ޓެރަރިޒަމަށް ހިތްވަރުލިބޭގޮތަށް އެމްޑީޕީން ދެއްކި ވާހަކަތައް ތަހުގީގްކުރަން މެންބަރުން ގޮވާލައިފި

ޒިންމާދާރު މަގާމުތަކުގައި ތިއްބަވާ ބޭފުޅުން، ޓެރަރިޒަމަށް ހިތްވަރު ލިބޭގޮތަށް ވާހަދެކެވިގެން ނުވާނެ ކަމަށާއި އެފަދަ މައްސަލަތައް ބަލަންޖެހޭނެކަމަށް ރައްޔިތުންގެ މަޖިލީހުގެ މެންބަރުން ވިދާޅުވެއްޖެއެވެ. މަޖިލީހުގެ މެންބަރުން މިހެން ވިދާޅުވީ، ކުރީގެ ރައީސް މުޙައްމަދު އަމީނަށް ހެދިގޮތް، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުއަށްވެސް ހަދަންޖެހިދާނެކަމަށް ވިދާޅުވެ ރައީސުލްޖުމްހޫރިއްޔާއަށް އަނިޔާވެރިވުމުގެ މޭރުމަކުން އެމްޑީޕީގެ ޗެއާޕަރސަން ދެއްކެވި ވާހަކަތައް ކުށްވެރިކޮށް ހުށަހަޅުއްވާފައިވާ ކުއްލި މައްސަލައަށް ބަހުސް ކުރައްވަމުންނެވެ.

އެމްޑީޕީގެ ޗެއާޕަރސަން ދެއްކެވި ވާހަކަތައް ރައްޔިތުންގެ މަޖިލީހުގެ ގިނަ މެންބަރުން ވަނީ ކުށްވެރިކުރައްވާފައެވެ. އަދި ރައީސުލްޖުމްހޫރިއްޔާއަށް އަނިޔާވެރިވުމަށް ބާރުއަޅައި ވާހަކަދެއްކުމަކީ ނުރައްކާތެރިކަމެއް ކަމަށާއި، ޒިންމާދާރު މަގާމުގެއްގައި ތިބެގެން އެގޮތަށް ވާހަކަދެކެވިގެން ނުވާނެކަމަށްވެސް މެންބަރުން ވިދާޅުވިއެވެ.

ކުއްލި މައްސަލައަށް ވާހަކަ ދައްކަވަމުން މަނަދޫ ދާއިރާގެ މެންބަރު ހުސްނީ މުބާރިކް ވިދާޅުވީ މިފަދަ މައްސަލަތައް ބަލައި ވީހާވެސް އަވަހަށް ފިޔަވަޅު އަޅަންޖެހޭ ކަމަށެވެ. އެމްޑީޕީގެ މާޒީންވެސް ޓެރަރިޒަމްގެ އަމަލުތައް ފެންނަން އެބަހުރިކަމަށް ތުހުމަތުކުރައްވާ ހުސްނީ ވަނީ އެފަދަ ކަންކަން ކުޑަކަމެއްގެ ގޮތުގައި ބަލައިގެން ނުވާނެކަމަށް ވިދާޅުވެފައެވެ.

"އަޅުގަނޑުމެން މާޒީއަށް ބަލާލާއިރު އެމްޑީޕީން އަމަލުކޮށްފައިވާގޮތުން ޓެރަރިޒަމަށް މަގުފަހިވާ އެތައް ކަމެއް. އެތައް ވާހަކަތަކެއް މި ވާހަކަތަކާ ވިދިގެން ތަރުތީބުވެގެން އައިސްފައިވަނީ ޓެރަރިޒަމްގެ އަމަލުތަކަކަށް ވާތީ،" މަނަދޫ ދާއިރާގެ މެންބަރު ހުސްނީ މުބާރިކް ވިދާޅުވިއެވެ.

