ފަރަންސޭސިވިލާތުގެ ސިފައިން ތަޝާދުން ފައިބަން ފަށައިފިއެވެ.
ފަރަންސޭސިވިލާތުގެ އަސްކަރިއްޔާއިން ބުނީ ތަޝާދުގެ ވެރިރަށް އަންޖަމީނާގައި އޮތް އެ ޤައުމުގެ އަސްކަރީ ދެ މަތިންދާބޯޓު އަނބުރާ ގެންގޮސްފައިވާ ކަމަށެވެ. ފަރަސްސޭސިވިލާތުން އެހެން ބުނީ ތަޝާދާ އެކު އޮތް ދިފާޢީ އެއްބާރުލުމުގެ އެއްބަސްވުން ނިންމައިލައިކަން ތުޝާދުން އިޢުލާނު ކުރިތާ ދެ ހަފުތާ ފަހުންނެވެ.
ނޮވެމްބަރު މަހުގެ 28ވަނަ ދުވަހު ސަރަޙައްދީ މައްސަލަތަކުގައި ހުޅަނގަށް ވާގިވެރިވާ ތަޝާދުން ފަރަންސޭސިވިލާތާއެކު އޮތް ދިފާޢީ އެއްބާރުލުގެ އެއްބަސްވުން ނިމުމަކަށް ގެންނަކަން އިޢުލާނު ކުރުން ވެގެންދިޔައީ ކުއްލި ސިހުމަކަށެވެ. ތަޝާދުން އެއްބަސްވުން ނިމުމަކަށް ގެންނަކަމުގެ އެއްވެސް އިޝާރާތެއް ފަރަންސޭސިވިލާތަށް ލިބިފައިވާ ކަމެއް އެނގިފައެއް ނުވެއެވެ. ނަމަވެސް މީގެ އެއް މަސް ކުރިން އެ ޤައުމުގެ ރައީސް އެމަނުއެލް މެކްޚޮންވަނީ ތަޝާދާއި ގެބޯންނާއި އައިވަރީ ކޯސްޓުގައި ތިބި ފަރަންސޭސިވިލާތުގެ ސިފައިންގެ ޢަދަދު މަދުކުރެވިދާނެ ގޮތްތަކާ ގުޅޭ ރިޕޯޓެއް ހުށަހަޅުއްވައިފައެވެ.
ހުޅަނގު އެފްރިކާގެ ބައެއް ޤައުމުތަކުގައި ހިނގާފައިވާ އަސްކަރީ ބަޣާވާތްތަކުގެ ސަބަބުން ފަރަންސޭސިވިލާތާ ދެކޮޅަށް އެ ޤައުމުތަކުގައި އުފެދެމުން ދިޔަ ޝުޢޫރުތަކާ ގުޅިގެން އެ ޤައުމުން މިހާރުވެސް ވަނީ މާލީއާއި ބުރްކިނާ ފަސޯގައި ތިބި އެ ޤައުމުގެ ސިފައިން އަނބުރާ ގެންގޮސްފައެވެ. އެ ޤައުމުގެ ސިފައިން ތަޝާދުން ފޭބުމުން ސަހެލް ސަރަޙައްދުގައި އެތައް އަހަރެއް ވަންދެން ފަރަންސޭސިވިލާތުގެ ސިފައިން ޤާއިމުވެފައި ތިބިތިބުން ނިމުމަކަށް އައިސް އެ ސަރަޙައްދުގައި ޙަރަކާތްތެރިވަމުންދާ ހަނގުރާމަވެރި ޖަމާޢަތްތަކާ ދެކޮޅަށް ސީދާ ފަރަންސޭސިވިލާތުން ކުރަމުންދިޔަ މަސައްކަތްތައް ނިމުމެއް އަންނާނެއެވެ.
ތަޝާދުގައި ފަރަންސޭސިވިލާތުގެ 1،000އެއްހާ ސިފައިން އަދިވެސް އެބަ ތިއްބެވެ. އެ ޤައުމުން ފަރަންސޭސިވިލާތުގެ ސިފައިން ބޭލުމާ ގުޅޭ އެއްބަސްވުމަކާ ހަމައަށް އައުމަށް އަދިވެސް ގިނަ ހަފުތާތަކެއް ނަގާނެއެވެ.