ފުޓްބޯޅައިގެ ފޯރި އަލުން ގަދަކުރުމުގެ އަމާޒުގައި މުޅި ރާއްޖެއަށް ހުޅުވާލައިގެން ބާއްވާ ނައިންޓީ ޕްލަސް ގޯލްޑް ކަޕް 2024 ގެ ދެވަނަ ބުރުގައި ތ. ތިމަރަފުށި ބަލިކޮށް، މުބާރާތުގެ ކުއާޓާ ފައިނަލުގެ ޖާގައެއް ކ. ގުރައިދޫން ހޯދައިފިއެވެ.
ގައުމީ ފުޓްބޯޅަ ދަނޑުގައި މިއަދު ހަވީރު ކުޅުނު ގްރޫޕް އީގެ މެޗު ގުރައިދޫން ކާމިޔާބުކޮށްފައިވަނީ 1-0 ގެ ނަތީޖާއަކުންނެވެ. މި މޮޅާއެކު މި ގްރޫޕުގެ އެއްވަނައިގައި ގުރައިދޫ އޮޮތީ ތިން ޕޮއިންޓް ހޯދައިގެންނެވެ. ދެވަނައިގައި އޮތް ފުވައްމުލައް ސިޓީ އާއި ތިންވަނައިގައި އޮތް ތިމަރަފުއްޓަށް ޕޮއިންޓެއް ލިބިފައިވާއިރު، ތިމަރަފުއްޓަށް މިހާރު ވަނީ ކުއާޓާގެ ޖާގައެއް ހޯދުމުގެ އަމިއްލަ ބާރު ގެއްލިފައެވެ.
މިއަދު ހަވީރު ކުޅުނު މެޗުގައި ދެ ޓީމުގެ ފަރާތުން ހަމަހަމަ ކުޅުމެއް ފެނިގެންދިޔައިރު، މި މެޗުގައި ފެނިގެންދިޔަ ހަމައެކަނި ލަނޑު ގުރައިދޫން ކާމިޔާބުކޮށްފައިވަނީ ފުރަތަމަ ހާފުގައެވެ. މެޗު ފަށައިގެން 13 ވަނަ މިނެޓުގައި މުޙައްމަދު ނާއިމް ދިން ބޯޅައަކުން މި ލަނޑު ޖަހައިދިނީ ބިދޭސީ ފޯވާޑް އަޙްމަދު އިބްރާހީމެވެ.
މި މުބާރާތުގެ ދެވަނަ ބުރުގައި 12 ޓީމެއް ހިމެނޭއިރު، މި ޓީމުތައް ވަނީ ހަތަރު ގްރޫޕަކަށް ބަހާލާފައެވެ. ކޮންމެ ގްރޫޕެއްގައި ތިން ޓީމު ހިމެނޭއިރު، އެ ގްރޫޕުތަކުން އެންމެ ކުރީގައި ނިންމާ ދެ ޓީމަށް މުބާރާތުގެ ކުއާޓާ ފައިނަލުގެ ޖާގަތައް ލިބިގެންދާނެއެވެ.