނަރ މިހެން ވިދާޅުވީ ސައިބަރ އެކްސްޕޯ ހުޅުވުމުގެ ރަސްމިއްޔާތުގައި ވާހަކަފުޅު ދައްކަވަމުންނެވެ.
"ސައިބަރ އެކްސްޕޯ 2024" ހުޅުވުމުގެ ރަސްމިއްޔާތުގައި ވާހަކަފުޅު ދައްކަވަމުން ކޮމިޝަނަރ އޮފް ޕޮލިސް ޢަލީ ޝުޖާޢު ވިދާޅުވީ ސައިބަރ ސެކިއުރިޓީގެ ދާއިރާއިން އައު ފަންނުވެރިން ބިނާކޮށް، ދާއިރާއަށް ލޯބި ޖައްސަން ޖެހޭކަމަށާއި، އެއާއެކު ހުނަރުވެރި ޒުވާނުންވެސް ބިނާކުރެވޭނެކަމަށެވެ.
"ސައިބަރ އެކްސްޕޯ 2024" އަކީ ޓެކްނޮލޮޖީގެ ގޮތުން ކުރިއަރިއެރުންތަކެއް ހޯދިފައިވާ މިފަދަ ދުވަސްވަރެއްގައި ދާއިރާގައި މަސައްކަތްކުރާ ފަރާތްތައް އެއްތަނަކުން ބައްދަލުވެ ގުޅުން ބަދަހިކުރުމަށް ލިބިގެންދާނެ މުހިއްމު ފުރުޞަތެއްކަމަށެވެ. ސައިބަރ ކުށްތަށް އިތުރުވެ އެފަދަ ކުށްތައް ފުޅާވަމުންދާ ދުވަސްވަރެއްގައި އެކަންކަން ހުއްޓުވަންޖެހޭ ކަމަށާއި އެކަމުގައި ސައިބަރ ސެކިއުރިޓީގެ ދައުރު ފުޅާކުރަންޖެހޭ ކަމަށްވެސް ވިދާޅުވިއެވެ.
"އަޅުގަނޑުމެންގެ އަމާޒަކަށްވާންވީ މި ދާއިރާތަކުގެ ކުދި އަދި މެދުފަންތީގެ ވިޔަފާރީތަކާއި ބޮޑެތި ވިޔަފާރީތައް މިގޮތަށް ބައްދަލުވެ ގުޅުން ބަދަހިކުރަން. އޭގެ ނަތީޖާއަކަށް ވެގެންދާނީ ކުދި ވިޔަފާރީތަކުގެ ޑިޖިޓަލް ސެކިއުރިޓީ ވަރުގަދަ ކުރުމަށް އައު ދޮރުތަކެއް ހުޅުވިގެންދިޔުން. މި ސައިބަރ އެކްސްޕޯ ބޭއްވުމުގެ އެންމެ ބޮޑު އެއް އަމާޒަކީވެސް މިއީ. ޓެކްނޮލޮޖީއާ އެއް ހަމައެއްގައި ރާއްޖޭގެ ދުވެލި ހިފަހައްޓަން މަސައްކަތް ކުރަންޖެހޭ" ކޮމިޝަނަރ ވިދާޅުވިއެވެ.
ފުލުހުންގެ ތަފާސް ހިސާބުތަކަށް ބަލާއިރު މިދިޔަ އަހަރަށްވުރެ މިއަހަރު ހުށަހެޅި ސައިބަރ ކުށްތަކުގެ އަދަދު ދެ ގުނަ އިތުރެވެ. 2023 ވަނަ އަހަރު ސައިބަރ ކުށުގެ 99 މައްސަލަ ފުލުހުންނަށް ހުށަހެޅުނުއިރު މިއަހަރުގެ މިހާތަނަށް 173ށްވުރެ ގިނަ މައްސަލަ ފުލުހުންނަށް ހުށަހަޅާފައިވެއެވެ.
މިކަމާއި ގުޅިގެން ކޮމިޝަނަރ ވިދާޅުވީ އެންމެ ގިނައީ ހެކް ކުރުމުގެ މައްސަލަތައް ކަމަށެވެ. އެގޮތުން ބޭންކް އެކައުންޓްތައް ހެކް ކުރުމުގެ މައްސަލަތަކާއި ސޯޝަލް މީޑިއާ އެކައުންޓްތައް ހެކް ކުރުމުގެ މައްސަލަތަކުގެ އިތުރުން ސަރުކާރާއި ޕްރައިވެޓް އޮފީސްތަކުގެ ވެބްސައިޓްތަކުގެ މައްސަލަތައް ހިމެނޭކަމަށް ވިދާޅުވިއެވެ. އަދި ގަވާއިދާ ޚިލާފަށް ލިޔުންތައް ފޯޖުކުރުމުގެ މައްސަލަތަކާއި އޮންލައިން ވިޔަފާރީގެ ނަމުގައި ސޯޝަލް މީޑިއާގައި ޕޭޖްތައް ހަދައި މަކަރާ ހީލަތުން ފައިސާ ހޯދުމުގެ މައްސަލަތައް އިތުރު ކަމަށްވެސް ކޮމިޝަނަރ ވިދާޅުވިއެވެ.
އެފަދަ މައްސަލަތައް މަދުކުރެވޭނީ ރައްޔިތުން ހޭލުންތެރިވެގެންކަން ފާހަގަކުރައްވާ ކޮމިޝަނަރ ވިދާޅުވީ މިއަދު ހުރިހާ މަސައްކަތެއްވެސް ކުރަމުންދަނީ ޑިޖިޓަލް ވަސީލަތްތައް މެދުވެރިކޮށް ކަމަށްވާއިރު ގިނަ މީހުން އެކަންކަމަށް ހޭލުންތެރިނުވުމުން ސައިބަރ ކުށުގެ ޝިކާރައަކަށްވާ ކަމަށެވެ. އަދި ހުރިހާ އުމުރުފުރައިގެ މީހުން މިކަމަށް ހޭލުންތެރިކުރަންޖެހޭކަން ޝުޖާޢު ފާހަގަކުރެއްވިއެވެ.
3 ދުވަހުގެ މުއްދަތަކަށް ދިވެހި ފުލުހުންގެ ޚިދުމަތުން ކުރިއަށްގެންދާ "ސައިބަރ އެކްސްޕޯ 2024" އަކީ ސަރުކާރުގެ މުއައްސަސާތަކާއި ކުންފުނިތަކާއި އަމިއްލަ ކުންފުނިތަކާއި ފަންނީ ބޭފުޅުންނަށް ހުޅުވައިގެން ކުރިއަށް ގެންދާ އެކްސްޕޯއެކެވެ. މި އެސްޕޯއަކީ އެންމެން ގުޅިގެން ރައްކާތެރި ޑިޖިޓަލް މާހައުލެއް ގާއިމުކުރުމާއި އާންމު ރައްޔިތުން ސައިބަރ ސެކިއުރިޓީއަށް އަހުލުވެރިކުރުވުމަށް ބާއްވާ އެކްސްޕޯއެކެވެ.