ޤައުމީ އެސެސަރުން ތަމްރީނުކުރުމަކީ ހުނަރުވެރި ޖީލެއް ބިނާކުރުމަށް ކުރާ މަސައްކަތުގެ ނަތީޖާ: ވަޒީރު ޑރ.މާރިޔާ
-
އެމްއެންއެސްޑީއޭގައި 201 ޤައުމީ އެސެސަރުން މިހާރު ރަޖިސްޓްރީވެފައިވޭ
-
29 ޓްރެއިނިންގ އޮފް ޓްރެއިނަރސް ތަމްރީނުކުރުމަށް އިންވެސްޓްކޮށްފައިވޭ
ޤައުމީ އެސެސަރުން ތަމްރީން ވެގެންދިއުމަކީ ސަރުކާރުން ހުނަރުވެރި އަދި އަމިއްލަ ފައިމައްޗަށް ތެދުވެވޭ ޖީލެއް ބިނާކުރުމަށް ކުރާ މަސައްކަތުގެ ނަތީޖާ ކަމަށް މަތީ ތައުލީމާއި މަސައްކަތްތެރިކަމާއި ހުނަރުތައް ތަރައްޤީކުރުމާއި ބެހޭ ވަޒީރު ޑރ. މަރިޔަމް މާރިޔާ ވިދާޅުވެއްޖެއެވެ.
ވަޒީރު މިހެން ވިދާޅުވީ މޯލްޑިވްސް ނެޝަނަލް ސްކިލްސް ޑިވެލޮޕްމަންޓް އޮތޯރިޓީ (އެމް.އެން.އެސް.ޑީ.އޭ) އިން ނޭޝަނަލް އެސެސަރ ޓްރެއިނިންގް ޕްލޭން ލޯންޗުކުރުމަށް، މީރުމާގައި ބޭއްވި ޚާއްސަ ރަސްމިއްޔާތުގައި ވާހަކަފުޅު ދައްކަވަމުންނެވެ. މިޕްލޭނަކީ ދިވެހިރާއްޖޭގައި ފަންނީ ހުނަރުވެރި މަސައްކަތްތެރީން ބިނާކުރުމަށް ހިންގާ ތަމްރީނު ޕްރޮގްރާމުތައް އެސެސްކުރުމުގެ މަސައްކަތުގައި ހަރަކާތްތެރިވާ ނޭޝަނަލް އެސެސަރުންގެ މަސައްކަތުގެ ފެންވަރު އެއް މިންގަނޑެއްގައި ދެމެހެއްޓުމަށްޓަކައި ވޯލްޑް ބޭންކުގެ އެހީގައި އެކުލަވާލައިފައިވާ ޕްލޭނެކެވެ.
މަތީ ތައުލީމާއި މަސައްކަތްތެރިކަމާއި ހުނަރުތައް ތަރައްޤީކުރުމާއި ބެހޭ ވަޒީރު ޑރ. މަރިޔަމް މާރިޔާ ވިދާޅުވީ ޤައުމީ އެސެސަރުން ތަމްރީނުކުރުމުގެ ޕްލޭނަކީ ހަމައެކަނި ލިޔުމެއް ނޫންކަމަށާއި މި ޕްލޭނަކީ މިހާރު ރަޖިސްޓްރީވެފައިވާ އެސެސަރުންނަށާއި އަދި ކުރިމަގުގައި މިޓީމާ ގުޅޭ ފަރާތްތަކަށް ޚާއްޞަކޮށް ފަރުމާކޮށްފައިވާ ޕްލޭނެއްކަމަށެވެ.
ވަޒީރު ވިދާޅުވީ މިޕްލޭންގެ އަމާޒަކީ އެކި ދާއިރާތަކުން ސަނަދު ދެވޭނެ ފެންވަރު ރަނގަޅު އެސެސަރުން ހޯދައި ތަރައްޤީކުރުންކަމަށެވެ.
