ދަފްތަރުގެ ސަބަބުން ޒުވާނުން މަސްވެރިކަމުގެ ސިނާޢަތަށް ނެރެވޭނެ: ވަޒީރު ޝިޔާމް

ސަރުކާރުން މިހާރު އެކުލަވާލަމުންދާ މަސްވެރިންގެ ދަފްތަރުގެ ސަބަބުން ޒުވާނުން މަސްވެރިކަމުގެ ސިނާޢަތަށް ނުކުތުމަށް މަގުފަހިވާނެކަމަށް މަސްވެރިކަމާއި ކަނޑުގެ ވަޞީލަތްތަކާބެހޭ ވަޒީރު އަޙްމަދު ޝިޔާމް ވިދާޅުވެއްޖެއެވެ.

ވަޒީރު މިހެން ވިދާޅުވީ މިއަހަރުގެ މަސްވެރިންގެ ދުވަހާ ގުޅުވައިގެން ވުޒާރާއިން ބޭއްވި "މަސްވެރިންގެ ގުންޒަރު"ގެ ތެރެއިން ބޭއްވި ޕެނަލް ޑިސްކަޝަންގައި ވާހަކަފުޅުދައްކަވަމުންނެވެ.

މަސްވެރިންގެ ގުންޒަރު މިހާރު ފަށާފައިވާއިރު، މަސްވެރިންނަށް ދިމާވާ ދަތިތަކާއި އެމީހުންގެ ކަންބޮޑުވުންތައް ސަރުކާރާ ވަނީ ޙިއްސާކޮށްފައެވެ. އަދި ސިނާޢަތާގުޅޭ މަޝްވަރާތައްކުރުމަށް ޚާއްސަ ޕެނަލް ޑިސްކަޝަނެއް ވަނީ ކުރިއަށްގެންގޮސްފައެވެ. މި ޕެނަލް ޑިސްކަޝަންގައި، ސަރުކާރުން އެކުލަވާލާ މަސްވެރިންގެ ދަފްތަރުން ލިބޭނެ ފައިދާތަކާ ގުޅޭގޮތުން މަސްވެރިއަކު ވަނީ ސުވާލުކޮށްފައެވެ.

އެސުވާލަށް ޖަވާބުދެއްވަމުން މަސްވެރިކަމާއި ކަނޑުގެ ވަޞީލަތްތަކާބެހޭ ވަޒީރު އަޙްމަދު ޝިޔާމް ވިދާޅުވީ މަސްވެރިންގެ ދަފްތަރު އެކުލަވާލުމަށް މިހާރު ކުރަމުންދާ މަސައްކަތުގެ ތެރެއިން ކަންބޮޑުވާންޖެހޭ މިންވަރަށް މަސްވެރިންގެ ތެރޭގައި ދިވެހިން މަދު ކަމަށް ދެނެގަނެވިފައިވާކަމަށެވެ. އެހެންކަމުން މި ސިނާޢަތަށް ދިވެހިންގެ މެދުގައި ޝައުޤު އުފައްދާ، ޒުވާން މަސްވެރިން ސިނާޢަތަށް ނެރުމަށް މަސައްކަތްތަކެއް ކުރަންޖެހޭކަން ވަޒީރު ފާހަގަކުރެއްވިއެވެ. އަދި މަސްވެރިންގެ ދަފްތަރެއް އެކުލަވާލުމުން މި ސިނާޢަތަށް ޒުވާނުންގެ ހިތުގައި ލޯބި ޖެއްސިދާނެކަން ވަޒީރު ފާހަގަކުރެއްވިއެވެ.

