އެންމެ ގިނައީ ޤައިދީންގެ ބޭސްފަރުވާއާއި ގުޅުންހުރި މައްސަލަތައް: އެޗްއާރްސީއެމް

އިންސާނީ ޙައްގުތަކުގެ ދާއިރާއިން މިއަހަރު އެންމެ ގިނައިން ހުށައަޅާފައިވަނީ ޤައިދީންގެ ބޭސްފަރުވާއާއި ގުޅުންހުރި މައްސަލަތައްކަމަށް ހިއުމަން ރައިޓްސް ކޮމިޝަން އޮފް ދަ މޯލްޑިވްސް، އެޗްއާރުސީއެމުންން ވިދާޅުވެއްޖެއެވެ. އެކޮމިޝަނުން ވިދާޅުވީ މިއަހަރުގެ މިހާތަނަށް ޤައިދީންގެ ބޭސްފަރުވާއާ ގުޅުންހުރި 130އަށްވުރެ ގިނަ މައްސަލަ ހުށައަޅާފައިވާކަމަށެވެ.

ހިއުމަން ރައިޓްސް ކޮމިޝަން އޮފް ދަ މޯލްޑިވްސްއިން ގެންދަވަނީ، ހަމަހަމަކަމާއެކު އިންސާނީ ޙައްގުތައް ކަށަވަރުކުރޭތޯ ބެލުމުގެ މަސައްކަތްކުރައްވަމުންނެވެ. އެކޮމިޝަންގެ މަސައްކަތްތަކާ ގުޅޭގޮތުން ޕީއެސްއެމްގެ "ހެނދުނު ހެނދުނާ" ޕްރޮގްރާމްގައި ވާހަކަދައްކަވަމުން އެޗްއާރްސީއެމްގެ ސީނިއާ އެޑްވޮކަސީ އޮފިސަރ މުޙައްމަދު ޝަނޫން ވިދާޅުވީ މިއަހަރުގެ މިހާތަނަށް އިންސާނީ ޙައްގުތަކާއި ގުޅޭ 637 މައްސަލަ އެކޮމިޝަނަށް ހުށައަޅާފައިވާކަމަށެވެ. އަދި ހުށައަޅާފައިވާ މައްސަލަތަކުގެ ތެރެއިން އެންމެ ގިނައީ ޤައިދީންގެ ބޭސްފަރުވާއާއި ގުޅުންހުރި މައްސަލަތައްކަމަށާއި އެފަދަ 131 މައްސަލަ މިހާތަނަށް ހުށައަޅާފައިވާކަމަ އޭނާ ވިދާޅުވިއެވެ.

މީގެއިތުރުން ލާއިންސާނީ އަނިޔާގެ 99 މައްސަލައާއި ބޭސްފަރުވާގެ މައްސަލަތައް ނޫން އެހެނިހެން ކަންކަމުގައި ޤައިދީންނާ ގުޅުންހުރި 52 މައްސަލަ ހުށައަޅާފައިވާކަމަށް ޝަނޫން ވިދާޅުވިއެވެ. އިޖުތިމާޢީ އަދި އިޤްތިޞާދީ ޙައްގުތަކާއި ގުޅުންހުރި 22 މައްސަލައެއް ހުށައަޅާފައިވާކަމަށްވެސް އޭނާ ވިދާޅުވިއެވެ.

އެޗްއާރްސީއެމުން ވިދާޅުވީ، މިއަހަރުގެ ތެރޭގައި ހުށައަޅާފައިވާ މައްސަލަތަކުގެ ތެރެއިން 249 މައްސަލައަކީ ތަޙުގީގުކުރުމުގެ އަސާސްތަކެއް ނެތްކަމަށް ނިންމާފައިވާ މައްސަލަކަމަށެވެ. އަދި ތަޙުގީގުކުރަން ނިންމާފައިވާ 388 މައްސަލައިގެ ތެރެއިން މިހާތަނަށް 222 މައްސަލައެއްގެ ތަޙުގީގު ނިމިފައިވާކަމަށް އެޗްއާރްސީއެމުން ވިދާޅުވެއެވެ.

އެކޮމިޝަނުން ވިދާޅުވީ އިންސާނީ ޙައްގުތައް ކަށަވަރުކުރުމަށް ރާއްޖެއަށް ކުރިމަތިވެފައިވާ އެންމެ ބޮޑު މައްސަލައަކީ ބަޖެޓުގެ ދަތިކަންކަމަށެވެ.

އެޗްއާރްސީއެމްގެ ސީނިއާ އެޑްވޮކަސީ އޮފިސަރ ފާޠިމަތު އަޙްމަދު ވިދާޅުވީ، ވަށައިގެންވާ މާޙައުލުގައި އިންސާނީ ޙައްގުތަކާއި ގުޅުންހުރި އެތައްކަމެއް ހުރިއިރު، އެކަންކަމާ ގުޅޭގޮތުން ޢާންމުން ހޭލުންތެރިކަން އިތުރުކުރުމަކީ މުހިންމުކަމެއްކަމަށެވެ. އެހެންނަމަވެސް އެފަދަ ހުރިހާކަމެއްގައި ހުރިހާ ދިވެހީންނާއި ރާއްޖޭގައި ދިރިއުޅޭ ބިދޭސީން ހޭލުންތެރިކުރުމަށް އެންމެ އެދެވޭގޮތުގައި މަސައްކަތްކުރާނެ ބަޖެޓެއް ނެތްކަމަށް އޭނާ ވިދާޅުވިއެވެ.

"ކޮމިޝަނަށް ކޮންމެ އަހަރުވެސް ލިބެނީ ވަރަށް ކުޑަ ކުޑަ ބަޖެޓެއް. އެބަޖެޓު އަޅުގަނޑުމެން އެބަ ބަހާލަންޖެހޭ އެކި ދާއިރަތަކަށް. އިންސާނީ ޙައްގުތަކާ މެދު މީހުން ހޭލުންތެރިކުރުވުމަކީ ވަރަށް ބޮޑު ޒިންމާއެއް. އެކަމަށްވެސް ވަރަށް ކުޑަ ބަޖެޓެއް މިލިބެނީ، އެވެސް އެބަޖެހޭ އެކި ބައިބަޔަށް ބަހާލަން." ފާޠިމަތު އަޙްމަދު ވިދާޅުވިއެވެ.

ބަޖެޓުގެ ދަތިކަން ހުރިނަމަވެސް އެކި ގޮތްގޮތުން ހޯދާ އެހީތަކާއި، އެކި ޖަމްޢިއްޔާތަކާއި ގުޅިގެން އިންސާނީ ޙައްގުތަކާއި ބެހޭގޮތުން ޢާންމުން ހޭލުންތެރިކުރުމުގެ މަސައްކަތް އެޗްއާރުސީއެމުން ދަނީ ކުރަމުންނެވެ. އެގޮތުން ސްކޫލް ކުދިންނަށާއި އެކި ރަށްރަށުގައި ހޭލުންތެރިކުރުވުމުގެ ޕްރޮގްރާމްތައް ދަނީ ހިންގަމުންނެވެ. އިންސާނީ ޙައްގުތަކުގެ ދުވަހުގެ ދުވަސް ރަސްމީކޮށް މިއަހަރު ފާހަގަކުރަކީ އައްޑޫ ސިޓީގައެވެ.