ފުލުހަކަށް ބިރުދެއްކިކަމުގެ ތުހުމަތުގައި ހައްޔަރުކުރި މީހާ ކޯޓުން ދޫކޮށްލައިފި

މަސްތުގެ ހާލަތުގައިހުރެ ފުލުހަކަށް ބިރުދައްކައި އިންޒާރުދިން މައްސަލައެއްގައި ހައްޔަރުކުރިމީހާ ޝަރުތުތަކަކާއެކު ކޯޓުން ދޫކޮށްލައިފިއެވެ.

ފުލުހުން ވިދާޅުވީ މަސްތުގެ ހާލުގައި ހުރެ ފުލުހަކަށް އިންޒާރުދީ ބިރުދައްކާއި، ހަޑިހުތުރުބަހުން މުއާމަލާތްކުރުމުގެ ތުހުމަތުގައި ހައްޔަރުކޮށްފައިވަނީ ޢުމުރުން 30 އަހަރުގެ ފިރިހެނެއްކަމަށެވެ. އޭނާ ހައްޔަރުކުރީ އ. ހޯރަފުށިން މިދިޔަ މަހުގެ 27 ވަނަ ދުވަހުގެ ރޭކަމަށްވެސް ފުލުހުން ވިދާޅުވިއެވެ.

އެމީހާގެ ބަންދާމެދު ގޮތެއް ނިންމުމަށް މި ދިޔަ މަހުގެ 28 ވަނަ ދުވަހު ކޯޓަށް ހާޒިރުކުރުމުން ކޯޓުން ޝަރުތުކުރުމަށްފަހު އޭނާ ވަނީ ދޫކޮށްލާފައިކަމަށް ފުލުހުން ވިދާޅުވިއެވެ.

ފުލުހުން ވިދާޅުވީ މި މައްސަލައާއި ގުޅިގެން ހައްޔަރުކުރި މީހާއަށް ފުލުހުންގެ ބަނދުގައި ހުރި އިރު އަނިޔާކުރި ކަމުގެ އެއްވެސް ޝަކުވާއެއް ފުލުހުންނަށް މިހާތަނަށް ލިބިފައި ނުވާކަމަށެވެ. އަދި މިފަދަ ކަމެއްގައި ޝަކުވާއެއް އޮތްނަމަ އެ އޮންނަ އުސޫލުގެ ތެރެއިން ހުށައެޅައިގެން ބެލުން އެއީ އެޚިދުމަތުން ބާރުއަޅާކަމެއްކަމަށް ފުލުހުން ވިދާޅުވެއެވެ.

ފުލުހުން ވިދާޅުވީ މި ފަދަ ތަހުގީގުތަކަށް ފުލުހުންގެ ޚިދުމަތުން ފުރިހަމަ އެއްބާރުލުން ދޭނެކަމަށެވެ.