ވަޒީރު ވިދާޅުވީ ގިނަ ޒުވާނުން މަސްވެރިކަމުގެ ސިނާޢަތަށް ނުނިކުންނަ އެއް ސަބަބަކީ ބޭންކުތަކުގައި ހުންނަ ތަފާތު ލުއި ލޯން ސްކީމްތައް މަސްވެރިންނަށް ނުލިބުން ކަމަށެވެ. އަދި އެގޮތަށް އެކަން ދިމާވަނީ ރަސްމީ ވަޒީފާއެއް އަދާކުރާ ބަޔެއްގެ ގޮތުގައި މަސްވެރިން ދަފްތަރުވެފައި ނެތުމުންކަމަށާއި މަސްވެރިންގެ ދަފްތަރާއެކު މިކަމަށް ހައްލު ލިބޭނެކަމަށް ވަޒީރު ވިދާޅުވިއެވެ. އަދި އޭރުން މިސިނާޢަތުން ޒުވާން މަސްވެރިން ފެންނާނެކަމަށްވެސް ވަޒީރު ވިދާޅުވިއެވެ.

"މަސްވެރިންނެއް ނުދަނޭ ދައުލަތެއް. ބޭންކުތަކުން ވެސް ނުދަނޭ މަސްވެރިންނެއް. ގިނަ ދިވެހި ޒުވާނުން ބޭންކުތަކުން ތަޢާރަފްކުރާ ލުއި ލޯންތައް ބޭނުންކުރޭ. ކުއްލިއަކަށް ބޭނުންވާ ޒަރޫރީ ކަންކަން ޙާސިލްވެގެންދޭ މި ލޯންތަކުގެ ސަބަބުން. އެހެންވީމަ ދަފްތަރާއެކީގައި މަސްވެރިންނަކީ ދައުލަތް ދަންނަ ބަޔަކަށްވެއްޖެނަމަ، މިފަދަ ފައިސާ މަސްވެރިންނަށް ލިބޭނެ. އަދި މި ސިނާޢަތަށް ޒުވާނުން ވަންނާނެ." ވަޒީރު ވިދާޅުވިއެވެ.

މިހާރު ސަރުކާރުން އެކުލަވާލަމުންދާ މަސްވެރިންގެ ދަފްތަރުގެ އާދަހަމަ ހިއްސާކުރައްވަމުން ވަޒީރު ވިދާޅުވީ މަސްވެރިކަމުގެ ލައިސެންސް ދެވިފައިހުރި އުޅަނދުތަކުގެ ތެރެއިން 90 އިންސައްތަ އުޅަނދު މިހާތަނަށް ދަފްތަރުވެފައިވާ ކަމަށެވެ. އަދި މި ދަފްތަރު ވާނީ މަސްވެރިންނަށް އިޖުތިމާޢީ ރައްކާތެރިކަން ކަށަވަރުކޮށްދޭނެ ދަފްތަރަކަށްކަމަށްވެސް ވަޒީރު ވިދާޅުވިއެވެ.

"މަސްވެރިންގެ ގުންޒަރު" ކުރިއަށްގެންދިއުމަށް ހަމަޖެހިފައިވަނީ މިމަހުގެ 11 ވަނަ ދުވަހުން ފެށިގެން 13 ވަނަ ދުވަހާ ހަމައަށެވެ. މި ގުންޒަރުގައި މަސްވެރިންގެ ކަންބޮޑުވުންތަކަށް ހައްލު ހޯދައިދިނުމުގައި މުހިންމު މަޝްވަރާތަކެއް ކުރެވޭނެކަމަށް ސަރުކާރުން ވިދާޅުވެއެވެ. މިއަހަރުގެ ގުންޒަރުގައި 22 ރަށުން 43 މަސްވެރިން ބައިވެރިވެއެވެ. އަދި މަސް ޕްރޮސެސްކުރާ 8 ކުންފުންޏެއްވެސް ބައިވެރިވެއެވެ.

ކޮންމެ އަހަރަކުވެސް މަސްވެރިންގެ ދުވަސް ފާހަގަކުރަނީ ޑިސެންބަރުމަހުގެ 10 ވަނަ ދުވަހުއެވެ. މިއަހަރުގެ މަސްވެރިންގެ ދުވަހުގެ ރަސްމީ ޖަލްސާ އޮންނާނީ އަންނަ ހުކުރު ދުވަހުގެ ރޭ ދަރުބާރުގޭގައެވެ.