ފުޓްބޯޅައިގެ ފޯރި އަލުން ގަދަކުރުމުގެ އަމާޒުގައި މުޅި ރާއްޖެއަށް ހުޅުވާލައިގެން ބާއްވާ ނައިންޓީ ޕްލަސް ގޯލްޑް ކަޕް 2024 ގައި ވާދަކުރާ ރ. އަލިފުށި ޓީމުގެ ކުޅުންތެރިންނަށް ލިބުނު އެންމެ ބޮޑު އުފަލަކީ ގިނަ ދުވަސްތަކަކަށްފަހު ރަސްމީ ބޯޅަ ދަނޑުގައި ވާދަވެރި ފުޓްބޯޅަ މުބާރާތެއް ކުޅެލަން ލިބުން ކަމަށް އެ ޓީމު މެނޭޖަރު އަލީ އަޒްމީން ބުނެފިއެވެ. އަޒްމީން މިހެން ބުނެފައިވަނީ ޕީއެސްއެމް އިން ގެނެސްދިން "ކުޅިވަރު ވިންދު" ޕްރޮގްރާމުގައި ވާހަކަދައްކަމުންނެވެ.
އަޒްމީން ބުނީ ކުލަބު ފެންވަރުގައި ރަސްމީ ދަނޑުގައި ކުޅުމާއި، އެ ދަނޑުގައި އަމިއްލަ ރަށް ތަމްސީލުކުރުމަކީ ތަފާތު ރޫހެއް ގެނުވާ ކަމެއް ކަމަށެވެ. އަދި އުއްމީދަކީ މި މުބާރާތަށްފަހު ރާއްޖޭގެ ފުރަތަމަ ޑިވިޝަނުގެ ކުލަބުތަކުން، މި މުބާރާތުގައި އަލިފުށިން ވިދާލި ކުޅުންތެރިން ފެނުން ކަމަށާއި، ރާއްޖޭގެ ގައުމީ ޓީމު ތަމްސީލުކުރާ ފެންވަރުގެ ކުޅުންތެރިން އެ ރަށު ޓީމުގައި ހިމެނޭ ކަމަށްވެސް އަޒްމީން ބުންޏެވެ.
"އަޅުގަނޑުމެންނަށް ޓީމު އެކުލަވާލެވުނީ ވަރަށް ދަތިހާލުން. ހުރިހާ ކުޅުންތެރިން ހަމެވެގެން ޕްރެކްޓިސް ކުރެވޭ ގޮތްވީ ވަރަށް ކުޑަތަންވީ ފަހުން." އަޒްމީން ބުންޏެވެ.
އަލިފުށީ ޓީމުގެ ކޯޗަކީ ތަޖުރިބާކާރު ކޯޗު އިސްމާޢީލް އާސިފް (ކުޑަހީނާ) އެވެ. އަޒްމީން ބުނީ ކުޑަހީނާ އާއެކު ރަށުގައި މުބާރާތަށް ފުރަތަމަ ތައްޔާރުވާން ފެށީ މަދު ކުޅުންތެރިންތަކަކާއެކު ކަމަށާއި، އޭގެތެރޭގައި އަލިފުށީ ސްކޫލުގައި ކިޔަވާ ދަރިވަރުންވެސް ހިމެނުނު ކަމަށެވެ. އަދި މުބާރާތުގައި މިހާތަނަށް ވަރުގަދަ ކުޅެމެއް ދެއްކުނު ނަމަވެސް، އަލިފުށީ ޓީމުގައި އެކަށީގެންވާ ވަރުގެ ސްކޮޑެއް ނެތް ކަމަށް އަޒްމީން ބުންޏެވެ.
މި ފަހަރުގެ މުބާރާތުގެ ފުރަތަމަ ބުރުގައި އަލިފުށި ޓީމަށް މޮޅުނުވެވުނު ހަމައެކަނި މެޗަކީ ކ. މާފުއްޓާ ދެކޮޅަށް ކުޅުނު މެޗެވެ. އަދި މި މުބާރާތުގައި އަލިފުށިން ވަނީ މިހާތަނަށް ގިނަ އަދަދެއް ސަޕޯޓަރުން ދަނޑަށް ވައްދާފައެވެ. މީގެ އިތުރުން އި ރ. އަތޮޅަށް ނިސްބަތްވާ ގިނަ އަދަދެއްގެ ސަޕޯޓަރުންވެސް ދަނޑަށް ވަންނައިރު، އަލުފުށީގައިވެސް ވަނީ މި މުބާރާތުގެ ފޯރިގަދަވެފައެވެ.