ހުރާއިންވެސް ރައީސުލްޖުމްހޫރިއްޔާއަށް ދެންނެވީ ހޫނު މަރުހަބާއެއް
-
ރައީސްގެ މިދަތުރުފުޅުގައި އއ.އަތޮޅާއި، ކ.އަތޮޅުގެ ބައެއް ރަށްތަކަށްވަނީ ވަޑައިގަންނަވާފައި
ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ކ.ހުރާއަށް ވަޑައިގަތުމުން އެރަށުންވެސް އެމަނިކުފާނަށް ހޫނު މަރުހަބާއެއް ދަންނަވައިފިއެވެ. ރައީސުލްޖުމްހޫރިއްޔާއަށް މަރުހަބާ ދެންނެވުމަށް ގިނަ ޢަދަދެއްގެ ބަޔަކުވަނީ ބަނދަރު ސަރަޙައްދަށް އެއްވެފައެވެ.
ރައީސުލްޖުމްހޫރިއްޔާ ހުރާއަށް ވަޑައިގެންނެވީ އަރިއަތޮޅު އުތުރުބުރީގެ ރަށްތަކަށާއި މާލެ އަތޮޅުގެ ބައެއް ރަށްތަކަށް ކުރައްވަމުންގެންދަވާ ދަތުރުފުޅުގެ ތެރެއިންނެވެ.
ރައީސުލްޖުމްހޫރިއްޔާގެ މިދަތުރުފުޅުގެ ތެރެއިން ހުރާގެ ކައުންސިލާއި، އަންހެނުންގެ ތަރައްޤީއަށް މަސައްކަތްކުރާ ކޮމިޓީއާއި، އަތޮޅު ކައުންސިލާއި އަދި ހުރާގެ ޢާއްމު ރައްޔިތުންގެ ހުރި ކަންބޮޑުވުންތައް އަޑުއެއްސެވުމަށާއި ރައީސުލްޖުމްހޫރިއްޔާ ގެންގުޅުއްވާ ތަސައްވުރުވެސް ހިއްސާކުރެއްވުމަށްވަނީ ހަމަޖެހިފައެވެ. މީގެއިތުރުން ދިއްފުށީ ކައުންސިލާއި، ތުލުސްދޫ ކައުންސިލާއި އެދެރަށުގެ އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ މެމްބަރުންނާވެސް ބައްދަލުކުރެއްވުމަށްވަނީ ހަމަޖެހިފައެވެ.
އެމަނިކުފާނު އަރިއަތޮޅު އުތުރުބުރިއަށާއި މާލެ އަތޮޅުގެ ބައެއް ރަށްތަކަށް ކުރައްވާ މިދަތުރުފުޅުގެ ތެރެއިން މިއަދު ހެނދުނުވަނީ ކ.ގާފަރަށް ވަޑައިގަންނަވާފައެވެ. ހުރާއަށްފަހު އެމަނިކުފާނު ވަޑައިގަތުމަށް ހަމަޖެހިފައިވަނީ ހިންމަފުއްޓަށެވެ.
ރައްޔިތުންނާ ގާތުން ރައްޔިތުންގެ ހާލު ބެއްލެވުމަށް ވަޑައިގަންނަވާނެކަމަށް، ވެވަޑައިގަންނަވާ ވަޢުދުފުޅުގެ ދަށުން އެމަނިކުފާނު ގެންދަވަނީ ރާއްޖޭގެ އެކި ރަށްރަށަށް ވަޑައިގަންނަވަމުންނެވެ. ރައީސުލްޖުމްހޫރިއްޔާ މިހާރު ކުރައްވަމުން ގެންދަވާ ދަތުރުފުޅު ނިންމަވާލެއްވުމަށްފަހު މާލެ ވަޑައިގަންނަވާނީ މިރޭގެ ވަގުތެއްގައެވެ.