ނޭޕާލުގެ ވެރިރަށް ކަތަމަންޑޫގައި މިހާރު ކުރިއަށްދާ ސެންޓްރަލް އޭޝިއަން ވޮލީބޯލް އެސޯސިއޭޝަން (ކާވާ) މެންސް ކުލަބު ޗެމްޕިއަންޝިޕް 2024 ގައި ރާއްޖޭގެ ކުލަބު އެޗްޑީސީން ކުޅުނު ތިންވަނަ މެޗުގައި އިންޑިއާގެ ކަލިކަޓް ހީރޯސް އަތުން ސީދާ ތިން ސެޓުން ބަލިވެއްޖެއެވެ.
ކަލިކަޓް އަތުން އެޗްޑީސީ ބަލިވިއިރު، މި މެޗުގެ ސެޓުތައް އެ ޓީމުން ގެންގޮސްފައިވަނީ 25-13، 25-23 އަދި 25-21 އިންނެވެ. މިއީ މި މުބާރާތުގައި އެޗްޑީސީގެ ދެވަނަ ބައްޔެވެ. އެ ޓީމު ވަނީ ދެވަނަ މެޗުގައި ބަލިވީ އީރާނުގެ ޗަދޯރުމަލޫ އަތުން ތިން ސެޓު ދެ ސެޓުން ބަލިވެފައެވެ.
ދެ މެޗުން ބަލިވި ނަމަވެސް އެޗްޑީސީ ކުޅުނު ފުރަތަމަ މެޗުގައި އެ ޓީމު ވަނީ ނޭޕާލުގެ ގަންޑާކީ އަތުން ތިން ސެޓު ދެ ސެޓުން މޮޅުވެފައެވެ. މި މެޗުގައި އެޗްޑީސީން ވަނީ މޮޅު ކުޅުމެއް ކުޅެފައެވެ.
މުބާރާތުގައި އެޗްޑީސީން ދެން މެޗެއް ކުޅޭނީ މާދަމާ ހަވީރު 16:30 ގައެވެ. އެ މެޗުގައި ބައްދަލުކުރާނީ ހެލްޕް ނޭޕާލް ސްޕޯޓްސް ކުލަބާއެވެ.
ހަތަރު ގައުމަކުން ފަސް ޓީމު ވާދަކުރާ މި މުބާރާތުގައި ރާއްޖޭގެ އެޗްޑީސީގެ އިތުރުން ދެން ވާދަކުރަނީ ނޭޕާލުގެ ގަންޑަކީ ޕްރޮވިންވްސް އާއި، ހެލްޕް ނޭޕާލް ސްޕޯޓްސް ކުލަބާއި، އިންޑިއާގެ ކަލިކަޓް ހީރޯސް އަދި އީރާނުގެ ޗަދޯރުމަލޫއެވެ.