ފުޓްބޯޅައިގެ ފޯރި އަލުން ގަދަކުރުމުގެ އަމާޒުގައި މުޅި ރާއްޖެއަށް ހުޅުވާލައިގެން ބާއްވާ ނައިންޓީ ޕްލަސް ގޯލްޑް ކަޕް 2024 ގައި ވާދަކުރާ ފުވައްމުލައް ސިޓީގެ ކުޅުންތެރިންނަށް ސަޕޯޓަރުންގެ ފުރިހަމަ އިތުބާރު ލިބޭނެ ކަމަށް އުއްމީދުކުރާ ކަމަށާއި، އަމާޒަކީ މުބާރާތުގައި ދެވެން އޮތް އެންމެ ދުރަކަށް ދިޔުން ކަމަށް އެ ޓީމުގެ ކޯޗު ސޮބާހު މުޙައްމަދު ބުނެފިއެވެ. ސޮބާ މިހެން ބުނެފައިވަނީ ޕީއެސްއެމް އިން ގެނެސްދިން "ކުޅިވަރު ވިންދު" ޕްރޮގްރާމުގައި ވާހަކަދައްކަމުންނެވެ.
މި މުބާރާތުގެ އެންމެ މުސާރު ބޮޑު ކޯޗު ސޮބާ ބުނީ ޓީމު އެކުލަވާލުމުގައި އުނދަގޫތަކެއް ހުރި ނަމަވެސް ކާމިޔާބު ހޯދޭނެ ކަމަށެވެ. އެކަމަކު އެއްވެސް ޓީމަކަށް މުބާރާތަށް އެކިށީގެންވާ ވަރަށް ތައްޔާރުވެވިފައިނުވާ ކަމަށާއި، މުޅި ޓީމާއެކު މުބާރާތުގެ ކުރިން ކުރެވުނީ މަދު ފަރިތަކުރުންތަކެއް ކަމަށްވެސް ވަނީ ބުނެފައެވެ.
ސޮބާ ބުނީ ހުރިހާ ފޯކަސް އެއް ބެހެއްޓީ ކުޅުންތެރިން އަނިޔާއިން ސަލާމަތްކުރުމަށް ކަމަށާއި، އޭގެ ފަހުން ޓީމުގެ ހުނަރު މައްޗަށް ޖެއްސުމަށް ތަމްރީންތަކުގައި މަސައްކަތް ކުރި ކަމަށެވެ. އަދި ފުޓްސަލްގައި ގިނަ ކުޅުންތެރިން އުޅެމުން، ބޮޑު ދަނޑެއްގައި މިކަހަލަ މުބާރާތެއްގައި ކުޅެން ޖެހުމުން ގޮންޖެހުންތައް ދިމާވާ ކަމަށްވެސް ކޯޗު ސޮބާހު ވަނީ ބުނެފައެވެ.
"ފުޓްސެލް މި މީހުން މި ކުޅެނީ 20 މިނެޓުގެ ދެ ހާފު، އެހެންވީމަ ބޮޑު ފުޓްބޯޅައިގައި ފިޒިކަލީ ކުޅުންތެރިންގެ ބުންވަރެއް ނުހުރޭ. ޚާއްސަކޮށް ގާތްގާތުގައި މެޗު ކުޅޭއިރު." ސޮބާހު ބުންޏެވެ.
މި ފަހަރުގެ މުބާރާތުގައި ފުވައްމުލަކުން ވަނީ ގްރޫޕް ސްޓޭޖުގެ ފުރަތަމަ ބުރުގައި ކުޅުނު ހުރިހާ މެޗެއް ކާމިޔާބުކޮށް، ދެވަނަ ބުރުގައި މިއަދު ހަވީރު ތ. ތިމަރަފުއްޓާ އެއްވަރުކޮށްފައެވެ.