ނިރުބަވެރި ޖަމާޢަތްތަކުގެ ގޮތުގައި ރަޝިޔާއިން ކަނޑައަޅާފައިވާ ލިސްޓުން، ޠާލިބާން ޖަމާޢަތް އުނިކުރެވޭ ގޮތަށް ޤާނޫނެއް ފާސްކުރުމާ ގުޅިގެން، އަފްޣާނިސްތާނުގައި މިހާރު އޮތް ޠާލިބާން ސަރުކާރު ރަޝިޔާއިން ރަސްމީކޮށް ބަލައިގަތުމާ ގާތަށް ޖެހިލައިފިއެވެ.
އެ ޤާނޫނަށް އިއްވަންޖެހޭ ޖުމްލަ ތިން ކިޔުމުގެ ތެރެއިން، ފުރަތަމަ ކިޔުން، ރަޝިޔާގެ ޤާނޫނު ހަދާ މަޖިލީހުގެ ތިރިގެއިން ފާސްކޮށްފައިވާ ކަމަށް ރަޝިޔާގެ ބައެއް ނޫސްތަކުން ރިޕޯޓުކޮށްފައިވެއެވެ.
ޠާލިބާނާ ދެކޮޅަށް ކުރި 20 އަހަރު ދުވަހުގެ ދިގު ހަނގުރާމައަށް ފަހު، އެމެރިކާ ސިފައިން ކުއްލި ގޮތަކަށް އެ ޤައުމުން ފޭބުމާ އެކު، 2021 ވަނަ އަހަރު އަފްޣާނިސްތާންގެ ވެރިކަމަށް ވެރިވެގަތް ޠާލިބާނުންގެ ސަރުކާރު އެއްވެސް ޤައުމަކުން އަދި ރަސްމީކޮށް ބަލައިގެންފައެއް ނުވެއެވެ.
ނަމަވެސް، ރަޝިޔާ އިން މަޑުމަޑުން އަންނަނީ ޠާލިބާނުންގެ ސަރުކާރާ ގުޅުން ބަދަހި ކުރަމުންނެވެ. މި ގޮތުން، ނިރުބަވެރިކަމާ ދެކޮޅަށް ކުރާ މަސައްކަތުގައި ޠާލިބާނަކީ މުޙިންމު ބައިވެރިއެއް ކަމަށް ރަޝިޔާގެ ރައީސް ވްލަޑިމިއަރ ޕުޓިން މިދިޔަ ޖުލައި މަހު ވަނީ ވިދާޅުވެފައެވެ.
އަފްޣާނިސްތާނުން ފެށިގެން މެދުއިރުމަތީގެ އެކި ޤައުމުތަކުގައި ޙަރަކާތްތެރިވާ ހަތިޔާރު އެޅި ހައްދުފަހަޅާފައިވާ ޖަމާޢަތްތަކުގެ ނުރައްކާ ބޮޑުކަމަށް ރަޝިޔާއިން ޤަބޫލުކުރެއެވެ. އަދި ސޫރިޔާގެ ރައީސް ބައްޝާރް އަލް-އަސަދުގެ ސަރުކާރު ވެއްޓުމުން، އެކަމާ ދެކޮޅަށް ކުރާ މަސައްކަތުގައި މުޙިންމު ބައިވެރިއަކު ރަޝިޔާއަށް ވަނީ ގެއްލިފައެވެ.
މިދިޔަ މާޗް މަހު، އައިއެސުން ވަނީ ރަޝިޔާގެ ވެރިރަށް މޮސްކޯގެ ބޭރުގައި ހުންނަ ކޮންސެޓް ހޯލަކަށް ޙަމަލާދީ، 145 މީހަކު ބަޑިޖަހައި މަރާލާފައެވެ. ޖާސޫސީ މަޢުލޫމާތުތަކުގެ މައްޗަށް ބިނާކޮށް، އެމެރިކާއިން އޭރު ބުނެފައިވާ ގޮތުގައި، އެ ޙަމަލާގެ ފަހަތުގައި އޮތީ އަޣާނިސްތާނުގައި ހަރަކާތްތެރިވާ އައިއެސްގެ ގޮތްޕެއް ކަމަށްވާ އައިއެސް-ކޭ ކަމަށެވެ.
އަފްޣާނިސްތާންގައި މޫލާފައިވާ އައިއެސް އެކީގައި ފުހެލަން މަސައްކަތް ކުރަމުންދާ ކަމަށް ޠާލިބާނުން ތަކުރާރުކޮށް ދަނީ ބުނަމުންނެވެ.
ނަމަވެސް، އަފްޣާނިސްތާނުގައި އަންހެނުންގެ ޙައްޤުތަކާ ގުޅުވައިގެން ޠާލިބާނުން ގެންގުޅޭ ސިޔާސަތުތައް ބަދަލުކުރަން ދެން، ޠާލިބާނުންގެ ސަރުކާރު ބަލައިގަތުން މަޑުޖައްސާލާފައިވާ ކަމަށް ވިލާތުގެ ޤައުމުތަކުން ވަނީ ބުނެފައެވެ.
ތާލިބާނުން ވަނީ އަންހެން ކުދިންނާއި އަންހެނުން ސްކޫލްތަކަށާއި ޔުނިވަރސިޓީތަކަށް ކިޔަވަން ދިޔުން މަނާކޮށް، ފިރިހެން ބަލަދުވެރިއަކު ނުލައި، އަންހެނުން ގެއިން ބޭރަށް ނުކުމެ އުޅުން ވަރަށް ބޮޑަށް ހަނިކޮށްފައެވެ. ޠާލިބާނުން ބުނާ ގޮތުގައި، އަންހެނުންނަށް އިޙްތިރާމްކުރުން ބިނާވެފައިވަނީ، އިސްލާމީ ޝަރްޢިއްޔާގެ ހަމަތަކާ އެއްގޮތަށެވެ.
ރަޝިޔާއަކީ ވެސް އަފްޣާނިސްތާނުގައި ލޭއޮހޮރުމުގެ ތާރީޚެއް އޮތް ޤައުމެކެވެ. އަފްޣާނިސްތާނުގައި އޭރު އޮތް ކޮމިއުނިސްޓް ސަރުކާރުގެ ދިފާޢުގައި ރަޝިޔާ ސިފައިން 1979ވަނަ އަހަރުގެ ޑިސެމްބަރު މަހު އެ ޤައުމަށް އަރައި، އެމެރިކާއިން ހަތިޔާރު ފޯރުކޮށްދެމުން ދިޔަ ހަނގުރާމަވެރިންނާ ދެކޮޅަށް 10 އަހަރު ދުވަހުގެ ދިގުލައިގެން ގޮސްފައިވާ ހަނގުރާމައެއް ކޮށްފައެވެ.
ރަޝިޔާގެ އޭރުގެ ލީޑަރު މިކާއީލް ގޮރްބަޗޯވް 1989ވަނަ އަހަރު ރަޝިޔާ ސިފައިން އަފްޣާނިސްތާންއިން ބޭލީ ހަނގުރާމައިގައި 15،000އެއްހާ ރަޝިޔާ ސިފައިން މަރުވި ފަހުންނެވެ.