އޭޝިއަން ސާފިން ޗެމްޕިއަންޝިޕުގައި ޖޫނިއާ ކެޓަގަރީން ސެމީ ފައިނަލްގައި ވާދަކުރުމުގެ ފުރުސަތު ހޯދި އުމުރުން 14 އަހަރުގެ ޔޫސުފް ކަޔާން ހަމްދާން ޒަކީ ޤައުމީ ސާފިން ޓީމުގައި ހިމެނިއްޖެއެވެ.
ކ. ތުލުސްދޫގައި އޮތް އޭޝިއަން ސާފިން ޗެމްޕިއަންޝިޕުގައި ޖޫނިއާ ކެޓަގަރީން ސެމީއަށް ހޮވުނު ކަޔާން އަކީ މިހާތަނަށް ރާއްޖޭގެ 18 އަހަރުން ދަށުގެ ރާޅާ އެޅުންތެރިއަކު އޭޝިއަން ޗެމްޕިއަންޝިޕުގެ ސެމީއަށް ދަތުރުކުރި ފުރަތަމަ އެތްލީޓެވެ.
ކަޔާން ވަނީ އެ މުބާރާތުގައި ތާރީހުގެ ތެރެއަށް ވަދެ ރާއްޖެއަށް ރީތި ނަން ހޯދައިދީފައެވެ. ސަރަހައްދުގެ އެންމެ މޮޅު ޖޫނިއާ ރާޅާއެޅުންތެރިންނާއި ވާދަކޮށް ކަޔާން ވަނީ އޭޝިއަން ސާފިން ޗެމްޕިއަންޝިޕްގެ ޖޫނިއާރ ކެޓަގަރީގައި ވާދަކުރި 3 ދިވެހި އެތްލީޓުންގެ ތެރެއިން ސެމީއަސް ހޮވުނު ހަމައެކަނި އެތްލީޓެވެ.
ގައުމީ ސާފިން ޓީމު އެކުލަވާލާފައިވާއިރު، ކަޔާންގެ އިތުރުން އެޓީމުގައި ހިމެނޭ ރާޅާ އެޅުންތެރިންނަކީ ހޫދު އަހުމަދު، އިސްމާއިލް މިގްލާލް (ކުޑަ އިއްސެ)، ނަޖާހް މުހައްމަދު އަހުމަދު އާގިލް (އަންމަޑޭ) އަދި އިސްމާއިލް ރަޝީދް (ސްމައިލީ) އެވެ. މިއީ ލީގު ރޭންކިންގައި އެންމެ ކުރީގައި އުޅޭ ހަ ރާޅާއެޅުންތެރިންނެވެ. މީގެ ތެރެއިން ހޫދަކީ މިއަހަރުގެ ގައުމީ ލީގުގެ ޗެމްޕިއަނެވެ.
އަންނަ އަހަރަށް ގައުމީ ޓީމު އެކުލަވާލިއިރު މިއީ ސާފިން އެސޯސިއޭޝަނުން ބަލާ މިންގަނޑުތަކަށް ފައްތައިގެން ކަނޑައަޅާފައިވާ ޓީމެކެވެ. މި ޓީމުގައި ހިމެނޭ ސާފަރުންނަކީ ވަރަށް ތަޖްރިބާކާރު ރާޅާ އެޅުންތެރިންނެވެ.