ވިޔަފާރިތަކުން ޑޮލަރު މާރުކުރުމާއި ގުޅޭ ބިލު ހުށަހެޅީ ވަޢުދުވެފައިވާ ގޮތަށް: ރައީސް

ވަޢުދުވެވަޑައިގެންފައިވާ ގޮތަށް ޑޮލަރުގެ ދަތިކަން ނައްތާލުމުގެ މަސައްކަތްތައް ކުރިއަށްދާނޭކަމުގެ ޔަޤީންކަން ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ދެއްވައިފިއެވެ.

އަރި އަތޮޅާއި މާލެއަތޮޅުގެ ބައެއް ރަށްތަކަށް ކުރައްވަމުންގެންދަވާ ދަތުރުފުޅުގެ ތެރެއިން ކ. ހުރާގެ ރައްޔިތުންނާ ބައްދަލުކުރައްވައި ވާހަކަފުޅުދައްކަވަމުން އެމަނިކުފާނު ވިދާޅުވީ، ޑޮލަރުގެ ތާށިކަމަކީ ވާރުތަވެފައިވާ އިޤްތިޞާދީ މައްސަލައެއްކަމަށެވެ. އަދި ރާއްޖޭގެ އިޤްތިޞާދަށް ވަންނަ ފައިސާގެ ތެރެއިން ބައިކުޅަ ބައެއް ރާއްޖޭގެ ބޭންކުން މާރުކުރަން ޖެހޭގޮތަށް އެކަށައެޅުއްވީ ރައްޔިތުންގެ ޙައްޤުގައިކަމަށް އެމަނިކުފާނު ވިދާޅުވިއެވެ. އެގޮތުން އެކަމާ ގުޅޭ ޤާނޫނު ތަޢާރަފުކުރުމުގެ ބިލު، މަރުކަޒީ ބޭންކުގެ ފަރާތުން އެކުލަވާލައްވައި މަޖިލީހަށް ހުށަހަޅުއްވާފައިވާކަމުގައި ރައީސުލްޖުމްހޫރިއްޔާ ވިދާޅުވިއެވެ. އަދި އެ ބިލު ހުށަހަޅުއްވާފައިވަނީ، އެމަނިކުފާނު ކުރިންވެސް ވިދާޅުވިގޮތަށް، ބަދަލެއް ނުގެނެސްކަމުގައި ރައީސުލްޖުމްހޫރިއްޔާ ވިދާޅުވިއެވެ.

އަދި ރައްޔިތުންގެ މަޖިލީސް، މި ދައުރުގެ ޗުއްޓީއަށް ދިއުމުގެ ކުރިން އެ ބިލު ފާސްކުރައްވާނޭކަމުގެ އުންމީދު ފާޅުކުރައްވައި ރައީސުލްޖުމްހޫރިއްޔާ ވަނީ، އެ ބިލު ފާސްވުމަކީ، ރައްޔިތުންގެ ފުދުންތެރިކަން އިތުރުކޮށްދީ މުއްސަނދިކަން ގެނެސްދޭނޭ ކަމެއްކަން ފާހަގަކުރައްވާފައެވެ.

"އަޅުގަނޑުމެން މި ނިންމީ އެކި ކެޓަގަރީތަކަށް ބަހާލާ ރިސޯޓުތަކުންވިއްޔާ 500 ޑޮލަރު ބޮލަކަށް މާރު ކުރާގޮތަށް. އެކަން ހަމަ އެގޮތަށް އޮންނާނީ. ދެން އޭގެ އިތުރަށް ގެސްޓްހައުސްތަކާއި ކުދި ވިޔަފާރީތައް ސިޓީ ހޮޓާތަކާއި ދެން މި ހުންނަ ލިވަރބޯޑް ފަދަ ތަންތަނުން 25 ޑޮލަރު ބޮލަކަށް މިފަދަ ގޮތަކަށް. އަޅުގަނޑު ދެންނެވިން އެއީ ޖުމްލަ އެމަހަކަށް ޖެހޭ އާމްދަނީގެ 20 އިންސައްތަކަމަށް، އެހެންކަމުން ރިސޯޓު ބޭފުޅުންނާއެކު ކުރެވުނު މަޝްވަރާގެ ވެސް އަލީގައި ހަމަ 500 ޑޮލަރު މާރުކުރަންޖެހޭ ގޮތަށް ނުވަތަ 20 ޕަސަންޓް މާރުކުރަންޖެހޭނެ. ޤާނޫން އެކަން މަޖުބޫރު މިކުރަނީ. އަޅުގަނޑު ދެންނެވިގޮތަށް އެއްވެސް ބަދަލެއް ނުގެނެސް އެކަން އެ އޮތީ" ރައީސުލްޖުމްހޫރިއްޔާ ވިދާޅުވިއެވެ..

މިއަދު ސަރުކާރުން މަޖިލީހަށް ހުށަހެޅުއްވި ބިލުގެ ބޭނުމަކީ، ދިވެހިރާއްޖޭގައި ބޭރު ފައިސާއިން ކުރެވޭނޭ މުޢާމަލާތްތައް ކަނޑައަޅައި، ބޭރު ފައިސާ ދިވެހިރާއްޖެއަށް އެތެރެކުރުމާއި، ދިވެހިރާއްޖެއިން ބޭރުކުރުމާއި، ބޭރު ފައިސާ ދިވެހިރާއްޖޭގައި ގެންގުޅުމާއި، ޖަމާކުރުމާއި، މާރުކުރުމާބެހޭ އުޞޫލުތަކާއި، އެނޫންވެސް ބޭރު ފައިސާ އާއި ބޭރު ފައިސާއާ ބެހޭ މުޢާމަލާތްތަކާ ގުޅޭ ހަމަތަކާއި އުޞޫލުތައް، ޤާނޫނީ އޮނިގަނޑެއްގެ ތެރެއިން ކަނޑައަޅައި ހިންގުމެވެ.