ގޯލްޑް ކަޕް 2024 ފުޓްބޯޅަ މުބާރާތް ފެށުނުފަހުން އެންމެ ގިނަ ސަޕޯޓަރުން ގަލޮޅު ދަނޑަށް ވަން ރެއަކަށް އަންގާރަ ދުވަހުގެ ރޭ ވާނެއެވެ. އެއީ ކުރެންދޫ އާއި އަލިފުށި ބައްދަލުކުރި މެޗެވެ.
މި މެޗުގެ ފޯރި އިތުރަށް ގަދަވެގެން ދިޔައީ އަލިފުށީގެ ސަޕޯޓަރުންނާއި ކުރެންދޫ ސަޕޯޓަރުންގެ އަޑުންނެވެ. ބެރުތަކާއި ދުންމާރިތައް ހިފައިގެން ވަދެ ތިބި ސަޕޯޓަރުން ދަނޑުގެ ސިޑިބަރިން އެއް ފަރާތް އެއްކޮށްހެން ފުރާލާފައި އޮތް އިރު އެންމެ ބޮޑު ފޯރިއެއް މި މެޗުގައި ނެގީ އަލިފުށީ ސަޕޯޓަރުންނެވެ.
ތުއްތު ކުދިންނާއި، ޒުވާނުންނާއި ރަށުގެ ދޮށީ އުމުރުގެ މީހުންވެސް މެޗު ބަލާލަށް ދަނޑަށް ވަދެ ފޯރި ނަގަމުން ދިޔައެވެ. ހަމަ އެ ފޯރި ކުރެންދޫއިންވެސް ދިޔައީ ނަގަމުންނެވެ. ގޮނޑިބަރީގައި ތިބި ކުރެންދޫ ސަޕޯޓަރުންނާއި، ސިޑި ބަރީގައި ތިބި ސަޕޯޓަރުންގެ ސަބަބުން ކުޅުންތެރިންނަށް އިތުރު ހިތްވަރު ލިބިގެންދާކަން މި މެޗުގައިވެސް ފެނިގެން ދިޔައެވެ. އަލިފުށީ ސަޕޯޓަރުންގެ އަޑު ކަނޑައިގެން ނުދިޔަ މި މެޗުގައި 1-0 ގެ ނަތީޖާއަކުން އަލިފުށި ކާމިޔާބު ހޯދުމުގައި ސަޕޯޓަރުންގެ ރޯލުވެސް ބޮޑޭ ދެންނެވިދާނެއެވެ. އަލިފުށީ ސަޕޯޓަރުންގެ ތެރެއިން އެއްބަޔަކު ތިބީ ޖާޒީގައެވެ. ޓީމު ކުލައިން ފުއްޕާހަންވެސް ހިފައިގެން ވަދެ ތިބި އަލިފުއްޓާއި ކުރެންދޫ ސަޕޯޓަރުންގެ ހިތްވަރަށް ސާބަހެވެ.
މި ފޯރިއަކީ ގޯލްޑް ކަޕް އިންތިޒާމް ކުރާ ނައިންޓީ ޕްލަސްގެ އެއް މަގުސަދެވެ. ރާއްޖޭގައި ފުޓްބޯޅައަށް އޮންނަ ފޯރި ގަދަކޮށް ގަލޮޅު ދަނޑަށް ވަންނަ ސަޕޯޓަރުންގެ އަދަދު އަލުން ގިނަ ކުރުމަކީ މި މުބާރާތުގެ މައިގަނޑު އެއް އަމާޒެވެ. "އަލުން ދަނޑަށް" މި ޝިއާރުވެސް ޕްރޮމޯޓް ކުރާ މި މުބާރާތުގައި އަންގާރަ ދުވަހުގެ ހަވީރު ކުޅުނު މެޗަކީވެސް ފާހަގަކޮށްލެވޭ މޮޅު މެޗެކެވެ.
އައްޑޫ ސިޓީ އާއި ދ. މީދޫ ބައްދަލުކުރި މި މެޗުގައި ދ. މީދޫން ފަހަތުން އަރައި 3-3 ގެ ނަތީޖާއަކުން އައްޑޫ ސިޓީ ހިފަހައްޓާލީ އާދަޔާ ހިލާފު މޮޅު ކުޅުމަކުންނެވެ. އައްޑޫ ސިޓީން ލީޑް ނަގާފައިވަނިކޮށް މީދޫ އިން އަރާ ހަމަކުރީ އެޓީމުގެ އިމްރާން ހެދި ހެޓްރިކުންނެވެ. އޭނާ ގޯލު ޖަހާލި ކޮންމެ ފަހަރަކުވެސް އިމްރާނަށް އޮތް ލޯބި ދަނޑުން ފެނިގެން ދިޔައެވެ. މުބާރާތުގެ އެންމެ ރީތި އެންމެ ދުރުން ޖަހާދިން ގޯލުވެސް ފެނިގެން ދިޔައީ މި މެޗުގައެވެ.
