ޔޫއެފާ ޗެމްޕިއަންސް ލީގުގައި ރޭ އިންޓަރ މިލާނާއި ދެކޮޅަށް ބެޔާ ލެވަކޫސަން ކުޅުނު މެޗުގެ ފަހު ވަގުތު ޖެހި ލަނޑާއެކު 1-0 ގެ ނަތީޖާއަކުން ލެވަކޫސަން އިން އިންޓަރ މިލާން ބަލިކޮށްފި އެވެ.
މި މެޗުން ލެވަކޫސަން މޮޅުވުމާއެކު އެ ޓީމަށް ވަނީ މިހާތަނަށް ކުޅުނު 6 މެޗުން ލިބުނު 13 ޕޮއިންޓާއެކު ތާވަލުގެ ދެވަނަ މަގާމް ލިބިފަ އެވެ. އިންޓަރ މިލާނަށްވެސް ހަ މެޗުން 13 ޕޮއިންޓް ލިބިފައިވާއިރު ލެވަކޫސަން އަށް ކުރި ލިބިފައިވަނީ ފައިދާ ގޯލުގެ ތަފާތުންނެވެ. އެއްވަނައިގައި އޮތް ލިވަޕޫލް އަށް ލިބިފައިވަނީ 19 ޕޮއިންޓެވެ.
ލެވަކޫސަންގެ ބޭ އެރީނާގައި ތިރީސް ހާހަށްވުރެ ގިނަ މީހުންގެ ކުރިމަތީގައި ކުޅުނު މި މެޗުގައި އިންޓަރ މިލާން އިން ވަނީ މެޗު ޑޮމިނޭޓްކޮށް އިދިކޮޅު ޓީމުގެ ގޯލަށް ނުރައްކާތެރި ގިނަ ހަމަލަތަކެއް ފޮނުވާލާފަ އެވެ.
މި މެޗުގައި ފެނިގެންދިޔަ ހަމައެކަނި ލަނޑު މެޗުގެ ފުރިހަމަ ވަގުތުގެ ފަހު މިނިޓުގައި ލެވަކޫސަން އަށް ކާމިޔާބު ކޮށްދީފައިވަނީ ނޯޑީ މުކިއޭލް އެވެ. މި މި ފަހަރުގެ ޗެމްޕިއަންސް ލީގުގައި އިންޓަރ މިލާން ކޮޅަށް ވަން ފުރަތަމަ ލަނޑެވެ.
މި މުބާރާތުގެ ފުރަތަމަ ބުރުގައި އިންޓަރ މިލާން ދެ ކުޅެން ޖެހެ ދެ މެޗުގެ ތެރެއިން ފުރަތަމަ މެޗުގައި އަންނަ ޖެނުއަރީ މަހު ނިކުންނާނީ ޗެކް ރިޕަބްލިކްގެ ސްޕާޓާ ޕްރާގް އާއި ދެކޮޅަށެވެ. އަދި އޭގެ ފަހުން އަމިއްލަ ދަނޑުގައި ފްރާންސްގެ މޮނާކޯ އާއި ދެކޮޅަށް ކުޅުމަށް ވަނީ ހަމަޖެހިފަ އެވެ.