ޔުނައިޓެޑް ނޭޝަންސް ކޮންވެންޝަން އެގެއިންސްޓް ކޮރަޕްޝަން، ޔުންކެކްގެ އިމްޕްލިމެންޓޭޝަން ރިވިއު ގުރޫޕުގެ ހަތްވަނަ ސެޝަންގައި އެންޓި-ކޮރަޕްޝަން ކޮމިޝަނުން ބައިވެރިވެވަޑައިގެންފިއެވެ. މި މަހުގެ 20 ން 24 އަށް އޮސްޓްރިއާގެ ވިއެނާގައި ކުރިއަށްދާ މި ސެޝަންގައި އެންޓި-ކޮރަޕްޝަން ކޮމިޝަންގެ ފަރާތުން ބައިވެރިވެ ވަޑައިގަންނަވަނީ އެ ކޮމިޝަންގެ ނާއިބު ރައީސް އަލްއުސްތާޛް މުޢައްވިޒު ރަޝީދުއެވެ.
މި ސެޝަންގެ މައިގަނޑު މަޤުޞަދަކީ ކޮރަޕްޝަން ހުއްޓުވުމަށްޓަކައި އެ ގުރޫޕުން ކުރަމުންދާ މަސައްކަތްތަކާ ގުޅޭގޮތުން ޚިޔާލު ބަދަލުކޮށް، ކޮންވެންޝަން ތަންފީޒު ކުރުމުގައި ކުރިމަތިވަމުންދާ ގޮންޖެހުންތަކާއި، އެ މަސައްކަތް ކުރުމަށް އެންމެ ރަނގަޅު އުޞޫލާއި އަދި ބޭނުންވާ ފަންނީ އެހީތެރިކަން ޙިއްޞާ ކުރުމާ ބެހޭގޮތުން މަޝްވަރާކޮށް، ޚިޔާލު ބަދަލުކުރުން ކަމަށް އޭސީސީން މަޢުލޫމާތު ދެއްވައެވެ. އަދި ވޭތުވެދިޔަ ތަނުގައި މުޢާހަދާއަށް ޢަމަލުކޮށްފައިވާ މިންވަރާ ގުޅޭގޮތުން އެކި ޤައުމުތަކުން ލިބިފައިވާ ރިވިއުތަކާގުޅޭ ގޮތުން މި ސެޝަންތަކުގައި މަޝްވަރާކުރެވޭނެކަމަށް އެކޮމިޝަނުން ވިދާޅުވެއެވެ.
މިއަހަރުން ފެށިގެން މި މުޢާހަދާގެ 2 ވަނަ އަދި 5 ވަނަ ޗެޕްޓަރއަށް ޤައުމުތަކުން ޢަމަލުކުރެވިފައިވާ މިންވަރު ދެނެގަތުމަށް ރިވިއުއެއް ހަދަން ފަށާއިރު، މި މުޢާހަދާގެ ފުރަތަމަ ބުރުގެ ރިވިއު ދިވެހިރާއްޖެއިން ފުރިހަމަކޮށް، 2 ވަނަ ބުރުގެ ރިވިއު ހެދުމަށް ހަމަޖެހިފައިވަނީ 2018 ވަނަ އަހަރުއެވެ. މި ގުރޫޕަކީ މުޢާހަދާގައި ބައިވެރިވެފައިވާ ޤައުމުތަކުން މުޢާހަދާގައި ބަޔާންކޮށްފައިވާ ކަންތައްތައް ތަންފީޒުކުރަމުންދާ މިންވަރު ދެނެގަތުމަށް އެކުލަވާލާފައިވާ ގްރޫޕެކެވެ.