އެއީ ހަމަ އިމްރާން ހާފުގެ މެދަށްވުރެ ކުޑަ ތަންކޮޅެއް އޭރިއާއާއި ކަރިއިން، ހަމަޖެހިލާފައި ޖަހާދިން އަރާމު ގޯލެކެވެ. ކުއްލިއަކަށް މެޗުގެ ނަތީޖާ އަނބުރާލާ ސަޕޯޓަރުންގެ އަޑުން ދަނޑު ގުގުމާލީ އެ ލަނޑުންނެވެ. މީދޫ ސަޕޯޓަރުންނާއި އައްޑޫ ސިޓީ ސަޕޯޓަރުންގެ އަޑު މެޗު ނިމެންދެން ހުއްޓެވެ. އައްޑޫ ސަޕޯޓަރުން ތަފާތެވެ. ބައެއް ސަޕޯޓަރުން ދަނޑުގައި ތިބި ކުޅުންތެރިންނަށް އިވޭ ވަރަށް ސްޕީކަރު ބޭނުންކޮށްވެސް ސަޕޯޓްކޮށް ހެދިއެވެ.
މި ދެމެޗުގައިވެސް ފެނިގެންދިޔަ ސަޕޯޓަށް ބަލާއިރު ކޮންމެ ޓީމަކުންވެސް ކުޅުންތެރިންނަށް ހިތްވަރުދީ އިރުޝާދު ދޭ އަޑުވެސް އިވެއެވެ. ގޯލު ކައިރިއަށް ބޯޅަ ދާ ކޮންމެ ފަހަރަކުން ދަނޑު އެކީ އެކައްޗަކަށް އުތުރި އަރައިންގަންނަ ކަހަލައެވެ. މިއީ ފުޓްބޯޅަ ފޯރީގައި ނަމޫނާ ދައްކަމުންދާ ޓީމުތަކެކެވެ. އެހެން ރޭ ރެއާ ހިލާފަށް މި ދެ ޗުގައިވެސް ހަމަ ސަޕޯޓަރުންގެ ފޯރި ގަދައެވެ. މެޗު ނިންމާލާފައިދާއިރު އެއްވެސް ހަމަނުޖެހުމަކަށް ޖާގަ ނުދީ ކުޅިވަރުގެ ރޫހާ އެއްގޮތަށް ސަޕޯޓް ކުރާ މި ޓީމުތަކަކީ އެހެން ޓީމުތަކަށްވެސް ހަމަ ނަމޫނާއެކެވެ.
ގޯލްޑް ކަޕްގެ ސަބަބުން ގަލޮޅު ދަނޑަށް އާ ދިރުމެއް ގެނެސްދެނީ ޓީމުތަކުގެ ސަޕޯޓަރުންނެވެ. ގައުމީ ލެވެލްގެ މުބާރާތަކަށް އޮންނަ ތަރުހީބާއި އެއްވަރު ތަރްހީބެއް ނޫނަސް ރަށްރަށުން މި މުބާރާތަށް ބަހައްޓާ ފޯރިއާއި ތަރްހީބު ކުޑައެއް ނޫނެވެ. މިއީ ހަމައެކަނި ގަލޮޅު ދަނޑުގެ ވާހަކައެވެ. ރަށްރަށުގައި ރައްޔިތުން ނިކުމެ އެތިބެނީ ބޮޑު ސްކްރީން ބަހައްޓައިގެންނެވެ. ކެއުމާއި ސައި ކޮފީ އާއި ދަޅު ފުޅި ހިފައިގެން އެންމެން ނިކުމެ އެތިބެނީ ހާދަ ފޯރީގައެވެ.
މިއީ ގޯލްޑް ކަޕްގައި ވާދަކުރާ ހުރިހާ ރަށެއްގައިވެސް ސަޕޯޓަރުން މި މުބާރާތަށް ބަހައްޓާ ގާތްކަން ހާމަވާ ކަންކަމެވެ. ވޯލްޑް ކަޕް ނޫނަކަސް ބޮޑު ސްކްރީނުން ގޯލްޑް ކަޕް ބަލާލުމަކީ ދަނޑުގައި ތިބެގެން މެޗު ބެލުމުގެ ފުރުސަތު ނުލިބޭ މީހުންނަށް ލިބޭ ބޮޑު ހިތްހަމަޖެހުމެވެ. މި މުބާރާތުގެ ސަބަބުން ޔަގީންވާ އެއް ކަމަކީ ރަށްރަށުގެ ރައްޔިތުންގެ މެދުގައި އެކުވެރިކަން އާލާވެ، ފުޓްބޯޅައަށް އޮތް ލޯބި އަނެއްކާވެސް އިތުރުވެ ހުނަރުވެރި ކުޅުންތެރިންގެ ޖޯޝު އަލުން ދިރެމުން އަންނަ ކަމެވެ.
މުޅި ރާއްޖެއަށް ހުޅުވާލައިގެން ބާއްވާ ނައިންޓީ ޕްލަސް ގޯލްޑް ކަޕް 2024 ގައި 17 ރަށެއް ބައިވެރިވެއެވެ. މިހާރު މި މުބާރާތުގައި ކުރިޔަށް ދަނީ ދެވަނަ ބުރުގެ މެޗުތަކެވެ.