ނައިންޓީ ޕްލަސް ގޯލްޑް ކަޕް ފުޓުބޯޅަ މުބާރާތުގައި ކ. މާފުއްޓާއި ބ. އޭދަފުށި ބައްދަލުކުރި މެޗުގައި އޭދަފުށީގެ ގޯލްކީޕަރު ކުރި ނުރައްކާތެރި ފައުލާ ގުޅިގެން މާފުށީގެ ސަޕޯޓަރުން ދަނޑުމައްޗަށް އެރި މައްސަލައިގައި އެ ޓީމު ޖޫރިމަނާކޮށް ނަސޭހަތްދީފިއެވެ.
މެޗުގެ އެންމެ ފަހުވަގުތު އޭދަފުށީގެ ގޯލްކީޕަރު އަލީ އަޖުފާން އަމްޖަދު މާފުށީގެ ކެޕްޓަން އަޙްމަދު އަބްދުއްސައްތާރަށް ކުރި މި ނުރައްކާތެރި ފައުލާއެކު ދަނޑުގެ ސަހަރާއަށްވީ ފަޅީގައި ތިބި މާފުށީގެ ބައެއް ސަޕޯޓަރުން ވަނީ ދަނޑަށް އަރާފައެވެ.
މުބާރާތުގެ ޑިސިޕްލިނަރީ ކޮމިޓީން ވަނީ މި މައްސަލާގައި ގޮތެއް ނިންމާފައެވެ. އެގޮތުން ދަނޑުގެ ސެކިއުރިޓީ ފެންސު ވައްޓާލުމަށްފަހު އޭދަފުށީގެ ގޯލްކީޕަރާ ދިމާކުރުމަށް ދަނޑަށް އެރި މައްސަލައިގައި ޑިސިޕްލިނަރީ ކޮމިިޓީން ވަނީ މައްސަލައިގެ ކުޑަ ބޮޑުމިނަށް ބަލާ، 3000 (ތިންހާސް) ރުފިޔާއިން ޖޫރިމަނާކޮށްފައެވެ. އަދި މާފުށި ދެން އެންމެ އަވަހަށް ކުޅެންޖެހޭ މެޗުގެ ކުރިން ޖޫރިމަނާ ފައިސާ ދައްކާ ހަލާސްކުރުމަށް ވަނީ އަންގާފައެވެ.
މީގެ އިތުރުން މިފަދަ ކުށެއް ދެވަނަ ފަހަރަށް ސަޕޯޓަރުންގެ ފަރާތުންވެސް އަދި ޓީމުގެ އޮފިޝަލުންގެ ފަރާތުންވެސް ތަކުރާރުވެއްޖެ ނަމަ ޖޫރިމަނާ ކުރެވޭ އަދަދު ދެ ގުނައަށް ބޮޑުކުރާނެކަމަށް ވެސް ޑިސިޕްލިނަރީ ކޮމިޓީން ވަނީ އަންގާފައެވެ.
މުބާރާތުގެ ދެވަނަ ބުރުގައި އޭދަފުށި ހިމެނެނީ ގްރޫޕް އެފް ގައެވެ. މި ގްރޫޕުގައި އޭދަފުއްޓާއެކު ދެން ހިމެނޭ ޓީމަކީ ހއ. ދިއްދޫއެވެ.
މުބާރާތުގެ ދެވަނަ ބުރުގައި އޭދަފުށި ކުޅޭ ދެވަނަ މެޗުގައި އަންނަ ހޮނިހިރު ދުވަހުގެ ހަވީރު ބައްދަލުކުރާނީ ހއ. ދިއްދޫއާއެވެ. އަދި މާފުށި ކުޅޭ މެޗުގައި ބުދަ ދުވަހު ބައްދަލުކުރާނީ ދިއްދޫއާއެވެ.