ވަޒީރު ޑރ. މާރިޔާ ވިދާޅުވީ މިއަމާޒަށް ވާސިލްވުމަށްޓަކައި ފާހަގަކުރެވޭ ކުރިއެރުންތަކެއް މިހާރުވެސް ހޯދާފައިވާކަމަށެވެ. އެގޮތުން މިހާރުވެސް 201 ޤައުމީ އެސެސަރުން އެމްއެންއެސްޑީއޭގައި ރަޖިސްޓްރީވެފައިވާއިރު، މިއީ އެކި ދާއިރާތައް ތަމްސީލުކުރާ އަދި ޤައުމުގެ ތަޢުލީމީ ނިޒާމަށް ތަޖުރިބާއާއި ހުނަރު ގެނެސްދޭނެ ބައެއްކަމަށެވެ. އަދި އެސެސްމަންޓް އޮނިގަނޑުގެ ފެންވަރު އިތުރަށް މަތިކުރުމަށްޓަކައި، ޓްރެއިނިންގ އޮފް ޓްރެއިނަރސްގެ ގޮތުގައި 29 މީހުން ތަމްރީނުކުރުމަށް އިންވެސްޓްކޮށްފައިވާކަމަށެވެ. މި ޓްރެއިނަރުންނަކީ ދެމެހެއްޓެނިވި ހުނަރު ތަރައްޤީކުރުމުގެ އިސްތިރާޖީ މުހިންމު ދައުރެއް އަދާކުރާނެ ބައެއް ކަމަށްވެސް ވަޒީރު ވިދާޅުވިއެވެ.
ޑރ. މާރިޔާ ވިދާޅުވީ ޤައުމީ އެސެސަރުންގެ ޓްރެއިނިން ޕްލޭނަކީ ސަރުކާރުން އަމިއްލަ ފައިމައްޗަށް ތެދުވެވޭ ޖީލެއް ބިނާކުރުމަށް ކުރާ މަސައްކަތުގެ ފުރިހަމަ ނަތީޖާކަމަށެވެ.
" މި މަސައްކަތަކީ ހަމައެކަނި އިދާރީ އިޖުރާއަތެއް ނޫން. މިއީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ދުރުވިސްނުމާއި، އަޅުގަނޑުމެންގެ ސަރުކާރުން ހުނަރުވެރި އަދި އަމިއްލަ ފައިމައްޗަށް ތެދުވެވޭ ޖީލެއް ބިނާކުރުމަށް ކުރާ މަސައްކަތުގެ ފުރިހަމަ ނަތީޖާއެއް. އަޅުގަނޑުމެންގެ ޤައުމީ އެސެސަރުންގެ ޕްރޮފެޝަނަލް ތަރައްޤީއަށް އިންވެސްޓްކުރުމަކީ ދިވެހިރާއްޖޭގެ ފަހި މުސްތަޤުބަލަށް ކުރެވޭ އަގުހުރި އިންވެސްޓްމަންޓެއް" ވަޒީރު ޑރ. މާރިޔާ ވިދާޅުވިއެވެ.
ނޭޝަނަލް އެސެސަރ ޓްރެއިނިންގް ޕްލޭނަކީ ދިވެހިރާއްޖޭގައި ފަންނީ ހުނަރުވެރި މަސައްކަތްތެރިން ބިނާކުރުމަށް ހިންގާ ތަމްރީނު ޕްރޮގްރާމުތައް އެސެސްކުރުމުގެ މަސައްކަތުގައި ހަރަކާތްތެރިވާ ނޭޝަނަލް އެސެސަރުންގެ މަސައްކަތުގެ ފެންވަރު އެއް މިންގަނޑެއްގައި ދެމެހެއްޓުމަށްޓަކައި ވޯލްޑް ބޭންކުގެ އެހީގައި އެކުލަވާލާފައިވާ ޕްލޭނެކެވެ.