ހިތަދޫ މެދު ދާއިރާގެ މެންބަރު އަޙްމަދު އަޒާން މަރުޒޫޤް ވިދާޅުވީ ކުރީގެ ރައީސް އަމީން އަވާހަރަކޮށްލެއްވީ ރައްޔިތުންނަށް ދެރައެއް ދީގެން ނޫން ކަމަށާއި، އެއީ ވެރިކަމުގެ ދަހިވެތިކަމުގައި ރައްޔިތުން ލައްވާ ކުރުވިކަމެއް ކަމަށެވެ. މިއަދު އެމްޑީޕީން ކުރަން ބޭނުންވަނީވެސް އެފަދަ ކަމެއްކަމަށާއި އެކަން ސީރިއަސްގޮތެއްގައި ތަހުގީގުކުރަންޖެހޭ ކަމަށް އަޒާން ވިދާޅުވިއެވެ.

"އެމްޑީޕީގެ ޗެއަރޕަރސަން އަދި އެމްޑީޕީގެ ރިޔާސީ ކެންޑިޑޭޓު ކަމަށް ވެވަޑައިގަތުމުގެ މަސައްކަތް ކުރައްވާ ބޭފުޅަކު އެވާހަކަ އެބަދައްކަވާ. މިއީ އާދައިގެ މީހެއް ނޫން މިވާހަކަ މިދައްކަނީ. އެހެންވީމަ އަޅުގަނޑުމެން އެބަޖެހޭ ވަރަށް ސީރިއަސްކޮށް މި މައްސަލަ ބަލަން. އެމްޑީޕީއަކީ އަނިޔާވެރި މާޒީއެއް އޮތް ޕާޓީއެއް،" އަޒާން ވިދާޅުވިއެވެ.

މާފަންނު ދެކުނު ދާއިރާގެ މެންބަރު އިބްރާހިމް ރިފާޢު ވިދާޅުވީ ޤާނޫނުއަސާސީގެ ދިފާއުގައި އިދިކޮޅު ފަރާތްތަކުން މަސައްކަތް ކުރަނީ މުޅި ޤައުމު ހަލަބޮލިކުރުމަށް ކަމަށެވެ. އަދި ރައީސުލްޖުމްހޫރިއްޔާގެ ހަށިކޮޅަށް ގެއްލުންދިނުމަށް ދެކެވޭ ވާހަކަތައް ބަލައި ނުގަނެވޭނެ ކަމަށާއި އެފަދަ ވާހަކަތައް ދައްކާ ފަރާތްތައް ހައްޔަރުކޮށް ތަހުގީގުކުރުމަށް ރިފާއު ގޮވާލެއްވިއެވެ.

"ހާމަކަން ބޮޑުގޮތެއްގައި އެތައް ޕޯޑިއަމްތަކެއްގައި އެމަނިކުފާނުގެ ހަށިކޮޅަށް ގެއްލުންވާނެ ގޮތަށް ކަންކުރުމަށް ގޮވާލުމަކީ އެއްވެސް ހާލަތެއްގައި އަޅުގަނޑުމެންނަށް ބަލައިގަނެވޭނެ ކަމެއް ނޫން. އަޅުގަނޑު ގޮވާލަން މިއަދުން މިއަދަށް، ވަގުތުން ވަގުތަށް އެކަންކަމަށް އެ ގޮވާލާ ފަރާތްތައް ހައްޔަރުކޮށް އެބޭފުޅުންގެ ތަހުގީގު ހިންގަން ކަމާބެހޭ ވުޒާރާތަކަށް،" މާފަންނު ދެކުނު ދާއިރާގެ މެންބަރު އިބްރާހިމް ރިފާޢު ވިދާޅުވިއެވެ.

މަޖިލީހުގައި ގިނަ މެންބަރުންވަނީ ރައީސުލްޖުމްހޫރިއްޔާއާ ގުޅުވައިގެން އެމްޑީޕީގެ ޗެއަރޕަރސަން އަދި އެހެން ބައެއް މެންބަރުން ޕޯޑިއަމްތަކުގައި ދައްކާފައިވާ ވާހަކަތައް ކުށްވެރިކުރައްވާފައެވެ.